Itum̃inya 5 - Bibili 1927 (Omyene)

¹ N’ayeṉi myè g’ôg’ôṉôm̃yè w’ôma w’avegagi baru gw’eka ezangô tèndô pa gô gare ntye na gw’igala, nunjô pa ni lingilyô ôrwageṉô.

² N’ayeṉi myè yenjèl yi ngulu yi tônga n’inyôy ivôlô inè: Mande are n’inyanga nyi nunguṉ’ezangô, arômbe lingilyô ya zô?

³ Na g’ôrôṽa, na gô ntye, na g’ôdôlôngô wi ntye e re pegeg’ôma ni ngulu yi nunguṉ’ezangô, ge pôna zô.

⁴ N’aleṉi myè pôlô, konde e pa dèng’ôma w’avegagi n’inyanga gô nunguṉ’ezangô ge gô pôna zô.

⁵ N’awulinyô myè n’ôm̃ori gôr’aṉèro inè: Aleṉa, vôna, liyoni yi mbuṽe yi Yuda, y’ôramba wi David, are dènga pe ngulu gô nunguṉ’ezangô, arômbe lingilyô ôrwageṉô ya zô.

⁶ N’ayeṉi myè gô garegare y’eka na yi nyam̃a nay, na gô garegare y’aṉèro, avegagi mw’idombè kum̃aṉa pa, egolaṉi ga w’aliwô w’ajônyô. N’ômwidombè mè w’avegagi n’imengô ôrwageṉô, n’antyo ôrwageṉô, mô n’aṉiṉ’ôrwageṉô m’Anyambyè, mi tôm̃ô gô ntye yôdu.

⁷ N’aṽyeṉi yè, awong’ezangô avila g’ôg’ôṉôm̃yè w’ôma w’avegagi baru gw’eka.

⁸ Na gw’awongi yè ezangô, inyam̃a nay n’agôm̃i m’aṉèro ambaṉi n’aṉèro anay w’avôswi gô ntye g’ôzô w’ômwidombè, ôm’edu kôta pe ñombi n’amogi mi sika ya teṉateṉa ralye ni yom̃a yi nkangô, mô n’ikambiṉa s’iyombwi.

⁹ N’ayembi waô ôwemb’ômwoṉa, awulya nè: Ô re n’inyanga nyi bong’ezangô, aṉunguṉe lingilyô ya zô; konde w’ayônyô, alanduṉ’aṉaga ni ntyiṉi yo gô dwaṉa mongi Anyambyè avila gô mbuṽy’edu, n’ôṉèm̃y’edu, n’iṉongw’edu, ni ntye edu,

¹⁰ avanga waô aga n’imiṉisè gôr’Anyambyè yazô, ko waô pangiṉa gô ntye.

¹¹ Ayeṉi myè, ayogw’anyôy m’iyenjèl sinyenge vingôvingô eka na m’inyam̃a mèsoṉo na m’aṉèro; ni ntangô yaô y’avegag’igôm̃i nyi ntozèny igôm̃i nyi ntozèny sinyongo, n’intozèny s’intozèny.

¹² Awulyi waô n’inyôy ivôlô inè: Ômwidombè w’ayônyô are n’inyanga nyi pô inyanga, n’igumba, n’imya, ni ngulu, n’ôlubô, n’ivenda, n’isum̃inya.

¹³ N’ezom̃’edu z’avangyô zi re g’ôrôṽa, na gô ntye, na g’ôdôlôngô wi ntye, na gô mbeṉe, ni yom̃a yôdu yi re gô yô, my’ayogyô yô yi bulya nè: Gôre yè yi dwaṉa baru gw’eka, na gôr’ômwidombè, ga lwaṉ’isum̃inya, n’ôlubô, n’ivenda, ni ngulu gô koṉako!

¹⁴ N’inyam̃a nay s’awulyigi nè: Amèn! N’aṉèro w’avôswi gô ntye, azaviṉa.