Itum̃inya 4 - Bibili 1927 (Omyene)

¹ Isam̃u yiṉo vya, vôna, my’ayeṉ’iguge nunguṉô pa g’ôrôṽa. Inyôy ilônga ny’ayogyô myè egolaṉi g’ôrombo nkambaga na myè nè: Vanda guṉu, ko mi tum̃inyo isam̃u yi re gô twa.

² Avila vovo arweṉi myè pelè gw’iṉiṉa. Na vôna, avegag’eka dôṽyô pa g’ôrôṽa, n’ôma baru gw’eka mè.

³ N’ayè y’avegagi dwaṉa pa baru ayeṉaṉi, gw’idô nyi yaspe na nyi sardwaṉe; n’eka z’avegagi kômbiṉô pa ne mbumba, egolaṉi g’idw’iṽya nyi meralde.

⁴ Eka mèzoṉo vingôvingô, my’ayeṉ’agômi mi ka yèṉè ambaṉi ni ka nay, na gô ka mèyoṉo alwaṉi baru agôm̃i m’aṉèro ambaṉi n’aṉèro anay, boryô pa n’ingoy sa pupu, na gô wônjô yaô ikôrôṽa si sika ya teṉateṉa.

⁵ Avila gw’eka agogwi aṉômingwèmbôlô, n’anyôy, n’injalitôṽa. Avegagi kè ilambi ôrwageṉô mbamiṉaga swaswo n’eka, sô n’aṉiṉ’ôrwageṉô m’Anyambyè.

⁶ Swaswo n’eka, avegagi mbeṉe y’elasi, egolaṉi ga kristal. Gô garegare y’eka, na vingôvingô eka, avegagi nyam̃a nay ralye n’antyo g’ôzô na gô nyum̃a.

⁷ Nyam̃a nônga y’avegagi ga liyoni, na yi mbaṉi egolaṉi ga mwô’nyare, na yi ntyarô y’avegag’ôzô egolaṉi g’ôma, na yi nay y’avegag’egolaṉi ga ngwanyoṉi yi dôgwa.

⁸ N’inyam̃a mèsoṉo nay s’avegagi nyam̃y’edu n’ampaṽ’ôrôṽa, s’avegagi ralye n’antyo vingôvingô na gô gare y’ampava. Sô kè si re pegege n’ijowa ôm̃anda n’ôgwèra, kaô mbulyaga nè: Ôrunda, ôrunda, ôrunda ne Rerè Anyambyè, yi ngulu yôdu, y’avegagi, yi re, na yi bya!

⁹ Na gw’azum̃inyig’inyam̃a nay av’ôlubô n’akeṽa gôre yè y’avegagi baru gw’eka, gôre yè yi dwaṉa gô koṉako,

¹⁰ vovo agôm̃i m’aṉèro ambaṉi n’aṉèro anay w’avôswi gô ntye g’ôzô w’ôma w’avegagi baru gw’eka, azaviṉè e dwaṉa gô koṉako, n’awali waô ikôrôṽi saô ntye swaswo n’eka, awulya nè:

¹¹ Ô re n’inyanga, Ôvangiṉi wazô n’Anyambyè yazô, gô pô ivenda n’ôlubô ni ngulu; konde w’avangi yom̃a yôdu, na vo ntondiṉi yo arweṉi yô, avangyô yô kè.