Itum̃inya 3 - Bibili 1927 (Omyene)

¹ Rèndiṉa yenjèl yi mandô yi Sarde inè: Isam̃u yiṉo yi bulyô ne yè yi re n’aṉiṉ’ôrwageṉô m’Anyambyè n’igègèṉ’ôrwageṉô inè: My’avôrô ijanji so. My’avôrô kè nè, ô re n’ina inè, ô re bo, ndô ô re juwa pa.

² Ṽèmbaga, ko joly’isam̃u yi tigaṉa, yi re pyèrè gô juwa; konde mi pa jeṉ’ijanji so kwèkwè g’ôzô w’Anyambyè yam̃.

³ Sambô yônginya nt’are wè bonga pa ayogo; ko penjavenja yô anige nkôndi. Ja ô pa bèmba, mi be bya g’ôfwe, ko w’amy’igwèra nyi be bya myè gôre wè.

⁴ Ndô ô re n’ana amèwo gô Sarde mi re mi pa fweviz’ingoy saô; wi be dwaṉa na myè bora p’ingoy sa pupu, konde wi re n’inyanga.

⁵ Ayè yi be keṽa e be boryô yeṉo n’iwora nya pupu; myè kè my’azize ini nyè avila gw’ezangô z’em̃èṉo, ndô mi be mèm’ini nyè g’ôzô wa Reri yam̃ na gw’azô m’iyenjèl sè.

⁶ Ayè yi re n’arôy, e ga yogo nte buly’Iṉiṉa gôr’imandô.

⁷ Rèndiṉa yenjèl yi mandô yi Filadèlfya inè: Isam̃u yiṉo yi bulyô ne yè yi r’ôrunda n’ôrèti, ayè yi re n’isape si David, ayè yi nunguṉa ko anunj’ôma, ayè yi nunja ko aṉunguṉ’ôma, inè:

⁸ My’avôrô ijanji so. Gô re nè, ô re na mwô’ngulu wa kwè, na inè, ô re penjavenja p’igambi nyam̃ ko w’aland’ini nyam̃, vôna, my’are dôṽya pa g’ôzô wo iguge nya zange nyi re ny’ayolye nunjô n’ôma.

⁹ Vôna, mi po waô wi mandô yi Satan wi bulya nè, waô Iju, ndô waô arang’Iju, ndô wi nôka; vôna, mi be panga waô gô bya gô saviṉa gw’agôlô mo, ko waô mya nè, my’are wè tonda pa.

¹⁰ Gô re nè, ô re penjavenja p’igamba ny’isoliṉa gôre myè, myè kè mi be penjavenjo kè gw’igwèra ny’idembô, nyi bya gô ntye yôdu, gô kèṉiza waô wi dwaṉa gô ntye.

¹¹ Mi sunge bya. Gôt’ezom̃a zi re na wè ngèngèngè, ko kôrôṽi yo y’awongô n’ôma.

¹² Ayè yi be keṽa, mi be pangè imèngo gô nagô y’ôrunda y’Anyambyè yam̃, ko yè arô kogwa vovo nyèṉè; mi be tènda gôre yè ina ny’Anyambyè yam̃, n’ina nyi nkala y’Anyambyè yam̃, yô ne Yerusalèm nyoṉa, yi sum̃iṉa g’ôrôṽa avila gôr’Anyambyè yam̃, mi be tènda kè gôre yè ini nyam̃ inyoṉa.

¹³ Ayè yi re n’arôy, e ga yogo nte buly’Iṉiṉa gôr’imandô.

¹⁴ Rèndiṉa yenjèl yi mandô yi Laôdikya inè: Isam̃u yiṉo yi bulyô n’Amèn, ôyeṉi w’ibekelyô n’ôrèti, ipakilya s’ipangô s’Anyambyè inè:

¹⁵ My’avôrô ijanji so. My’avôrô kè inè, ô zele nkèy ge mpyô. Mi ko tonda gôre wè gô dwaṉe nkèy ntyo mpyô!

¹⁶ Yeṉo, gô re nè ô r’ôntinti, na inè, ô zele nkèy ge mpyô, mi be pulyo avila g’ôgwaṉi wam̃.

¹⁷ Gô re nè, ô bulya nè, my’apagi, alwaṉa n’igumb’inyenge, na myè zele n’isolo n’ezom̃’edu, na gô re nè, ô pa mya nè, awè n’ôma w’azingô n’injuke, ôkuge kè n’ipoku, n’ôtele,

¹⁸ yeṉo mi tevuṉo nè, gôla na myè sika ya teṉateṉa mèpizô pa n’ôgôṉi, ko wè paga, n’ingoy sa pupu ko wè bory’ôkuṽi wo, inè, ntyoṉi y’ôtele wo y’awôm̃wa, ni ñangô y’antyo gô kil’antyo mo, ko wè jeṉa.

¹⁹ Myè, mi sèmba azôny’ôgôm̃a gôre waôdu wi tondô myè. Sambô lwaṉe mpyô, ko nige nkôndi.

²⁰ Vôna, mi kum̃aṉa gw’iguge alôka. J’ôm’ajogw’inyôy nyam̃ aṉunguṉ’iguge, gambèṉè mi be jingiṉa gôre yè, anya na yè, n’ayè na myè.

²¹ Gôre yè yi be keṽa, mi be pangè gô dwaṉa baru na myè gw’eki zam̃, nt’ageṽi myè kè, alwaṉa baru ni Reri yam̃ gw’eki zè.

²² Ayè yi re n’arôy, e ga yogo nte buly’Iṉiṉa gôr’imandô.