Itum̃inya 22 - Bibili 1927 (Omyene)

¹ N’arum̃inyè myè ôrèmbo w’aṉingô m’em̃èṉo, pupu ga kristal, wi kogwa avila gw’eka z’Anyambyè na z’ômwidombè.

² Gô garegare y’igala nyi nkala, na gw’izamb’imbaṉi y’ôrèmbo, avegag’erere z’em̃èṉo, zi jaṉ’ilônda igôm̃i ny’inyongo ni nyongo mbaṉi g’ômpum̃a, nyongo mori ôgwèly’edu; n’ijavi s’erere si re gô jing’aṉongo.

³ E ze tô dwaṉe nyèṉè ôzavô. Eka z’Anyambyè na z’ômwidombè zi be dwaṉa gô nkala mè; inyôngô sè si be janjiṉè ayeṉ’ôzô wè,

⁴ n’ini nyè nyi be dwaṉa gw’imbam̃i saô.

⁵ E ze tô dwaṉe nyèṉè ôgwèra; na wi ze tô dwaṉe nyèṉè n’isolo nyi lambi ge ny’ôzange, konde Rerè Anyambyè e be bambiza waô ôzange, ko waô pangiṉa na yè gô koṉako.

⁶ N’awulinyi yè myè inè: Agamba miṉo mi re rèti na giligili; ni Rerè, Anyambyè y’aṉiṉa m’ivogisi, arôm̃i yenjèl yè gô tum̃iny’inyôngô sè isam̃u y’atweṉi pyèrè gô bya.

⁷ Na vôna, mi bye ngwambè. Ôzaviṉô gôre yè yi penjavenj’agamba m’ipoga s’ezangô ziṉo!

⁸ Ne myè Yôan, y’ayogyô ayeṉ’isam̃u yiṉo. Na gw’ayogyô myè ayeṉa, my’avôswi gô saviṉa gw’agôlô mi yenjèl y’arum̃inyagi myè isam̃u yiṉo.

⁹ Ndô awulinyi myè inè: Rig’alenda! Myè ne nyôngô na wè, n’awareri yo m’ivogisi, na waô wi penjavenj’agamba m’ezangô ziṉo. Zaviṉ’Anyambyè.

¹⁰ N’awulinyè myè inè: Aṉunj’agamba m’ipoga s’ezangô ziṉo. Konde egômbe z’atweṉi pyèrè.

¹¹ Ayè yi re e zel’ôgôre, e ga lwaṉ’ôgôre fo; n’ayè yi r’isèkè, e ga lwaṉe n’isèkè; ayè yi r’ôgôre, e ga gunde gô janj’ôgôre, n’ayè yi re nkèrè, e ga mèpizô vyagaṉô.

¹² Vôna, mi bye ngwambè, n’ipa si re na myè, gô p’ôm’edu ga nt’ar’ijanji sè.

¹³ Myè n’alifa n’ômega, ôlônga n’ôṉum̃uṉa, ipakilya ni ntyay.

¹⁴ Ôzaviṉô gôre waô wi jôvuṉ’ingoy saô, ko waô dwaṉa n’inyanga gw’erere z’em̃èṉo, ayingiṉa n’aguge boli gô nkala!

¹⁵ Gw’igala ar’imbwa, n’intyeṉi, ni vôvevôve, n’iyôṉisi, ni mongi wi savin’ikaṉa, n’ôm’edu e tonda alend’inôka!

¹⁶ Myè Yesu, my’are tôm̃a pe yenjèl yam̃ gô takilya ṉwè isam̃u yiṉo gw’imandô. Myè n’ôramba ni mbamba yi David, ôgègèṉi ôṽambi w’ibanga.

¹⁷ N’Iṉiṉa ni mandô yi bulya nè: yôgô. N’ayè yi jogo, e ga wulye nè: Yôgô. N’ayè yi re n’esôve, e ga ṽye; ôm’edu e jivira, e ga wong’aṉingô m’em̃èṉo mpagaga.

¹⁸ Mi takilya gôr’ôm’edu e jogw’agamba m’ipoga s’ezangô ziṉo inè: J’ôm’akund’ezom̃a, gambèṉè Anyambyè e be bôlè injuke si re tèndô pa gw’ezangô ziṉo;

¹⁹ na j’ôm’atômb’ezom̃a avila gw’agamba m’ezangô z’ipoga siṉo, gambèṉè Anyambyè e be tômb’inyangi nyè avila gw’erere z’em̃èṉo, n’avila gô nkala y’ôrunda, yi re kambô pa gw’ezangô ziṉo.

²⁰ Ayè yi takily’isam̃u yiṉo e bulya inè: Èñ, mi bye ngwambè. Amèn! Yôgô, Rera Yesu!

²¹ Imèpiṉô sa Rerè Yesu si ga lwaṉe n’aṉaga waôdu! NTYAY YI NTYANGÔ MBYA