Itum̃inya 2 - Bibili 1927 (Omyene)

¹ Rèndiṉa yenjèl yi mandô y’Efèsi inè: Isam̃u yiṉo yi bulyô yè yi kôt’igègèṉi ôrwageṉô g’ôgo wè ôṉôm̃yè, ayè yi kangaṉa gô garegare y’ilambi si sika ya teṉateṉa ôrwageṉô, inè:

² My’avôrô ijanji so, n’eṽilô zo, n’isoliṉi so. My’avôrô nè, w’ayolye sindiṉ’aṉag’aṽe; na inè, ô re kèṉiza pa waô wi bulya nè waô rôm̃i, ndô sambô waô arange rôm̃i, alènga waô inôki;

³ my’avôrô kè nè, ô re n’isoliṉa, ô re jeṉa p’azingô g’ômwanja w’ini nyam̃, ko w’ayasa.

⁴ Ndô my’are n’ôsam̃u wiṉo na wè inè, ô re tiga p’itondi so idônga.

⁵ Sambô yônginya nt’are wè pôswa pa, ko nige nkôndi, ayanj’ijanj’idônga; j’aranga yeṉo, mi be bya gôre wè, arômbe lambi yo avila gô mbôra ya yô, kaô w’akalwa.

⁶ Ndô ndaga yiṉo yi re na wè inè, ô bik’ijanja si Nikôlayiti, si bikô myè kè.

⁷ Ayè yi re n’arôy, e ga yogo nte buly’Iṉiṉa gôr’imandô, inè: Gôre yè yi keṽa, mi be pè gô ny’erere z’em̃èṉo, zi re gô Paradi y’Anyambyè.

⁸ Rèndiṉa yenjèl yi mandô yi Smirna inè: Isam̃u yiṉo yi bulyô n’ôlônga n’ôṉum̃uṉa, ayè y’avegagi juwa pa, ko yè tô dwaṉa bo, inè:

⁹ My’avôrô azingô mo n’ikugi so (ndô ô re paga pa), n’ibèrinya sa mongi wi bulya nè: waô Iju, ndô waô arang’Iju, ndô waô ne mandô yi Satan.

¹⁰ Ary’isam̃u yi be sindiṉô wè. Vôna, Satan e be fwel’awèwo gôre ṉwè gô ntyôgô, ko ṉwè kèṉizô, n’aṉwè be dwaṉa kè n’azingô igôm̃i ny’intyugu. Lwaṉ’ôma wi bekelyô kwanga gw’ijuwa, gambèṉè mi be po kôrôṽa y’em̃èṉo.

¹¹ Ayè yi re n’arôy, e ga yogo nte buly’Iṉiṉa gôr’imandô. Ayè yi be keṽa ayeṉizô nkaza gw’ijuwa sibaṉi.

¹² Rèndiṉa yenjèl yi mandô yi Pèrgame inè: Isam̃u yiṉo yi bulyô ne yè yi re n’ôkwar’ôrweṉi wi re n’arwa inkôṽa sô mbaṉi inè:

¹³ My’avôrô elumbi zo, my’avôrô nè, yô n’eka zi Satan. Ô kôt’ini nyam̃, ko w’aland’ibekelyi sam̃, vangaṉe gw’intyugu s’Antipas, ôyeṉi wam̃ wi re ko bekelyô, ayônyô gôre ṉwè, mbôra yi r’ilwaṉô nyi Satan.

¹⁴ Ndô my’are n’ôsam̃u na wè, wô nè, ô re n’aṉaga wi diṽa gw’inènja si Balaam, aṉènji Balak gô pang’awaṉa w’Israèl gô pôm̃ô ibaku, gôre waô gô nye ṽèrè yi jirô intyagô gôr’ikaṉa, avanga waô gô dèwa n’antô wi ngaṉi.

¹⁵ Egolaṉi mèmô, ô re kè n’aṉaga wi diṽa gw’inènja si Nikôlayiti.

¹⁶ Sambô, nige nkôndi; j’aranga yeṉo, mi be sunge bya gôre wè, aṉwa na waô n’ôkwara w’ôgwaṉi wam̃.

¹⁷ Ayè yi re n’arôy, e ga yogo nte buly’Iṉiṉa gôr’imandô: Gôre yè yi be keṽa, mi be pè mana yi re jumbuṉô pa, avè kè idô nya pupu; na gw’idô mènyoṉo are tèndô p’in’inyoṉa, nyi re ny’amyô n’ôma, kaô ayè yi dènga nyô.

¹⁸ Rèndiṉa yenjèl yi mandô yi Tiyatira inè: Isam̃u yiṉo yi bulyô n’Ômwaṉa w’Anyambyè, are n’antyo mè g’ôgôṉi wi bam̃iṉa, n’intyôzô sè ga nyènyè njombwi, inè:

¹⁹ My’avôrô ijanji so, n’itondi so, n’ibekelyi so, ni njanjiṉi yo, na inè, ijanji so siṉum̃uṉa si re vyagaṉô n’idônga.

²⁰ Ndô my’are n’ôsam̃u wiṉo na wè, wô nè, ô tig’ômwantô wo Yezabèl, e bulya nè, ay’ôvogisi, gô nènja aremiz’inyôngô sam̃ gôre waô gô dèwa n’antô wi ngaṉi, ko waô nye ṽèrè yi jirô intyagô gôr’ikaṉa.

²¹ N’aveṉi myè yè egômbe gô nige nkôndi, ndô e pa jivira gô nige nkôndi avila g’ibelô sè.

²² Vôna, mi be falè g’ôdô; arôm̃’azingw’ampôlô gôre waô wi dèwa na yè, kaô w’anige nkôndi avila gw’ijanji saô.

²³ Mi be jôṉiz’awaṉi wè n’ijuwa; n’imandô sôdu si be mya nè, myè ne yè yi kèlagèl’ina n’irèm̃a, mi be p’ôm’edu gôre ṉwè kè ga nt’ar’ijanji sè.

²⁴ Ndô aṉwè, ni mongi mori wi re gô Tiyatira, wi re wi zele n’inènja siṉo, na wi re wi pa my’isam̃u y’ôronga wi Satan, ga nte fweya waô yô, mi bulinya ṉwè nè: my’arwaṉize ṉwè irwaṉô inyèṉè;

²⁵ dadyè, ezom̃a zi re na ṉwè, gôtaṉi zô ngèngèngè, kaô my’abya.

²⁶ Gôre yè yi be keṽa, avenjavenj’ijanji sam̃ kwanga gô ntyay, gôre yè mi be pè inyanga gôr’aṉongo;

²⁷ ko yè pangiṉa waô ni nkogu y’ômwanga, ga nte jôṉô intyuaṉa s’ambôṉô, ga nt’are myè pô pa kè ne Reri yam̃.

²⁸ Mi be pè kè ôgègèṉi w’ibanga.

²⁹ Ayè yi re n’arôy, e ga yogo nte buly’Iṉiṉa gôr’imandô.