Itangô 6 - Bibili 1927 (Omyene)

¹ N’agambi Yeôva gôre Môsès, awulya inè:

² Gamba gôr’Israèl, ko bulinya waô inè, jog’ôṉôm̃e ge ômwantô abanguny’ôkuṽi wè avila gôr’aṉag’am̃ori gô pang’ôrangô wi nazirea, gôre yè gô dwaṉ’ôrunda gôre Yeôva,

³ gambèṉè e ga ṽanguny’ôkuṽi wè avila gw’ivè n’avila gw’ijong’ijoli; ko yè ayonga vinègre yi re pangô pa n’ivè, ge vinègre yi re bunduṉô pa n’ijong’ijoli; ayong’alugu edu mi pangô n’ilônda yi pangô ivè, anya du ilônda mè imbezô ge y’ajôm̃i.

⁴ Ôlingô wôdu wi be dwaṉô yè nazirea, anya du eza zi pila g’ôgoli, avila gw’im̃anga kwanga gô nkôwô y’ilônda yi pang’ivè.

⁵ Ôlingô wôdu wi re yè nazirea, ewônjô zè z’azèngiṉô du n’ôvenda; kaô intyugu si re dwaṉa p’ôrunda gôre Yeôva s’akeka, e be dwaṉ’ôrunda, e be pôm̃iz’itwe s’ewônjô zè.

⁶ Ôlingô wôdu wi re yè tanga p’ôrangô gôre Yeôva, azusa du pyèrè gw’ebende z’ôma;

⁷ awewiza du ôkuṽi wèmè gw’ebende za reri yè ge zi ngi yè, ge z’ômwongi yè ôṉôm̃e, ge z’ômwongi yè ômwantô, konde e be twaṉ’ôrunda w’Anyambyè yè gw’ewônjô zè.

⁸ Ôlingô wi re yè nazirea, e be dwaṉ’ôrunda gôre Yeôva.

⁹ Jog’ôm’edu ajuwa ôgambagamba pyèrè na yè, ko yè fweviza kè ewônjô zè z’ôrunda, gambèṉè e be sèngiṉ’ewônjô gô ntyugu y’ijombunyô sè, e be sèngiṉa zô gô ntyugu y’ôrwagenô.

¹⁰ Gô ntyugu y’eṉanay, e be baga gôre miṉisè abembe ambaṉi ntyo awaṉa wi menga aṽaṉi, g’ômpômbala wi ñanja y’idataṉa.

¹¹ Miṉisè yi be jir’im̃ori gô ntyagô yi pezô, ko yè p’ôraṽô wi mpungu y’ibe gôre yè g’ômwanja w’ibe sè gô ntiṉa y’ebende. N’ôma wi re nazirea e be panga kè ewônjô zè ôrunda gô ntyugu mè.

¹² Intyugu si re yè nazirea e be tô pang’itwe sè ôrunda gôre Yeôva nyongo nyèṉè, ko yè jir’ômwaṉa w’idombè w’ômpum̃’ôm̃ori gô ntyagô yi jirô g’ômwanja w’ôgara; n’intyugu sè inônga s’arangô du, konde nè nazirea yè y’apegaga fweva pa.

¹³ Nyiṉo ne ivanga ny’ôma wi re nazirea. Gô ntyugu yi be kek’egômbe zi nazirea yè, e be bagô g’ômpômbala wi ñanja y’idataṉa.

¹⁴ E be pe ntyagô yè gôre Yeôva: ômwaṉa w’idombè w’ômpum̃’ôm̃ori wi re ntyèmbo fo gô ntyagô yi pezô, idombè inyantô ny’ômpum̃’ôm̃ori nyi re ntyèmbo fo gô ntyagô y’ôraṽô wi mpungu y’ibe, n’idombè iṉôm̃e nyi re ntyèmbo fo gô ntyagô y’akeṽa.

¹⁵ Ôtôndô wi mpèmba yi re levèn fo, w’idega si farinya mbya bindô pa n’agali, na w’idega sa tètètè si re levèn fo tèṽizô pa n’agali, ni ntyagô y’ijonga yi dendô pèkèpèkè.

¹⁶ Ni miṉisè yi be pe ya yiṉo g’ôzô wi Yeôva, ko yè jire ntyagô yè yi taṽe mpungu y’ibe ni ntyagô yè yi pezô;

¹⁷ e be jir’idomb’iṉôm̃e gô ntyagô y’akeṽa gôre Yeôva, n’ôtôndô wi mpèmba yi re levèn fo, avila vovo e be jire ntyagô yi mpagaga ni ntyagô y’ijonga.

¹⁸ Ôma wi re nazirea e be sèngiṉô ewônjô zè zi re pangô p’ôrunda, g’ômpômbala wi nagô y’ikuku; e be bong’itwe s’ewônjô zè z’ôrunda, ko yè fwela sô g’ôgôṉi wi re gô ntyagô y’akeṽa.

¹⁹ Miṉisè e be bong’iṽèṉi nya numbu nyi re feṉa pa ny’idomb’iṉôm̃e, ôlega wi re levèn fo avila g’ôtôndô, n’ôlega wa tètè wi re levèn fo; ko yè fwela sô gw’ago m’ôma wi re nazirea, ayè sèngiṉô p’ewônjô zè z’ôrunda.

²⁰ Miṉisè yi be piṉa zô g’ôzô wi Yeôva; zô ne eza z’ôrunda zi miṉisè tômbare pa ntôṉô yi re piṉô pa, n’ivèṉi nya numbu nyi re tômbiṉô pa gôre Yeôva. Avila vovo, ôma wi re nazirea ayè ko jong’ivè.

²¹ Nyiṉo ne ivanga g’ômwanja w’ôma wi re tanga p’ôrangô wi nazirea; yiṉo ne ntyagô yè gôre Yeôva g’ômwanja wi nazirea yè, tômbare p’eza zi re yè ko dènga. E be dwaṉiz’eza zi re sômbyô pa g’ômwanja w’ôrangô ga nt’are yè denda pa, ga nt’ar’ivanga nyi nazirea yè.

²² N’agambi Yeôva gôre Môsès, awulya inè:

²³ Gamba gôr’Aarône na gôr’awaṉi wè aṉôm̃e, inè: Zaviṉaṉi kè Israèl, wulinyaṉi waô inè:

²⁴ Yeôva e ga zaviṉe wè, ko yè penjavenjo!

²⁵ Yeôva e ga ṽambiz’ôzô wè gôre wè, ko yè pogiṉo!

²⁶ Yeôva e ga geguny’ôzô wè gôre wè, ko yè po am̃ènjè!

²⁷ Yeṉo wi be fwel’ini nyam̃ gôr’Israèl, ko mi saviṉa waô.