Itangô 21 - Bibili 1927 (Omyene)

¹ Kanane, y’ôga w’Arad, w’alwaṉagi gô nkôṽa yi Sud, ayogyô inè, Israèl abyeṉi ni mpoṉo y’Atarim. N’aṉweṉigi yè n’Israèl, n’agôti yè ikôte gôre waô.

² Vovo Israèl w’arang’ôrangô gôre Yeôva, awulya inè: Ja w’aṉoz’iṉongo nyiṉo gw’ago mam̃, gambèṉè mi be jiliz’inkali saô n’ôrangô.

³ N’ayogyô Yeôva inyôy ny’Israèl, n’aṉozi yè mongi Kanaan. N’ayilizyô waô n’ôrangô, n’inkali saô; n’aṽètyô waô ina nyi mbôra mè inè, Orma.

⁴ N’alubwi waô avila gô nômba y’Or agènda ni mpoṉo yi mbeṉe mbondi, gô fwinya gô ntye y’Edom. N’aṽend’iṉongo gô mpoṉo.

⁵ N’agamb’iṉongo nkambiṉi mbe y’apekwa gôr’Anyambyè na gôre Môsès inè: Ntiṉa nde yi re ṉwè kogunya pa zwè avila gw’Egipt, ko zwè juwa gw’itôve, konde azele du inya, azele kè aṉingô, n’aṉiṉi mazô m’abik’inya s’aguga siṉo.

⁶ Vovo arôm̃i Yeôva im̃amba y’ôgôṉi gôr’iṉongo; n’aṉôm̃i yô aṉaga, n’ayuwi aṉag’awenge gôr’Israèl.

⁷ N’aṽyeṉ’ iṉongo gôre Môsès, awulya inè: Azw’are fwem̃a pa, konde azw’are kamba pe nkambiṉi mbe y’apekwa gôre Yeôva na gôre wè: gambiṉe Yeôva inè, e ga rômb’im̃amba yiṉo avila gôre zwè.

⁸ N’agambiṉi Môsès g’ômwanja w’iṉongo. N’awulinyi Yeôva Môsès inè: Vang’ôm̃a mba w’ôgôṉi, ko fwela wô gô ntôngô; ôm’edu wi re nôm̃a pa n’ôm̃amba, j’apôna wô, gambèṉè e be tôla.

⁹ N’avangi Môsès ôm̃amba wi nyènyè, awela wô gô ntôngô; n’ôm’edu w’arenyô n’ôm̃amba, gw’avôni yè g’ôm̃amba wi nyènyè, arôli.

¹⁰ N’alubw’Israèl, n’azèngi waô ôlakô gw’Ôbot.

¹¹ N’alubwi waô avila gw’Ôbot, n’azèngi waô ôlakô gô Ije Abarim, gw’itôve si re swaswo ni Môab gô nkôṽa yi tongwa ni nkômbe.

¹² Alubwi waô avila vovo, azèng’ôlakô g’ôdèdè wi Zerèd.

¹³ N’alubwi waô avila vovo, azèng’ôlakô g’ôzamb’ôm̃ori w’Arnon, yi pôva gw’itôve agogwa gô ntye ya mongi Amôre; konde Arnon yi re g’ôgômbiṉô wi Môab, ntyo Môab ni mongi Amôre.

¹⁴ Yeṉo e bulyô gw’ezangô z’agoṽi mi Yeôva inè: Vaèb gô Sufa, n’ampôvya gw’Arnon,

¹⁵ ni ngeva y’ampôvya yi kènda g’ôzamba w’Ar aziṽa g’ôgômbiṉô wi Môab.

¹⁶ Avila vovo agèndi waô gô Beèr. Yô ne Beèr mè, y’awulinyi Yeôva Môsès inè: Latiz’iṉongo ko mi pa waô aṉingô.

¹⁷ Vovo ayemb’Israèl waôdu ôwembô wiṉo inè: Vanda everô z’aṉingô. Yembaṉi idubô sa yô!

¹⁸ Everô z’arumbyô ne ivangiṉi, Z’arumbyô ne aṉag’avôlô, N’ôtôngô w’ôga, n’intôngô saô!

¹⁹ Avila gw’itôve agèndi waô gô Matana; avila gô Matana, agèndi waô gô Naalyèl; avila gô Naalyèl agèndi waô gô Bamot;

²⁰ avila gô Bamot agèndi waô g’ôdèdè wi re gô ntye yi Môab, gw’esôsôlô zi Pisga yi re swaswo n’itôve.

²¹ Arôm̃’Israèl igende gôre Siyon, y’ôga wa mongi Amôre, gô bulinyè inè:

²² Riga myè gô pyagaṉa gô ntye yo; azwè agènde gw’intyaga, ge gw’intyaga s’igoli, n’azwè ayong’aṉingô mi verô; azwè be kènda kaô ni mpoṉo mpôlô y’ôga kwanga gô be tiga zwè ntye yo.

²³ Siyon e pa jivira du gôr’Israèl gô pyagaṉa gô ntye yè; n’alatizi yè aṉagi wè waôdu, agogwa gô dataṉa n’Israèl gw’itôve; n’aṽyeṉi yè gô Yaas, n’aṉweṉi yè n’Israèl.

²⁴ N’awôlyô yè ne Israèl n’arwa m’ôkwara w’iwora, aṉiventye yè avila gw’Arnon kwanga gô Yabok, kwanga g’ôgômbiṉô w’awaṉa w’Amon, konde ôgômbiṉô w’awaṉa w’Amon w’avegagi kômbiṉô p’ikômba.

²⁵ N’awong’Israèl inkala sôdu, n’alwaṉ’Israèl gw’inkala sôdu sa mongi Amôre gw’Esbon na gw’inkala sôdu si re ta na yè.

²⁶ Konde Esbon avegagi nkala mpôlô yi Siyon y’ôga wa mongi Amôre, aliwô aṉweṉi n’ôg’ôlônga wi Môab, awongiṉè ntye yè yôdu kwanga gw’Arnon.

²⁷ Yeṉo inyembi si bulya inè: Yôgôṉi gw’Esbon, Ko nkala yi Siyon tô nôgô agômbiṉô igômba!

²⁸ Konde akogw’ôgôṉi avila gw’Esbon, Elôngô z’ôgôṉi avila gô nkala yi Siyon; Wi re nya pa Ar‐Môab, Alwaṉi wi mbôr’indôndwi w’Arnon.

²⁹ Azile gôre wè, Môab! W’aperi, aṉaga wi Kemos! Are panga pa awaṉi wè aṉôm̃e iveraveri, Are pa pa awaṉi wè aṉôm̃e imbwedi Gôre Siyon, y’ôga wa mongi Amôre.

³⁰ Azw’are punga p’injangô s’agonga gôre waô; Avila gw’Esbon agènda gô Didon yôdu y’ajilizyô; Azw’are jiliza pa kwanga gô Nôfasi, Kwanga gô Medeba.

³¹ N’alwaṉ’Israèl gô ntye ya mongi Amôre.

³² N’arôm̃i Môsès gô bale Yaezèr; n’awongi waô inkala si re ta na yè, n’azugi waô mongi Amôre w’avegagi gôgô.

³³ Avila vovo awinyi waô avila gw’arôm̃yô waô, n’avandi waô ni mpoṉo yi Basan. Og, y’ôga wi Basan, agogwi gô dataṉa na waô, n’aṉagi wè waôdu gô nwa na waô gw’Edrey.

³⁴ N’awulinyi Yeôva Môsès inè: Arye du, konde mi be nozè gw’ago mo ayè n’aṉagi wè waôdu ni ntye yè; ô be dendiṉè ga nt’alendiṉi wè Siyon, y’ôga wa mongi Amôre, w’alwaṉagi gw’Esbon.

³⁵ N’awôli waô yè ayè n’awaṉi wè aṉôm̃e n’aṉagi wè waôdu ko w’ariga vangaṉe ôm’ôm̃ori gô pera, n’aṉivi waô ntye yè.