Itangô 20 - Bibili 1927 (Omyene)

¹ Mandô yôdu y’Israèl y’aṽyeṉi gw’itôve si Sin g’ôgwèli ôlônga, n’alwaṉ’iṉongo gô Kadès. N’ayuwi Marya vovo, n’aṽènyô yè kè vovo.

² Na vovo e re pegeg’aṉingô mi jongô gôre mandô; n’agum̃aṉi yô alagalaga gôre Môsès na gôr’Aarône.

³ N’ayôm̃aṉ’ iṉongo ni Môsès. N’awulyi waô inè: Ezande zi re zwè e pa juwa egômbe z’ayuwi awareri yayô g’ôzô wi Yeôva?

⁴ Ntiṉa nde yi re ṉwè baga pe mandô yi Yeôva gw’itôve siṉo, gôre zwè gô juwa vovo azwè n’inyam̃i sazô?

⁵ Ntiṉa nde y’avangi ṉwè zwè gô kogwa avila gw’Egipt, gô baga zwè gô mbôra mbe yiṉo? yô arange mbôra yi re ko beṉô ilônda, yi zele n’ifig, ge igoli, ge igarnata, ge aṉingô mi jongô.

⁶ N’alubwi Môsès n’Aarône avila gôre mandô gô kènda g’ômpômbala wi ñanja y’idataṉa. N’avuri waô azô maô mbè gô ntye; n’awôm̃uny’ivenda nyi Yeôva.

⁷ N’agambi Yeôva gôre Môsès, awulya inè:

⁸ Wong’ôtôngô, ko datize mandô, awè na mwô’ngi yo Aarône. Ko kam baṉi gôr’idô gw’azô maô, ko nyô p’aṉingô ma nyô; ô be koguny’aṉingô gôre waô avila gw’idô ko wè jonje mandô n’inyam̃i saô aṉingô.

⁹ N’awongi Môsès ôtôngô w’avegagi g’ôzô wi Yeôva, ga nt’azômbyô yè ne Yeôva.

¹⁰ N’alatizi Môsès n’Aarône mandô swaswo n’idô. N’awulinyô waô ne Môsès inè: Sambô vôganyôṉi, aṉwè ivavisi! Azwè ga gogunye ṉwè aṉingô avila gw’idô nyiṉo?

¹¹ Avila vovo arômbiṉi Môsès ôgo wè, awôl’idô nyongo mbaṉi n’ôtôngô wè. N’agogw’aṉingw’am̃enge. N’ayongi mandô n’inyam̃i saô ta.

¹² Vovo awulinyi Yeôva Môsès inè: Gô re nè, aṉwè pa bekelya myè, gô mèpiza myè gw’antyo m’Israèl, aṉw’ayinginye du mandô yiṉo gô ntye yi pa myè waô.

¹³ Miṉo ne aṉingô mi Meriba, m’ayôm̃aṉ’Israèl ni Yeôva, m’amèpizyô gôre waô.

¹⁴ N’arôm̃i Môsès igende avila gô Kadès gô kènda gôr’ôga w’Edom gô bulinyè inè: Yeṉo kamb’ômwôngi yo Israèl inè: W’avôrô azingô mi re bya pa gôre zwè.

¹⁵ Ireri sazô s’agèndi gw’Egipt, n’alwaṉi zwè vovo ôling’ôla. Ndô Egipt w’alendiṉi zwè isam̃u imbe, azwè n’ireri sazô.

¹⁶ N’arôngi zwè gôre Yeôva, n’avôganyô yè inyôy nyazô. N’arôm̃i yè yenjèl mori, n’agogunyi yè zwè avila gw’Egipt. Na vôna azw’atweṉi vèṉo gô Kadès nkala yi re g’ôm̃ôndô wi ntye yo.

¹⁷ Kokolo azwè ga vyagaṉe gô ntye yo; azw’aṉogaṉe gw’intyaga ge gw’intyaga s’igoli, azw’ayonge aṉingô mi verô; azwè be kènda kaô ni mpoṉo mpôlô y’ôga, azw’ayèrwe gô nôm̃ye ge gô nyantwè azw’apyagaṉe kwanga gô be tiga zwè ntye yo.

¹⁸ N’awulinyô yè ne Edom inè: W’avyagaṉe gôre myè, mi vende kogwa gô nwa na wè n’ôkwara w’iwora.

¹⁹ N’awulinyô yè n’Israèl inè: Azwè be panda ni mpoṉo mpôlô, na j’azw’ajong’aṉingô mo, myè n’ilembi yam̃, gambèṉè mi be p’igôlô nya mô; mi pyagaṉa dadyè kaô n’intyôzô sam̃, aranga n’ezom̃’ezèṉè.

²⁰ N’awiṉizi yè inè: W’avyagaṉe! N’agogwi Edom gô dataṉa na yè n’aṉag’awenge n’ôgo wi ngulu.

²¹ Yeṉo aṽik’Edom gô tig’Israèl gô pyagaṉa gô ntye yè. N’awinyi Israèl avila gôre yè.

²² N’alubwi mandô yôdu y’Israèl avila gô Kadès aṽya gô nômba y’Or.

²³ N’awulinyi Yeôva Môsès n’Aarône gô nômba y’Or, gw’igômbiṉô yi ntye y’Edom inè:

²⁴ Aarône e be datizô gôr’iṉongo nyè, konde ayingiṉe du gô ntye yi pô myè gôr’Israèl, konde nè aṉw’are pava p’ôzômbyô wam̃ gw’aṉingô mi Meriba.

²⁵ Wong’Aarône n’Eleazar, y’ômwaṉi wè ôṉôm̃e, ko panga waô gô panda gô nômba y’Or.

²⁶ Zoduṉ’Aarône ingoy sè, ko boriza sô gôr’Eleazar, y’ômwaṉi wè ôṉôm̃e. N’Aarône e be datizô gôr’iṉongo nyè ko yè juwa vovo.

²⁷ N’alendi Môsès ga nt’azômbyô yè ne Yeôva. N’avandi waô gô nômba y’Or gw’antyo mi mandô yôdu.

²⁸ N’azoduṉi Môsès ingoy avila gôr’Aarône, aworiza sô gôr’Eleazar, y’ômwaṉi wè ôṉôm̃e. Ayuwi Aarône vovo gw’esôsôlô zi nômba. N’azum̃iṉi Môsès n’Eleazar avila gô nômba.

²⁹ N’ayeṉi mandô yôdu inè, Aarône ajuwi, ni nagô yôdu y’Israèl y’aleliṉi Aarône edingô agôm̃i m’intyugu ararô.