Itangô 19 - Bibili 1927 (Omyene)

¹ N’agambi Yeôva gôre Môsès, awulya inè:

² Vôna ôsam̃u wi re sômbyô pa gw’ivanga nyi re Yeôva sômbya pa inè: Gamba gôr’Israèl, inè, wi ga ṽage gôre wè nyare nyantô ya teṉateṉa, yi r’ibôke fo, ni ntyèmbo fo g’ôkuṽa, yi re yi pa twaṉe mpanga ntyèmbo ni mori.

³ Ko ṉwè pa yô gôr’Eleazar, ko yè kogunya yô avila g’ôlakô, ko yô jôṉô g’ôzô wè.

⁴ Eleazar, yi miṉisè, e be bonge ntyiṉa yi nyare n’ôm̃eṉô wè, ko yè nyènya yô nyong’ôrwageṉô swaswo ni ñanja y’idataṉa.

⁵ Nyare yi be pezô gw’antyo mè; ebanda za yô, n’ôzôṉe wa yô, ni ntyiṉa ya yô, n’ati ma yô ta mi be pezô.

⁶ Gambèṉè miṉisè yi be bong’ikôṉi s’ôkume ni yisop na kiramwazi, ko yè fwela sô gô garegare y’ôgôṉi wi be peze nyare.

⁷ Miṉisè yi be jôvuṉ’ingoy sè, ko yè sovunyô ôkuṽi wè gw’aṉingô; avila vovo e be tô jingiṉa g’ôlakô, e be dwaṉa fweva pa kwange nkôlô.

⁸ N’ayè yi re peza pe nyare e be jôvuṉ’ingoy sè gw’aṉingô ko yè sovunyô ôkuṽi wè gw’aṉingô, n’ayè e be dwaṉa fweva pa kwange nkôlô.

⁹ Ôṉôm̃’ôm̃ori wi re nkèrè e be kum̃iny’ômbu w’apezô ni nyare, alimbiṉa wô gw’igala ny’ôlakô, gô mbôra yi nkèrè; wi be penjavenjô gôre mandô y’Israèl, ko wô dendô n aṉingô m’ijombunya. Mô ne aṉingô mi taṽe mpungu y’ibe.

¹⁰ Ayè yi be kum̃iny’ômbu w’apezô ni nyare e be jôvuṉ’ingoy sè ko yè dwaṉa fweva pa kwange nkôlô. Nyi be dwaṉ’ivanga nya pèkèpèkè gôr’Israèl na gôr’ôgènda wi dwaṉa gô garegare yaô.

¹¹ Ayè yi be bwat’ebende z’ôm’edu, e be dwaṉa fweva pa ntyugu ôrwageṉô.

¹² E be jombunyô ôkuṽi wè n’aṉingô miṉo gô ntyugu yi ntyarô na gô ntyugu y’ôrwageṉô, gambèṉè e be dwaṉa pupu; ndô ja ayombwa gô ntyugu yi ntyarô na gô ntyugu y’ôrwageṉô, gambèṉè alwaṉe nkèrè.

¹³ Ayè yi be bwat’ebende z’ôma wi re juwa pa, ko yè ayombunyô ôkuṽi wè, gambèṉè e fwevize nagô y’ikuku yi Yeôva; ôma mèwoṉo e be teṉô avila gôr’Israèl. Ga nt’ar’aṉingô m’ijombunya mi zele jirô pa gôre yè, yeṉo are fweva pa, n’ifwevi sè si pe dwaṉa gôre yè.

¹⁴ Nyiṉo ne ivanga. Jog’ôma ajuwa gô nagô y’ikuku, ôm’edu wi be jingiṉa gô nagô y’ikuku, n’ôm’edu wi be dèngô gô nagô y’ikuku, e be dwaṉa fweva pa ntyugu ôrwageṉô.

¹⁵ Evagw’edu zi re zange zi re zi zele n’ewôna pugô pa, zi be dwaṉa fweva pa.

¹⁶ Ôm’edu are gô ntyaga, wi be bwat’ebende z’ôma wi re jôṉô pa ne ôkwara w’iwora, ntyo ebende z’ôma, ntyo pa y’ômwôṉaga, ntyo ôrôngiṉô, e be dwaṉa fweva pa ntyugu ôrwageṉô.

¹⁷ Wi be bong’ômbu wi nyam̃a y’avezyô yi taṽe mpungu y’ibe, gôr’ôma wi re fweva pa, ko wô fwelô gw’aṉingw’ambya gw’evagw’em̃ori.

¹⁸ Ôm’ôm̃ori e be bonga yisop avundya yô gw’aṉingô; avila vovo e be nyènya mô gô nagô y’ikuku gô vagô yôdu gôr’aṉaga waôdu wi re gôgô, gôre yè wi re bwata pe pa, ntyo ôma wi re jôṉô pa, ntyo ebende z’ôma ntyo ôrôngiṉô.

¹⁹ Ayè yi re nkèrè ayè be nyènya gôre yè yi re fweva pa, gô ntyugu yi ntyarô na gô ntyugu y’ôrwageṉô ko yè jombunyè gô ntyugu y’ôrwageṉô. E be jôvuṉ’ingoy sè, ko yè sovuṉa gw’aṉingô; gambèṉè nkôlô, e be dwaṉe nkèrè.

²⁰ Ôma wi be dwaṉa fweva pa, ko yè ayombuny’ôkuṽi wè, e be teṉô avila gô garegare yi mandô, konde are fweviza pe mbôra y’ôrunda yi Yeôva; ga nt’ar’aṉingô m’ijombunya mi zele jirô pa gôre yè, yeṉo are fweva pa.

²¹ Nyi be dwaṉa gôre waô ivanga nya pèkèpèkè. Ayè yi be nyèny’aṉingô m’ijombunya e be jôvuṉ’ingoy sè, n’ayè yi be bwat’aṉingô m’ijombunya e be dwaṉa fweva pa kwange nkôlô.

²² Ezom̃’edu zi be bwat’ôma wi re fweva pa, zi be fweva, n’ôma wi be bwat’eza zi re fweva pa e be fweva kwange nkôlô.