Itangô 18 - Bibili 1927 (Omyene)

¹ N’awulinyi Yeôva Aarône inè: Awè n’awaṉi wo aṉôm̃e ni nagô ya reri yo na wè, aṉwè be dèng’ôrevuṉô w’ibe si janjô gô mbôra y’ôrunda; awè n’awaṉi wo aṉôm̃e na wè, aṉwè be dèng’ôrevuṉô w’ibe si janjô gw’eṽilô zi miṉisè.

² Vanga kè awareri yo gô sèvya pyèrè na wè, mbuṽe yi Levi, ni mbuṽe ya reri yo, ko waô kweṉa gôre wè ayanjiṉo, ndô awè n’awaṉi wo aṉôm̃e gô be dwaṉa ṉwè swaswo ni nagô y’ikuku yi re n’egara z’ampanga.

³ Wi be penjavenj’isam̃u yi be sômbyo waô ni yom̃a yi re gô nagô y’ikuku yôdu, ndô w’azèvya pyèrè ni yom̃a yi mbôra y’ôrunda, ge gô mbôra yi jirô intyagô aṉwè vende juwa waô na wè.

⁴ Wi be kwèṉa gôre wè, ko waô penjavenje yom̃a yi re gô ñanja y’idataṉa, gw’eṽilô zôdu zi nagô y’ikuku. Ôgèndy’edu azusa pyèrè na ṉwè.

⁵ Aṉwè be penjavenje yom̃a yi re gô mbôra y’ôrunda na gô mbôra yi jirô intyagô, ko alwaṉ’eguṉu vovo nyèṉè gôr’Israèl.

⁶ Vôna, my’are bonga p’awareri yaṉi Leviti avila gô garegare y’Israèl; wi re pô pa gôre Yeôva, wi re pa pa ṉwè mpagaga gô janj’eṽilô zi ñanja y’idataṉa.

⁷ Aṉwè n’awaṉi wo aṉôm̃e na wè, aṉwè be penjavenje ṽilô yaṉi yi miṉisè gw’ezom̃’edu zi re gô mbôra yi jirô intyagô na gw’ezom̃’edu zi re gô gare ntye y’ôṉamba wi re diṽiṉô pa: yô ne ṽilô yi be janjô ṉwè. Mi pa ṉwè mpagaga eṽilô zi miṉisè gô janja zô, n’ômbogy’edu wi be susa pyèrè na ṉwè e be juwa.

⁸ N’awulinyi Yeôva Aarône inè: Vôna, avila gô yom̃a yôdu y’ôrunda y’Israèl mi po yom̃a yi pô myè vo ntyagô y’itômbiṉa; mi pa yô gôre wè, gôre wè na gôr’awaṉi wo aṉôm̃e ga nt’ar’inyanga ny’isagyô, vo ivanga nya pèkèpèkè.

⁹ Yiṉo ne yom̃a yi be dwaṉa gôre wè avila gô yom̃a y’ôrund’ômpôlômè, yi re y’avezô ne ôgôṉi: intyagô saô sôdu si mpagaga, mpagagi yaô yôdu, intyagô saô sôdu s’ôraṽô wi mpungu y’ibe, n’intyagô sôdu si jirô g’ômwanja w’ôgara si be jiriṉa waô myè; yom̃a yiṉo y’ôrund’ômpôlômè yi be dwaṉa gôre wè na gôr’awaṉi wo aṉôm̃e.

¹⁰ Aṉwè be nya yô gô mbôra y’ôrund’ômpôlômè; ôṉôm̃y’edu e be nya gô yô; aṉwè be jeṉa yô ga ya y’ôrunda.

¹¹ Vôna yom̃a yi be tô dwaṉa gôre wè, yô ne mpagaga yôdu yi be pô ne Israèl vo ntyagô y’itômbiṉa ni ya yi piṉô g’ôzô wi Yeôva; mi pa yô gôre wè na gôr’awaṉi wo aṉôm̃e, na gôr’awaṉi wo antô na wè, vo ivanga nya pèkèpèkè. Ôm’edu wi be dwaṉe nkèrè gô nagô yo e be nya gô yô.

¹² Mi po ilônd’ilônga yi be jirô waô gôre Yeôva, avila gw’agali ambya, n’avila gw’ivè na gô bile.

¹³ Ôwongw’ôlônga wi ntye yaô, wi be bagô waô gôre Yeôva, wi be dwaṉa gôre wè. Ôm’edu wi be dwaṉe nkèrè gô nagô yo e be nya gô wô.

¹⁴ Ezom̃y’edu zi be degô n’ôrangô gôr’Israèl zi be dwaṉa gôre wè.

¹⁵ Injalyè s’izôṉe yôdu si be jirô gôre Yeôva, aṉôm̃e n’inyam̃a ta, si be dwaṉa gôre wè. Dadyè ô be danduṉe njalyè y’ôṉôm̃e, ko wè danduṉe njalyè yi nyam̃a y’isèkè.

¹⁶ Ô be danduṉ’avila g’ôṉèro w’agwèli, ga nt’are ntyagô yi re gô pô gô njôni y’isikèl si sika ya pupu ôtaṉè, ga nt’are sikèl yi mbôra y’ôrunda yi re agôm̃i m’igera ambaṉi.

¹⁷ Ndô alanduṉa du njalyè yi nyare nôm̃e, ge njalyè y’idombè, ge yi mbôṉi: sô ne ya y’ôrunda. Ô be nyènye ntyiṉa ya sô gô mbôra yi jirô intyagô, ko wè pez’agali ma sô; yi be dwaṉe ntyagô yi pezô ne ôgôṉi, yi nkangô mbya gôre Yeôva.

¹⁸ Izôṉe ya sô yi be dwaṉa gôre wè, ga nt’are ntôṉô yi piṉô g’ôzô wi Yeôva n’iṽèṉi nya numbu.

¹⁹ Intyagô sôdu s’ôrunda si pô ne Israèl gôre Yeôva vo ntyagô y’itômbiṉô, mi pa sô gôre wè na gôr’awaṉi wo aṉôm̃e na gôr’awaṉi wo antô na wè, vo ivanga nya pèkèpèkè. Yô ne njeka yi re y’avavô na y’egômbe zôdu g’ôzô wi Yeôva gôre wè na gôr’imbambi so na wè.

²⁰ N’awulinyi Yeôva Aarône inè: W’alènge du ijiga gô ntye yaô, w’alènge du mbèy gô garegare yaô; myè ne mbèy yo n’ijigi so gôr’Israèl.

²¹ Mi pa mbèy y’igôm̃i ga ijiga gôr’awaṉ’aṉôm̃e wi Levi waôdu gôr’Israèl, gw’eṽilô zi dendô waô, eṽilô zi ñanja y’idataṉa.

²² Israèl w’azèvya nyèṉè pyèrè gô ñanja y’idataṉa, waô vende twaṉ’ibe ayuwa.

²³ Leviti waô wi be dend’eṽilô gô ñanja y’idataṉa ko waô twaṉ’ibe saô. W’alènge du ijiga gô garegare y’Israèl; nyi be dwaṉ’ivanga nya pèkèpèkè gôr’imbambi saṉi.

²⁴ Mbèy y’igôm̃i yi pô ne Israèl gôre Yeôva vo ntyagô y’itômbiṉô, mi pa yô ga ijiga gôre Leviti; yeṉo mi bulya g’ômwanji waô inè, w’alènge du ijiga gô garegare y’Israèl.

²⁵ N’agambi Yeôva gôre Môsès, awulya inè:

²⁶ Ô be kamba gôre Leviti awulinya waô inè: Gô be bonga ṉwè avila gôr’Israèl mbèy y’igôm̃i yi pa ṉwè avila gôre waô ga nt’ar’ijigi saṉi, aṉwè be jire ntyagô gôre Yeôva, mbèy mori y’igôm̃i avila gô mbèy y’igôm̃i.

²⁷ Ni ntyagô yaṉi yi be tangô gôre ṉwè ga nt’ar’iputu si bongô avila gô mbôra yi tewô ilônda, na ga nt’ar’ivè nyi bongô avila gw’ivyariṉô ny’ivè.

²⁸ Yeṉo be jira ṉwè ntyagô gôre Yeôva gw’agôm̃i m’imbèy môdu mi be bongô ṉwè avila gôr’Israèl, ko ṉwè pa gôr’Aarône yi miṉisè ntyagô yi be jirô ṉwè gôre Yeôva.

²⁹ Gô mpagaga yôdu yi be pô ṉwè, aṉwè be jir’intyagô sôdu gôre Yeôva; gw’ezom̃’edu eṽyamè aṉwè be pange mbèy ya zô ôrunda.

³⁰ Ko bulinya waô inè: J’aṉw’ajire yom̃a ṽyamè, mbèy y’igôm̃i yi be tangô Leviti ga nt’are mbuṉi yi mbôra yi tewô ilônda, na ga nt’are mbuṉi yi mbôra y’ivyariṉô ny’ilônda.

³¹ Aṉwè be nya yô gô mbôry’edu, aṉwè n’inyômbi nyaṉi; konde yô ne ipi saṉi g’ômwanja w’eṽilô zi janjô ṉwè gô ñanja y’idataṉa.

³² Aṉw’arwaṉ’ibe gô be jira ṉwè yom̃a ṽyamè, awevizaṉi du intyagô s’ôrunda s’Israèl, ko aṉw’ayuwa du.