Itangô 17 - Bibili 1927 (Omyene)

¹ N’agambi Yeôva gôre Môsès, awulya inè:

² Gamba gôr’Israèl ko bong’itôngô avila gôre waô ga nt’ar’inagô s’ireri saô, yi ga lwaṉe igôm̃i ny’itôngô n’itôngô mbaṉi g’ômwanja w’ivangiṉi yaô yôdu ga nt’ar’inagô s’ireri saô.

³ Ô be tènd’ina ny’ôm’edu g’ôtôngô wè, ko tènd’ina ny’Aarône g’ôtôngô wi Levi; konde nkum̃u edu y’inagô s’ireri saô e be dwaṉa n’ôtông’ôm̃ori.

⁴ Ô be dimbiṉa yô gô ñanja y’idataṉa, swaswo n’egara z’ampanga, gô mbôra yi be dataṉa myè na ṉwè.

⁵ Ôṉôm̃e wi be pinjô myè ôtôngô wè wi be pangè gô tig’idagalaga g’ôzô waô si dagalagô n’Israèl gôre ṉwè.

⁶ N’agambi Môsès gôr’Israèl, n’ivangiṉi yaô yôdu y’aveṉi yè itôngô, ôvangiṉi edu ôtông’ôm̃ori, ga nt’ar’inagô s’ireri saô, y’alwaṉ’igôm̃i ny’itôngô n’itôngô mbaṉi; n’ôtôngô w’Aarône w’avegagi gô garegare y’itôngô yaô.

⁷ N’alimbiṉi Môsès itôngô g’ôzô wi Yeôva gô nagô y’ikuku yi re n’egara z’ampanga.

⁸ Bunya, gw’ayingiṉi Môsès gô nagô y’ikuku yi re n’egara z’ampanga, vôna, ôtôngô w’Aarône, gô nagô yi Levi, w’avunjiṉi ayaṉ’iṽya, awond’ilônda.

⁹ N’arômbi Môsès itôngô yôdu avila g’ôzô wi Yeôva, arwaṉa yô gôr’Israèl waôdu, inè, wi ga yeṉe yô, ko waô bong’ôm’edu ôtôngô wè.

¹⁰ N’awulinyi Yeôva Môsès inè: Wiṉiz’ôtôngô w’Aarône swaswo n’egara z’ampanga, gô penjavenjô ga elingilyô gôr’awaṉa w’ivavisi, ko wè panga waô gô tig’idagalagi saô g’ôzô wam̃ ko w’ayuwa du.

¹¹ N’alendi Môsès yeṉo; alendi yè ga nt’azômbyô yè ne Yeôva.

¹² N’Israèl w’awulinyi Môsès inè: Vôna azwè juwa, azwè pera, azwè pera azwèdu!

¹³ Ôm’edu wi susa pyèrè gô nagô y’ikuku yi Yeôva e juwa. Azwèdu azwè ga yuwe?