Itangô 16 - Bibili 1927 (Omyene)

¹ Kôre, y’ômwaṉ’ôṉôm̃e wi Yisear y’ômwaṉ’ôṉôm̃e wi Levi, avavi ayè ni Datan n’Abiram, awaṉ’aṉôm̃e w’Elyab ni On, y’ômwaṉ’ôṉôm̃e wi Pelèt, waôdu ararô awaṉ’aṉôm̃e wi Rubèn.

² N’agum̃aṉi waô gô sire Môsès, waô n’inkam̃a s’aṉôm̃e mbaṉi n’agôm̃i m’aṉôm̃e ataṉè m’Israèl, ivangiṉi yi mandô, avila gôre waô w’aweyô gô mandô, w’avegagi aṉaga w’anyanga.

³ N’alataṉi waô gôre Môsès na gôr’Aarône, awulinya waô inè: Atweṉi kwèkwè gôre ṉwè! konde mandô yôdudu y’atweṉi nkèrè ntevô, ni Yeôva are gô garegare yaô. Ntiṉa nde yi pendya ṉwè ikuṽi yaṉimè vyagaṉô gô mandô yi Yeôva?

⁴ Gw’ayogyô Môsès agamba miṉo, avur’ôzô wè mbè gô ntye.

⁵ N’agambi yè gôre Kôre na gôre nkumbi yè yôdu, inè: Mèṉè, gambèṉè Yeôva e be myeza waô wi re gôre yè na waô wi r’ôrunda ko yè sèvya waô pyèrè na yè: ôma wi be pinjô yè e be pangè gô sèvya pyèrè na yè.

⁶ Lendaṉi ziṉo. Wongaṉ’intyèngè, Kôre ni nkumbi yè yôdu.

⁷ Mèṉè ko fwelaṉ’ôgôṉi gô sô, ko fwelaṉi ya yi nkangô gô sô g’ôzô wi Yeôva, gambèṉè ôma wi be pinjô ne Yeôva, ayè be dwaṉ’ôrunda. Atweṉi kwèkwè gôre ṉwè, aṉwè, awaṉa wi Levi!

⁸ N’awulinyi Môsès Kôre inè: Sambô, vôganyôṉi, aṉwè awaṉa wi Levi!

⁹ Yi r’ôsam̃u ômwangômè gôre ṉwè inè, Anyambyè y’Israèl yi re ṉwè pinja pa avila gô mandô y’Israèl, gô sèvya ṉwè pyèrè na yè, ko ṉwè dôṽyô gw’eṽilô zi nagô y’ikuku yi Yeôva, na gôre ṉwè gô kum̃aṉa g’ôzô wi mandô gô janjiṉa yô?

¹⁰ Are sèvya pa ṉwè pyèrè na yè, awè n’awareri yo waôdu, awaṉa wi Levi, ko ṉwè tô but’eṽilô zi miṉisè!

¹¹ Yô ne ntiṉa yi re wè ni nkumbi yo yôdu dataṉa pa ta gôre Yeôva; konde ezande zi re n’Aarône, ko ṉwè dagalaga gôre yè?

¹² N’arôm̃i Môsès gô fweye Datan n’Abiram, awaṉ’aṉôm̃e w’Elyab. Ndô w’awulyi nè: Azw’avande.

¹³ Pa twa kwèkwè gôre wè kogunya pa zwè avila gô ntye yi pôv’ambèṉingô n’ôṉèmbè gô jôṉiza zwè gw’itôve, gambèṉè ô be buta gô pangiṉa zwè?

¹⁴ Na yiṉo arange ntye yi pôv’ambèṉingô n’ôṉèmbè yi re wè baga pa zwè, siṉo arang’intyaga n’igoli yi re wè pa pa zwè gô niva. Ô pikilya gô nim̃’antyo m’aṉaga wiṉo? Azw’avande.

¹⁵ N’aṽendi Môsès pôlô, n’awulinyi yè Yeôva inè: Avôna du gô ntyagô yaô. Mi pa bongiṉa waô vangaṉe buru mori, na mi pa dende mbe gôr’ôm’edu gôre waô.

¹⁶ N’awulinyi Môsès Kôre inè: Awè ni nkumbi yo yôdu wôm̃unyaṉi mèṉè g’ôzô wi Yeôva, awè na waô n’Aarône ta.

¹⁷ Wongaṉi ôm’edu ntyèngè yè, welaṉi ya yi nkangô gô yô, ko bôm̃unyaṉi g’ôzô wi Yeôva ôm’edu ni ntyèngè: e be dwaṉa nkam̃a s’intyèngè mbaṉi n’agôm̃i m’intyèngè ataṉè, gambèṉè awè n’Aarône aṉwè be bonga kè ôm’edu ntyèngè yè.

¹⁸ N’awongi waô ôm’edu ntyèngè yè, aweli waô ôgôṉi gô yô, aralye ya yi nkangô gô yô, n’agum̃aṉi waô g’ômpômbala wi ñanja y’idataṉa ta ni Môsès n’Aarône.

¹⁹ N’alatizi Kôre mandô yôdu gôre Môsès n’Aarône g’ômpômbala wi ñanja y’idataṉa. N’awôm̃uny’ônjèlènjèlè wi Yeôva gôre mandô yôdu.

²⁰ N’agambi Yeôva gôre Môsès na gôr’Aarône inè:

²¹ Rômbaṉ’ikuṽi yaṉi avila gô garegare yi mandô yiṉo, ko mi jiliza waô vo igamba ny’agwaṉa.

²² N’avuri waô azô maô mbè gô ntye, awulya inè: Anyambyè, Anyambyè y’aṉiṉa m’izôṉe yôdu! ôm’ôm̃ori dadyè ayè re fwem̃a pa, gambèṉè ô bendiṉe mandô yôdu?

²³ N’agambi Yeôva gôre Môsès inè: Gamba gôre mandô, awulya inè:

²⁴ Lubwaṉi bô avila gô nkumba yôdu yi Kôre, yi Datan n’Abiram.

²⁵ N’agum̃aṉi Môsès agènda gôre Datan n’Abiram, n’aṉèro w’Israèl w’azôngi yè.

²⁶ N’agambi yè gôre mandô, awulya inè: Zanjiṉaṉ’ikuṽi yaṉi avila gw’inagô s’akuku s’aṉôm̃e aṽe wiṉo, ko awataṉi yom̃i yaô, aṉwè vende jôṉô gw’egômbe mè zi be tevuṉô waô g’ômwanja w’ibe saô sôdu.

²⁷ N’alubwi waô bô avila gw’inkumba sôdu si Kôre, si Datan na s’Abiram. Datan n’Abiram w’agogwi agum̃aṉa g’ômpômbala w’inagô saô s’akuku, waô n’antô waô, n’awaṉi waô aṉôm̃e, n’awaṉi waô arumbe ta.

²⁸ N’awulyi Môsès inè: G’ôsam̃u wiṉo aṉwè be mya inè, Yeôva ayè are tôm̃a pa myè gô dend’isam̃u yiṉo yôdu, na inè mi pa janja yô myèmè.

²⁹ J’aṉaga wiṉo w’ajuwa ga nte juw’aṉaga waôdu ge ja w’ajeṉ’azingô ga nte jeṉ’aṉaga waôdu, gambèṉè Yeôva azele tôm̃a pa myè;

³⁰ ndô ja Yeôva adend’ôsam̃u ômwoṉa gôre ntye gô nunguṉ’ôgwaṉi wè gô mèṉa waô ni yom̃a yôdu yi re na waô, ko waô sum̃iṉa bo gô dwaṉa gôre mongi wi re juwa pa, gambèṉè aṉwè be mya inè, aṉaga wiṉo wi re pèdya pe Yeôva.

³¹ Gw’am̃èṉizi yè ikamb’agamba miṉo môdu, ntye y’avegagô waô jara pa y’ayarwi bwa.

³² Ntye y’aṉunguṉ’ôgwaṉi wè, am̃èṉa waô n’inagô saô n’aṉaga wi Kôre waôdu n’igumbi nyaô nyôdu.

³³ N’azum̃iṉi waô bo gô dwaṉa gôre mongi wi re juwa pa, waô ni ya yôdu y’avegagi na waô; m’avugyô waô ne ntye, ko waô niṉa avila gô garegare yi mandô.

³⁴ N’Israèl waôdu w’avegagi vingôvingô waô, w’awangi gw’arôngi waô, konde w’awulyag’inè: Azwè ga wangeṉi, ntye yi vende mèṉa zwè.

³⁵ N’agogw’ôgôṉi avila gôre Yeôva, ayôṉ’inkam̃a s’aṉôm̃e mbaṉi n’agôm̃i m’aṉôm̃e ataṉè w’ayiri ya yi nkangô.

³⁶ N’agambi Yeôva gôre Môsès, awulya inè:

³⁷ Wuliny’Eleazar, y’ômwaṉ’ôṉôm̃e w’Aarône yi miṉisè inè, e ga rômb’intyèngè avila g’ôgôṉi ko yè pazangaṉ’ôgôṉi bô, konde wi r’ôrunda.

³⁸ N’intyèngè s’aṉaga mè wi re fwem̃a pa vanga, si ga vangô pônga yi be pugiṉe mbôra yi jirô intyagô. Sô jirô pa g’ôzô wi Yeôva, na sô pangô p’ôrunda, gambèṉè si be dwaṉ’ôyônginyô gôr’Israèl.

³⁹ N’Eleazar, yi miṉisè, awong’intyèngè si nyènyè s’ayiryô ne mongi w’avezyô ne ôgôṉi, n’avangi yè sô pônga gô pugiṉe mbôra yi jirô intyagô.

⁴⁰ Wô ne ôyônginyô gôr’Israèl, inè, ko ôgèndy’edu wi re wi zele gô mbuṽe y’Aarône azusa pyèrè gô jire ya yi nkangô g’ôzô wi Yeôva ko yè alwaṉa ga Kôre n’egolaṉi ga nkumbi yè, ga nt’are Yeôva myeza pa vo Môsès.

⁴¹ Ndô bunya mandô yôdu y’Israèl y’alagalagi gôre Môsès na gôr’Aarône, awulya inè: Aṉw’are panga pa gô jôṉ’iṉongo nyi Yeôva.

⁴² N’alataṉi mandô gôre Môsès na gôr’Aarône, na gw’agegwi waô gô pôna gô ñanja y’idataṉa, vôna, evindi z’aliṽiṉi yô, n’awôm̃uny’ivenda nyi Yeôva.

⁴³ N’aṽyeṉi Môsès n’Aarône swaswo ni ñanja y’idataṉa.

⁴⁴ N’agambi Yeôva gôre Môsès, awulya inè:

⁴⁵ Lubwaṉi avila gô garegare yi mandô yiṉo, ko mi jiliza yô vo igamba ny’agwaṉa.

⁴⁶ N’avuri waô azô maô mbè gô ntye; n’awulinyi Môsès Aarône inè: Wonge ntyèngè ko fwel’ôgôṉi gô yô avila g’ôlômba wi mbôra yi jirô intyagô, aralye ya yi nkangô gô yô ko kènde nèganèga gôre mandô, av’ôraṽô wi mpungu y’ibe; konde eguṉu zi Yeôva zi re bya pa, evunga zi re pakilya pa.

⁴⁷ N’awongi Aarône ntyèngè, ga nt’awulyi Môsès, n’avali yè mangô gô garegare yi mandô; na vôna, evunga z’aliwô z’avakilyi gôr’iṉongo. N’ayiri yè ya yi nkangô, av’ôraṽô wi mpungu y’ibe g’ômwanja w’iṉongo.

⁴⁸ N’agum̃aṉi yè ntyo bende y’aṉaga wi re juwa pa n’aṉaga wi re bo, n’am̃aṉ’evunga.

⁴⁹ Waô w’ayuwi n’evunga ziṉo w’avegagi igôm̃i ny’intozèny s’aṉaga n’intozèny s’aṉaga nay n’inkam̃a s’aṉag’ôrwageṉô, tômbare pa waô w’ayônyô g’ômwanja wi Kôre.

⁵⁰ N’awinyi Aarône gôre Môsès g’ômpômbala wi ñanja y’idataṉa. N’am̃èṉizô evunga.