Itangô 15 - Bibili 1927 (Omyene)

¹ N’agambi Yeôva gôre Môsès inè:

² Gamba gôr’Israèl, awulinya waô inè: Gô be jinginya ṉwè gô ntye yi pa myè ṉwè gô dwaṉiz’alwaṉô maṉi vovo,

³ ko ṉwè jiriṉe Yeôva ntyagô yi pezô ne ôgôṉi, y’adwaṉe ntyagô yi pezô mbya, y’adwaṉe ntyagô y’idwaṉiza s’ôrangô mbya, ge y’adwaṉe ntyagô yi mpagaga mbya, ge gw’ifèti saṉi mbya, gô panga n’inyam̃i saṉi impôlô ntyo inyam̃i saṉi inyangô ntyagô yi nkangô mbya gôre Yeôva,

⁴ ayè yi be jire ntyagô yè gôre Yeôva e be jira gô ntyagô yi mpagaga mbèy y’igôm̃i yi farinya mbya bindô pa gw’ereṉe zi nay zi in y’agali,

⁵ ko wè jira gô ntyagô y’ijonga ereṉe zi nay zi in y’ivè, ô be jira yô ta ni ntyagô yi pezô ntyo gô ntyagô, vo ômwidomby’edu.

⁶ Gôr’idombè iṉôm̃e, ô be jira gô ntyagô yi mpagaga mbèy mbaṉi s’igôm̃i si farinya mbya bindô pa gw’ereṉe zi rarô zi in y’agali,

⁷ ko wè jira gô ntyagô y’ijonga ereṉe zi rarô zi in y’ivè, ga ntyagô yi mpagaga yi nkangô mbya gôre Yeôva.

⁸ Ja w’ajir’ômwaṉa wi nyare ga gô ntyagô yi pezô mbya, ga gô ntyagô y’idwaṉiza s’ôrangô mbya ntyo ga ntyagô y’akeṽa gôre Yeôva mbya,

⁹ gambèṉè e be jirô ômwaṉa wi nyare gô ntyagô yi mpagaga, mbèy ntyarô s’igôm̃i si farinya mbya bindô pa gw’ereṉe zi in y’agali,

¹⁰ ko wè jira gô ntyagô y’ijonga ereṉe zi in y’ivè: yô ne ntyagô yi pezô ne ôgôṉi, yi nkangô mbya gôre Yeôva.

¹¹ E be jirô kè gô nyary’edu nôm̃e, gw’idomby’edu iṉôm̃e, gw’idomb’inyangw’edu ge imbôṉi.

¹² Ga nt’are ntangô y’inyam̃a si jirô ntyagô, yeṉo be jira ṉwè gôr’ôm’edu, ga nt’are ntangô ya sô.

¹³ Ôlwaṉi edu e be dend’isam̃u yiṉo kè, gô be jirè ntyagô yi pezô ne ôgôṉi yi nkangô mbya gôre Yeôva.

¹⁴ J’ôgènda wi dwaṉa gôre ṉwè, ge nkangaṉaga gô garegare yaṉi, ajire ntyagô yi pezô ne ôgôṉi yi nkangô mbya gôre Yeôva, gambèṉè e be jira ga nte jira ṉwè.

¹⁵ E be dwaṉa vovo ivang’im̃ori dadyè gôre mandô yôdu, gôre ṉwè na gôr’ôgènda wi dwaṉa gô garegare yaṉi; nyiṉo nyi be dwaṉ’ivanga nya pèkèpèkè gôr’imbambi saṉi; ôgènda e be dwaṉa ga ṉwè g’ôzô wi Yeôva.

¹⁶ E be dwaṉa vovo ivang’im̃ori dadyè n’ôzômbyô ôm̃ori dadyè gôre ṉwè na gôr’ôgènda wi dwaṉa gôre ṉwè.

¹⁷ N’agambi Yeôva gôre Môsès, awulya inè:

¹⁸ Gamba gôr’Israèl, awulya inè: Gô be bya ṉwè gô ntye yi be jinginya myè ṉwè,

¹⁹ ko ṉwè ny’inya si ntye mè, ko aṉwè jire ntyagô yi mpagaga gôre Yeôva.

²⁰ Aṉwè be jira vo ntyagô yi tômbiṉ’ôlega ni mpèmbi yaṉi nônga; aṉwè be jira yô ga ntyagô yi mpagaga yi bongô avila gô mbôra yi tèwô ilônda.

²¹ Aṉwè be tômbiṉa gôre Yeôva ntyagô yi mpèmbi yaṉi nônga, gô gômbe yi bya.

²² Jog’aṉw’afwem̃a njelaga, ko ṉwè avenjavenj’ampanga miṉo môdu mi re Yeôva myeza pa gôre Môsès,

²³ isam̃u yôdu yi re Yeôva sômbya pa ṉwè vo Môsès avila gô ntyugu y’aveṉi Yeôva ampanga na kwanga gô gômbe yi bya;

²⁴ j’afwem̃ô njelaga ko mandô y’amya, gambèṉè mandô yôdu yi be jir’ômwaṉa wi nyare gô ntyagô yi pezô yi nkangô mbya gôre Yeôva, ni ntyagô yi mpagaga na y’ijonga, ga nt’are sômbyô pa, yi be tô jire mbôṉi nôm̃e gô ntyagô y’ôraṽô wi mpungu y’ibe.

²⁵ Miṉisè yi be p’ôraṽô wi mpungu y’ibe gôre mandô yôdu y’Israèl, ko yè nyeza waô, konde wi re fwem̃a pa njelaga, na waô wi re baga pe ntyagô yaô, ntyagô yi pezô n’ôgôṉi gô dube Yeôva, ni nyam̃a mori yi jirô ntyagô yi taṽe mpungu y’ibe g’ôzô wi Yeôva, g’ômwanja w’ibe si re waô janja pa njelaga.

²⁶ E be nyeze mandô yôdu y’Israèl na gôr’ôgènda wi dwaṉa gô garegare yaô, konde iṉongo nyôdu nyi re fwem̃a pa n’ijela.

²⁷ J’ôm’ôm̃ori dadyè ayè are fwem̃a pa n’ijela, gambèṉè, e be jire mbôṉi nyantô y’ômpum̃’ôm̃ori gô ntyagô yi jirô g’ômwanja w’ibe.

²⁸ Miṉisè yi be p’ôraṽô wi mpungu y’ibe g’ômwanja w’ôma wi re fwem̃a pa n’ijela g’ôzô wi Yeôva; gô be pè ôraṽô wi mpungu y’ibe g’ômwanji wè, gambèṉè e be nyezè.

²⁹ G’ômwanja w’ôlwaṉi wi re gôr’Israèl na g’ômwanja w’ôgènda wi dwaṉa gô garegare yaô, e be dwaṉ’ivanga mèmô gôre ṉwè, j’afwem̃a ôma njelaga.

³⁰ Ndô j’ôm’edu, ôlwaṉi ge ôgènda, adend’ôsam̃u n’ôgo nyo gw’igôṉô, gambèṉè e pèdye Yeôva; ôma mèwoṉo e be teṉô avila gô garegare y’iṉongo nyè.

³¹ Are pèdya p’igamba nyi Yeôva, are pava p’ôzômbyô wè; ôma mèwoṉo e be teṉô ko yè dèng’ôrevuṉô w’ibe sè.

³² Gw’avegag’Israèl gw’itôve, w’alèng’ôṉôm̃e w’avutag’isakilya gô ntyugu y’ijowa.

³³ Waô w’alèngi yè mbutag’isakilya w’aṽagi yè gôre Môsès na gôr’Aarône na gôre mandô yôdu.

³⁴ N’aweli waô yè gô ntyôgô konde nt’avegagi gô dendô gôre yè yi re diwô myezô.

³⁵ N’awulinyi Yeôva Môsès inè: ôma mèwoṉo e ga yôṉô, mandô yôdu yi ga vunge yè adô gw’igala ny’ôlakô.

³⁶ N’agogunyô yè ne mandô yôdu avila g’ôlakô avungè adô, n’ayuwi yè, ga nt’azômbyi Yeôva Môsès.

³⁷ N’awulinyi Yeôva Môsès inè:

³⁸ Gamba gôr’Israèl, awulinya waô inè, wi ga vange kwanga gw’ampôm̃a n’ampôm̃a anyègè gw’igômbiṉô y’ingoy saô, ko waô fwel’ôgoli w’ôsolomèngèlè gw’anyègè mèmoṉo m’igômbiṉô y’ingoy saô.

³⁹ Gô be dwaṉa ṉwè n’anyègè mèmoṉo aṉwè be pôna mô, ko ṉwè jônginy’ampanga mi Yeôva môdu gô denda mô, ko ṉwè azông’ijônguṉa s’irèm̃i yaṉi na s’antyo maṉi ko ṉwè kèndyô ne itwaṽekelya.

⁴⁰ Aṉwè be jônginya kè ampangi mam̃, ko ṉwè denda mô, ko ṉwè dwaṉ’ôrunda gôr’Anyambyè yaṉi.

⁴¹ Myè ne Yeôva, Anyambyè yaṉi, y’agogunyi ṉwè avila gw’Egipt gôre myè gô dwaṉ’Anyambyè yaṉi. Myè ne Yeôva, Anyambyè yaṉi.