Itangô 14 - Bibili 1927 (Omyene)

¹ Mandô yôdu y’arômbiṉ’inyôy nyaô arônga, n’aleṉi aṉaga ôgwèra mè.

² N’Israèl waôdu w’alagalagi gôre Môsès na gôr’Aarône, ni mandô yôdu y’awulyi nè: Toto azwè ayuwe gw’Egipt, ge toto azwè ko juwa gw’itôve siṉo?

³ Ntiṉa nde y’aṽagyô zwè ne Yeôva gô ntye yiṉo, gôre zwè gô juwa n’ôkwara w’iwora gôr’antô wazô n’awaṉi wazô arumbe gô dwaṉ’im̃aṉô? E zele kwèkwè gôre zwè gô fwinya gw’Egipt?

⁴ N’awulyaṉi waô na waô inè: Azwè ga wuteṉ’egogi, ko zwè fwinyaṉi gw’Egipt.

⁵ N’avôsunyi Môsès n’Aarône azô maô gô ntye, gw’azô mi mandô yôdu y’alataṉi y’Israèl.

⁶ Na gôre waô w’agèlagèli ntye, Yôsua, y’ômwaṉ’ôṉôm̃e wi Nun, ni Kalèb, y’ômwaṉ’ôṉôm̃e wi Yefune, w’ayôkuṉ’ingoy saô,

⁷ n’agambi waô kè gôre mandô yôdu y’Israèl inè: Ntye y’agèndyô zwè gô kèlagèla yi re ntye mbya pôlômè.

⁸ Ja Yeôva apôgiṉa zwè, gambèṉè e be kèndya zwè gô ntye mè ko yè pa yô gôre zwè; yô ne ntye yi pôv’ambèṉingô n’ôṉèmbè.

⁹ Dadyè avavaṉi du Yeôva ko aryaṉi du aṉaga wi ntye mè, konde wi be dwaṉ’inya gôre zwè; wi zele nyèṉè n’iviri gô diṽiṉa waô, Yeôva are na zwè, sambô aryaṉi du waô.

¹⁰ Ndô mandô yôdu y’agamb’inè, wi ga vungô adô gw’awôm̃uny’ônjèlènjèlè wi Yeôva gô ñanja y’idataṉa, gw’azô môdu m’Israèl.

¹¹ N’awulinyi Yeôva Môsès inè: Iṉongo nyiṉo nyi be pèdya myè ôlingô sè? Ôlingô sè wi be dwaṉa waô ibekelya fo gôre myè, g’ômwanja w’isam̃u yi mamô yôdu yi re myè denda pa gô garegare yaô?

¹² Mi be bôla waô ne evunga, ko mi jiliza waô; ndô mi be panga gôre wè iṉongw’ivôlômè na nyi ngulu mpôlô vyagaṉô na waô.

¹³ N’awulinyi Yeôva Môsès inè: Mongi Egipt wi be jogo nyô konde w’avandiz’iṉongo nyiṉo ni ngulu yo avila gô garegare yaô;

¹⁴ gambèṉè wi be bulinya nyô alwaṉi wi ntye yiṉo. Wi re mya pa inè, awè ne Yeôva, awè ô re gô garegare y’iṉongo nyiṉo, ko wè bôm̃uny’ôzô wo zange, awè ne Yeôva; ko evindi zo kum̃aṉa gôre waô, ko wè kènda gô bôsô yaô ôm̃anda gw’im̃èngo ny’evindi, n’ôgwèra gw’im̃èngo ny’ôgôṉi.

¹⁵ Ja w’ajôṉ’iṉongo nyiṉo ga ôm’ôm̃ori dadyè, gambèṉè aṉongo mi re jogo p’elumi zo mi be bulya inè:

¹⁶ Yeôva e re pegage ni ngulu yi bag’iṉongo nyiṉo gô ntye y’arangyô yè ôrangô gô pa waô; yeṉo ajôṉè waô gw’itôve.

¹⁷ Ndô vèṉo, ngulu yi Yeôva yi ga rum̃inyô gô mpendiṉi yè, ga nt’awulyi yè inè:

¹⁸ Yeôva e re sunge benda, are ni nkèngo mpôlô, e nyez’ibe n’ipava; ndô e pa jeṉa du ôma wi r’ôgara ga ôma wi re mbèm̃, ntevuṉag’ibe s’irerè gôr’awaṉa kwanga gw’ivôm̃a ny’ararô na ny’anay.

¹⁹ Nyez’ibe s’iṉongo nyiṉo, ga nt’are wè nyeza p’iṉongo nyiṉo avila gw’Egipt kwanga vèṉo.

²⁰ N’awulyi Yeôva inè: mi nyeza ga nt’are wè bambya pa.

²¹ Ndô ga nt’are myè bo ivenda nyi Yeôva nyi be jônye ntye yôdu.

²² Waôdu wi re jeṉa p’ivendi nyam̃, n’isam̃u yi mamô yi re myè denda pa gw’Egipt na gw’itôve, wi re demba pa myè vèṉo igôm̃i nyi nyongo, ko w’avôganyô inyôy nyam̃.

²³ Waôdu wi re vovo w’ayeṉe du ntye yi re myè tanga p’ôrangô gôr’ireri saô gô pa waô, waôdu wi re pèdya pa myè w’ayeṉe yô.

²⁴ Ndô konde nè nyôngô yam̃ Kalèb are pô p’iṉiṉi nyèṉè, ko yè sônge mpoṉo yam̃ mbyambye, mi be pangè gô jingiṉa gô ntye y’agèndyô yè n’imbambi sè si be niva yô.

²⁵ Mongi Amalèk ni mongi Kanaan wi dwaṉa g’ôdèdè: mèṉè winyaṉi, ko kèndaṉi gw’itôve gô mpoṉo yi mbeṉe mbondi.

²⁶ N’agambi Yeôva gôre Môsès na gôr’Aarône inè:

²⁷ Ôlingô sè wi be tiga myè mandô mbe yiṉo yi dagalaga gôre myè? my’are jogo p’idagalaga s’Israèl si dagalagô waô gôre myè.

²⁸ Wulinya waô inè: Ga nt’are myè bo, bulye Yeôva, mi be dendiṉa ṉwè kè ga nt’are ṉwè kamba pa gw’arôy mam̃.

²⁹ Bende yaṉi yi be pôswa gw’itôve siṉo. Aṉwè du yi re tangô pa ga nt’arangyô ṉwè avila g’ôṉèro w’agôm̃i m’impum̃’ambaṉi na vyagaṉô na vovo, ko waô dagalaga gôre myè,

³⁰ aṉw’ayingiṉe du gô ntye y’arangyô myè ôrangô gôre ṉwè gô dwaṉa, kaô Kalèb y’ômwaṉ’ôṉôm̃e wi Yefune, ni Yôsua, y’ômwaṉ’ôṉôm̃e wi Nun.

³¹ N’awaṉi waṉi arumbe wi re ṉwè bulya pa inè, wi be dwaṉ’im̃aṉô! mi be panga waô gô jingiṉa gô yô ko waô myè ntye yi re ṉwè pèdya pa.

³² Bende yaṉi gôre ṉwè yi be pôswa gw’itôve,

³³ n’awaṉi waṉi wi be bôlangaṉa gw’itôve agôm̃i m’impum̃’anay, alèng’ôrevuṉô w’itwaṽekelyi saṉi, kwanga bende yaṉi y’apôsunyô gw’itôve.

³⁴ Ga nt’agèlagèli ṉwè ntye n’agôm̃i m’intyugu anay, yeṉo kè aṉwè be dèng’ôrevuṉô w’ibe saṉi agôm̃i m’impum̃’anay, ômpum̃’ôm̃ori ni ntyugu ngu; n’aṉwè be mya eza zi re tômbô pa avila g’ôzô wam̃.

³⁵ Myè Yeôva, my’are kamba pa, na yeṉo kè mi be dendiṉe mandô mbe yiṉo y’adataṉi gô sira myè: wi be jilizô gw’itôve siṉo, wi be juwa gôgô.

³⁶ Aṉôm̃e w’arôm̃yô ne Môsès gô kèlagèle ntye, na waô gw’awinyi waô, w’avangi mandô yôdu gô dagalaga gôre yè, mbagage ntyangô mbe g’ômwanja wi ntye;

³⁷ aṉôm̃e mèwoṉo w’aṽagi ntyangô mbe g’ômwanja wi ntye, w’ayuwi n’evunga g’ôzô wi Yeôva.

³⁸ Ndô Yôsua, y’ômwaṉ’ôṉôm̃e wi Nun, ni Kalèb, y’ômwaṉ’ôṉôm̃e wi Yefune, waô dadyè w’arigaṉi bo avila gôr’aṉôm̃e w’avili gô kèlagèle ntye.

³⁹ N’arakilyi Môsès agamba miṉo gôr’Israèl waôdu, n’ayeṉ’aṉaga ekèṽ’evôlômè.

⁴⁰ N’aṉongwi waô ibanga sôdu, avanda gw’esôsôlô zi nômba, awulya inè: Vôna, azwè wiṉo! azwè be panda gô mbôra yi re Yeôva pangaṉa pa, konde azw’are fwem̃a pa.

⁴¹ N’awulyi Môsès inè: Ntiṉa nde yi pava ṉwè ôzômbyô wi Yeôva? Konde w’agende du mbyambye.

⁴² Avandaṉi! konde Yeôva azele gô garegare yaṉi.

⁴³ Konde mongi Amalèk na mongi Kanaan wi re gô bôsô yaṉi, n’aṉwè be jôṉô n’ôkwara w’iwora, konde nè aṉwèmè aṉw’afwinyi ni nyum̃a avila gôre Yeôva, sambô Yeôva alwaṉe du na ṉwè.

⁴⁴ N’agenji waô gô panda gw’esôsôlô zi nômba; ndô egara zi njeka ni Môsès wi pa kogwa du avila g’ôlakô.

⁴⁵ Vovo azum̃iṉi mongi Amalèk ni mongi Kanaan w’alwaṉagi gô nômba mèyoṉo; n’aṉweṉi waô n’Israèl, n’ayônyô waô kwanga gô Orma.