Itangô 13 - Bibili 1927 (Omyene)

¹ N’agambi Yeôva gôre Môsès, awulya inè:

² Rôm̃’aṉôm̃e gô kèlagèle ntye yi Kanaan, yi pô myè gôr’Israèl. Ô be tôm̃’ôṉôm̃e avila gô mbuṽy’edu y’ireri saô; waôdu wi be dwaṉ’ivangiṉi gôre waô.

³ N’arôm̃yô waô ne Môsès avila gw’itôve si Paran, ga nt’ar’ôzômbyô wi Yeôva; aṉôm̃e waôdu w’avegagi gogi gôr’Israèl.

⁴ Miṉo ne ani maô. Gô mbuṽe yi Rubèn: Samua, y’ômwaṉ’ôṉôm̃e wi Zakur.

⁵ Gô mbuṽe yi Simeôn: Safat, y’ômwaṉ’ôṉôm̃e w’Ori.

⁶ Gô mbuṽe yi Yuda: Kalèb, y’ômwaṉ’ôṉôm̃e wi Yefune.

⁷ Gô mbuṽe y’Isakar; Yigal, y’ômwaṉ’ôṉôm̃e wi Yôsèf.

⁸ Gô mbuṽe y’Efrayim: Ôze, y’ômwaṉ ôṉôm̃e wi Nun.

⁹ Gô mbuṽe yi Benyamin: Palti, y’ômwaṉ’ôṉôm̃e wi Rafu.

¹⁰ Gô mbuṽe yi Zabulôn: Gadyèl, y’ômwaṉ’ôṉôm̃e wi Sodi.

¹¹ Gô mbuṽe yi Yôsèf, ni mbuṽe yi Manase: Gadi, y’ômwaṉ’ôṉôm̃e wi Susi.

¹² Gô mbuṽe yi Dan: Amyèl, y’ômwaṉ’ôṉôm̃e wi Gemali.

¹³ Gô mbuṽe y’Asèr: Setur, y’ômwaṉ’ôṉôm̃e wi Mikaèl.

¹⁴ Gô mbuṽe yi Nèftali: Nasbi, y’ômwaṉ’ôṉôm̃e wi Vofsi.

¹⁵ Gô mbuṽe yi Gad: Geuèl, y’ômwaṉ’ôṉôm̃e wi Maki.

¹⁶ Miṉo ne ana m’aṉôm̃e w’arôm̃yô ne Môsès gô kèlagèle Kanaan. N’aṽèti Môsès ina: Ôze, y’ômwaṉ’ôṉôm̃e wi Nun, inè, Yôsua.

¹⁷ N’arôm̃yô waô ne Môsès gô kèlagèle Kanaan. N’awulinyi yè waô inè: Vandaṉi vèṉo ni mpoṉo yi Sud, ko pandaṉi gô nômba.

¹⁸ Aṉwè be jeṉe ntye ga nt’are yô, n’aṉaga wi dwaṉa gô yô, twa pa wi r’aṉag’ayoli, ntyo aṉag’alèli, twa pa wi r’awèwo ntyo awenge;

¹⁹ ga nt’are ntye yi dwaṉô waô, twa pa yi re mbya ntyo yi re mbe; ga nt’ar’inkala si dwaṉô waô, twa pa si re zange ntyo si re nôgô pa n’ikômba;

²⁰ ga nt’are ntye, twa pa yi re n’ôrumba ntyo yi re nkele, twa pa gôgô are rere ntyo yi zele du. Lwaṉaṉi ṽèmba, ko bongaṉ’ilônda yi ntye. Z’avegag’egômb’elônga zi bonda n’ilônda yi pang’ivè.

²¹ N’avandi waô ko waô kèlagèle ntye avila gw’itôve si Sin kwanga gô Reob, gô mpoṉo yi kènda gw’Amat.

²² W’avandi ni mpoṉo yi Sud, n’agèndi waô kwanga gw’Ebron, mbôra y’avegagi Ayiman, Sesay ni Talmay, awaṉa w’Anak. Ebron y’aliwô nôgyô ômpum̃’ôrwageṉô Sôam ṉôgagô ro gw’Egipt.

²³ Aṽyeṉi waô kwanga g’ôdèdè w’Esikol, mbôra y’areṉi waô ivari ny’ôgoli n’ekôlô z’ilônda yi pang’ivè, w’aṽagi zô sôṉô pa gô ntôngô arwaṉô n’aṉôm̃e aṽaṉi; w’awongi kè igarnata n’ifigi.

²⁴ N’aṽètyô ina nyi mbôra mè inè: ôdèdè w’Esikol, g’ômwanja w’ekôlô z’ilônda z’arenyô ne Israèl vovo.

²⁵ W’awinyi avila gw’ikèlagèla si ntye gw’isula s’agôm̃i m’intyugu anay.

²⁶ Gw’aṽyeṉi waô w’agèndi gôre Môsès na gôr’Aarône, na gôre mandô yôdu y’Israèl, gô Kadès gw’itôve si Paran. N’awunguṉi waô intyangô gôre waô, kwanga kè gôre mandô yôdu, n’arum̃inyi waô ilônda yi ntye gôre waô.

²⁷ Vôna, ga nt’arakilyi waô gôre Môsès inè: Azw’agèndi gô ntye y’arôm̃i wè zwè. Rèti yô ne ntye yi pôv’ambèṉingô n’ôṉèmbè, na yiṉo ne ilônda ya yô.

²⁸ Ndô aṉaga wi dwaṉa gô ntye mè wi r’aṉaga wi ngulu, inkala si re nôgô pa n’ikômba ipôlômè; vangaṉe awaṉa w’Anak azwè ayeṉi waô gôgô.

²⁹ Mongi Amalèk wi dwaṉa gô ntye yi Sud; mongi Èti ni mongi Yebusi ni mongi Amôre wi dwaṉa gô nômba; ni mongi Kanaan wi dwaṉa pyèrè ni mbeṉe na gw’izamba yi Yoridan.

³⁰ N’awongi Kalèb iṉongo ny’alagalagi gôre Môsès. N’awulyi yè inè: Azwè ga vandeṉi pelè, ko zwè nive ntye, azwè be dwaṉa vovo igeṽisi!

³¹ Ndô aṉôm̃e w’avili na yè w’awulyi nè: Azw’ayolye gô panda gôr’aṉaga mè, konde wi r’ayoli vyagaṉô na zwè.

³² N’aṽagi waô gw’azô m’Israèl ntyangô mbe g’ômwanja wi ntye y’agèlagèlô waô. N’awulyi waô inè: Ntye y’agèndyô zwè gô kèlagèla yi re ntye yi nya alwaṉi wa yô; aṉaga waôdu w’ayenyô zwè gôgô wi r’aṉôm̃e w’agôṉ’ala.

³³ N’azw’ayeṉi gôgô aṉag’ala, awaṉa w’Anak, avila gô mbuṽe y’aṉag’ala n’avôlô; azw’avegagi gw’antyo mazômè na gw’imaô ga isakampazô.