Itangô 12 - Bibili 1927 (Omyene)

¹ Marya n’Aarône w’agambagambi gôre Môsès g’ômwanja w’ômwantô w’Etyop w’ayômbyô yè, konde alivô ajômbi ômwantô w’Etyop.

² N’awulyi waô inè: Yeôva e kamba dadyè kaô ni Môsès? e pa kamba kè na zwè? N’ayogyô nyô ne Yeôva.

³ Ndô Môsès avegag’ôma w’ôkendekende ômpôlô vyagaṉô n’ôm’edu g’ôzô wi ntye.

⁴ N’azunge kambi Yeôva pelè gôre Môsès na gôr’Aarône na gôre Marya inè: Gèndaṉi, aṉw’ararô, gô ñanja y’idataṉa. N’agèndi waôdu ararô gôgô.

⁵ N’azumiṉi Yeôva gw’im̃èngo ny’evindi, n’agum̃aṉi yè g’ômpômbala wi nagô y’ikuku. N’aweyi yè Aarône ni Marya, n’agogwi waôdu aṽaṉi.

⁶ N’awulyi yè inè: Vôganyôṉi mbyambye agambi mam̃. J’adwaṉ’ôvogisi gôre ṉwè myè, Yeôva, mi be myez’ôkuṽi wam̃ gôre yè g’ôyeṉô, mi be kamba na yè gô nyinô.

⁷ Nyôngô yam̃ Môsès azele yeṉo. Ar’ôma w’ibekelyô gô nagô yam̃ yôdu.

⁸ Mi kamba na yè ôgwaṉa g’ôgwaṉa, mi myez’ôkuṽi wam̃ gôre yè aranga ni lèmbèlèmbè ko yè jeṉ’edidi zi Yeôva. Sambô ntiṉa nde yi re ṉwè pa tya gô kamb’agamba mi sire nyôngô yam̃, gô sire Môsès?

⁹ N’aṽam̃iṉ’eguṉu zi Yeôva gôre waô. N’agèndi yè.

¹⁰ N’alubw’evindi avila gô nagô y’ikuku. Na vôna, Marya ayogyô nkaṉi ya gelô pupu ga nèzi. N’agegwi Aarône gôre Marya, na vôna avegagi ni nkaṉi ya gelô.

¹¹ N’awulinyi Aarône Môsès inè: Kokolo, Rera, avanga zwè gô dèng’ôrevuṉô w’ibe si re zwè denda pa n’ôtem̃u, ko sô panga zwè ôgara!

¹² Kokolo, arigè gô dwaṉa ga ebende z’ômwaṉa wi re jaṉô pa wi re boṉa pa, gw’agogwi yè avila gw’iwum̃u nyi ngi yè.

¹³ N’arongi Môsès gôre Yeôva, awulya inè: Kokolo, Anyambyè, yingè!

¹⁴ N’awulinyi Yeôva Môsès inè: Arwe nè reri yè arônyi yè igwaṉa g’ôzô wè, gavoṉo ayeṉe ntyoṉi ntyugu ôrwageṉô? E ga ṉunjô gw’igala ny’ôlakô ntyugu ôrwageṉô, avila vovo ayè tô bongô.

¹⁵ N’aṉunjô Marya gw’igala ny’ôlakô ntyugu ôrwageṉô; n’iṉongo nyi pa dubwa kaô gw’arô jinginyô Marya.

¹⁶ Avila vovo alubw’iṉongo avila gw’Aserot, n’azèngi waô ôlakô gw’itôve si Paran.