Itangô 11 - Bibili 1927 (Omyene)

¹ N’alagalag’iṉongo, n’aziṽi sô gw’arôy mi Yeôva. Gw’ayogyô sô ne Yeôva, eguṉu zè z’aṽam̃iṉi, n’ôgôṉi wi Yeôva w’alumbuli gôre waô, n’anyeṉi wô im̃ôndô y’ilakô.

² N’arông’iṉongo gôre Môsès. N’agweni Môsès Yeôva inkolo, n’ayèki ôgôṉi.

³ N’ina nyi mbôra mè ny’aṽètyô inè: Tabera, konde nè ôgôṉi wi Yeôva w’aṽam̃iṉi gôre waô.

⁴ Aṉaga w’aṉongw’am̃ori w’avegagi gôr’Israèl w’arongiṉi; n’Israèl kè w’arô pakilyi gô deṉa, awulya inè: Mande be pa zwè ṽèrè yi nya?

⁵ Azwè jônginy’intyuwè s’anyagôgô zwè gw’Egipt, si re zwè e pa kôla sô n’ezom̃a, ikonkombri, alogè, ipôrô, nyondo, ni ntyinjakôlô.

⁶ Ndô vèṉo, aṉiṉi mazô mi konga, e zel’ezom̃a nyèṉè! Antyo mazô mi jeṉa kaô mana dadyè.

⁷ Mana y’avegagi ga intyo ny’ôlônda wi kôriandri, y’avegag’egolaṉi ga bidèlium.

⁸ N’avazangaṉ’iṉongo gô bonginya yô; w’anyigi yô gô masiṉi yi nyigyanyigy’ilônda, ntyo gô tula yô gw’ezô; w’aṉambagi yô gô ntyuaṉa, ko waô panga yô idega. Y’avegagi ôṉigi ga ôlega w’agali.

⁹ Gw’avôsw’ômpèmbè ôgwèra g’ôlakô, mana kè y’avôswi vovo.

¹⁰ N’ayogyô Môsès iṉongo nyi deṉa, ôm’edu gô mbuṽe yè na g’ômpômbala wi nagô yè y’ikuku. N’eguṉu zi Yeôva z’avendi pôlô vyagaṉô.

¹¹ N’ayeṉi Môsès ekèṽa ko yè bulinyè Yeôva inè: Ntiṉa nde yi jeṉizo nyôngô yo azingô, ntiṉa nde yi re my’alèng’imèpiṉô gw’antyo mo, ko wè talya gôre myè irwaṉô ny’iṉongo nyiṉo nyôdu?

¹² My’avundig’iṉongo nyiṉo? My’ayaṉi waô, ko wè bulinya myè inè: Vara waô gô ntôṉô yo ga nte par’ôbôta ômwaṉi wè, kwanga gô ntye y’arangyô wè ôrangô gôr’ireri saô gô pa waô?

¹³ Mi be dènge ṽèrè yi pa gôr’iṉongo nyiṉo nyôdu na gweṉi? Konde wi be deṉa gôre myè, awulya inè: Va zwè ṽèrè yi nya.

¹⁴ Myè dadyè, my’ayolye gô twaṉ’iṉongo nyiṉo nyôdu, konde wi re dira pôlô gôre myè.

¹⁵ Ndô mi kweno inkolo inè: ja w’adenda yeṉo gôre myè, gambèṉè yôṉa myè, ja my’adèng’imèpiṉô gw’antyo mo, ko my’ayeṉ’azingô mam̃.

¹⁶ N’awulinyi Yeôva Môsès inè: Latiza gôre myè agôm̃i m’aṉôm̃e ôrwageṉô w’aṉèro w’Israèl, waô wi re wè mya pa inè, wi r’aṉèro gôr’iṉongo na wi re n’inyanga gôre waô; ṽaga waô gô ñanja y’idataṉa, kô waô bôm̃unya vovo na wè.

¹⁷ Na mi be sum̃iṉa, ko mi kamba na wè vovo; mi be bong’iṉiṉa nyi re gôre wè, ko mi fwela nyô gôre waô, ko waô twaṉa na wè irwaṉô ny’iṉongo, ko wè arwaṉa nyô awè dadyè.

¹⁸ Ô be buliny’iṉongo inè Mèpizaṉ’ikuṽi yaṉi vo mèṉè, ko anyaṉi ṽèrè, konde aṉw’are deṉa pa gw’arôy mi Yeôva, awulya inè: Mande be nyeza zwè ṽèrè, konde azw’avegagi mbyambye gw’Egipt, Yeôva e be pa ṉwè ṽèrè, ko ṉwè nya yô.

¹⁹ Aṉwè be nya yô arange ntyugu mori, ge ntyugu mbaṉi, ge ntyugu ôtaṉè, ge igôm̃i ny’intyugu, ge agôm̃i m’intyugu ambaṉi,

²⁰ ndô ôgwèli wa ntuntu, kwanga y’akogunya ṉwè n’isoguṉa y’ômpômbô, ko ṉwè dudô yô, konde nè aṉw’are bika pe Yeôva yi re gô garegare yaṉi, konde aṉw’are deṉa pa g’ôzô wè, awulya inè, sambô ntiṉa nde y’agogwi zwè avila gw’Egipt.

²¹ N’awulyi Môsès inè: Gô garegare y’iṉongo nyi re myè dwaṉa pa, wi re inkam̃a s’intozèny s’inyôngô iṉôm̃e ôrôṽa, ko wè bulya inè, mi be pa waô ṽèrè, ko waô nya yô n’ôgwèli wa ro.

²² Adombè n’inyare sô ko jôṉô gôre waô ga nte bela waô? mbe intyuwè sô ko bongô avila gô mbeṉe ga nte bela waô?

²³ N’awiṉizi Yeôva Môsès inè: Ôgo wi Yeôva wô ko tuṉa? Ndô vèṉo ô be jeṉa twa pa igamba nyi re myè bulinyo pa nyi be dwaṉa ntyo ny’alwaṉa.

²⁴ N’agogwi Môsès arakily’agamba mi Yeôva gôr’iṉongo. N’alatizi yè agôm̃i m’aṉôm̃e aṉèro m’iṉongo ôrwageṉô, n’alôṽyè waô vingôvingô nagô y’ikuku.

²⁵ N’azum̃iṉi Yeôva gw’evindi agamba gôre Môsès; n’awongi yè iṉiṉa ny’avegagi gôre Môsès, awela nyô gôr’agôm̃i m’aṉèro ôrwageṉô. N’arweṉi nè gw’alwaṉ’iṉiṉa gôre waô, w’avogi, ndô wi pa kongwa n’ipoga.

²⁶ Ndô avegagi vovo aṉôm̃e aṽaṉi, ôm̃ori ini nyè ne Eldad, n’ôm̃ori ini nyè ne Medad, w’arigaṉi g’ôlakô, n’alwaṉ’iṉiṉa gôre waô; konde w’avegagi gô ntangô ya mongi w’arèndyô, vangaṉe wi pa kènda du gô nagô y’ikuku, ndô w’avogagi g’ôlakô.

²⁷ N’aval’iwanjw’im̃ori mangô gô myeze Môsès, awulya inè: Eldad ni Medad wi poga g’ôlakô.

²⁸ Ndô Yôsua y’ômwaṉ’ôṉôm̃e wi Nun, nyôngô yi Môsès avila gw’erumbe zè, ayogyô igamba awulya inè: Rera Môsès, lega waô!

²⁹ N’awiṉizô yè ne Môsès inè: Ô re ni ñandi gôre myè? Toto iṉongo nyi Yeôva nyi r’ivogisi, ko Yeôva fwel’iṉiṉi nyè gôre waô, gavoṉo Yeôva arô fwel’iṉiṉi nyè gôre waô!

³⁰ N’alubwi Môsès avila g’ôlakô, ayè n’aṉèro w’Israèl.

³¹ N’avèviṉi Yeôva ômpunga avila gô ntyuṽa, n’aṽagi wô itondondo, ko sô jambiṉa g’ôlakô, vo ôgèndo w’ôwenja g’ôzamba na vo ôgèndo w’ôwenja g’ôzamb’ôm̃ori vingôvingô ôlakô. Ntômba y’itondondo avila gô ntye agènda gw’igôṉô y’avegagi kude mbaṉi.

³² Ôm̃anda mè wôdu n’ôgwèra wôdu, n’ôwenja wi mèṉè wôdu, iṉongo ny’agum̃aṉi awonginy’itondondo; ayè y’awonginy’inyèwo alèng’igôm̃i nyi ômèr. N’ayanyi waô sô gôre waô g’ôlakô vingôvingô.

³³ Gw’avegag’izôṉe yi p’are gw’agwaṉi maô, ipyanguṉô fo, aṽamiṉi eguṉu zi Yeôva gôr’iṉongo, n’awôli Yeôva iṉongo n’evung’evôlô.

³⁴ N’aṽètyô ina nyi mbôra mè inè: Kibrot‐Ataava, konde vovo aṽèṉi waô aṉaga w’arongiṉi.

³⁵ N’alubw’iṉongo avila gô Kibrot‐Ataava agènda gw’Aserot.