Itangô 10 - Bibili 1927 (Omyene)

¹ N’agambi Yeôva gôre Môsès, awulya inè:

² Vang’irombo mbaṉi yi sika ya pupu; ô be panga yô ni sika ya pupu yi ntulôgô. Ô be dwaṉa na yô gô fweyage mandô na gô dubwa avila gw’ilakô.

³ Na gô be tôngô yô mandô yôdu yi be dataṉa ta gôre wè, g’ômpômbala wi ñanja y’idataṉa.

⁴ J’atôngô kaô ôrombo ôm̃ori dadyè, gambèṉè ivangiṉi ni gogi y’intozèny s’Israèl yi be dataṉa ta gôre wè.

⁵ Gô be tônga ṉwè wô pôlô, gambèṉè waô wi re sènga p’ôlakô gô nkôṽa yi tongwa ni nkômbe wi be kènda;

⁶ gô be tônga ṉwè wô pôlô nyongo yi mbaṉi, gambèṉè waô wi re sènga p’ôlakô gô nkôṽa yi Sud wi be kènda, wi be tôngô pôlô g’ômwanja w’ôgèndo waô.

⁷ Aṉwè be tônga kè gô datize mandô, ndô arôngaṉi wô pôlô.

⁸ Awaṉ’aṉôm̃e w’Aarône, imiṉisè, si be tông’irombo. Nyi be dwaṉ’ivanga nya pèkèpèkè gôre ṉwè na gôr’imbambi saṉi.

⁹ Gô re nè gô ntye yaṉi, aṉwè be kènda gw’igoṽi gôr’ôlôvalôvi wi nwa na ṉwè, gambèṉè aṉwè be tông’irombo pôlô, ko ṉwè jônginyô g’ôzô wi Yeôva, Anyambyè yaṉi, ko ṉwè sungiṉô avila gôr’ilôvalôvi yaṉi.

¹⁰ Gw’intyugu saṉi s’igeṽa, gw’ifèti saṉi, na gw’agwèli maṉi am̃oṉa, aṉwè be tông’irombo, gw’intyagô saṉi si pezô na gw’intyagô saṉi s’akeṽa, ko sô dwaṉa gôre ṉwè ijônginya g’ôzô w’Anyambyè yaṉi. Myè ne Yeôva, Anyambyè yaṉi.

¹¹ Gô ntyugu y’agôm̃i ambaṉi y’ôgwèli wi mbaṉi w’ômpum̃a wi mbaṉi, evindi z’alubwi avila gw’egara z’ampanga.

¹² N’Israèl w’alubwi avila gw’itôve si Sina, ga nt’avegag’ôzômbyô g’ômwanja w’ôgèndo waô. N’agum̃aṉi evindi gw’itôve si Paran.

¹³ W’agènd’ôgèndo waô ôlônga ga nt’avegag’ôzômbyô wi Yeôva gôre Môsès.

¹⁴ Ntyanga y’ôlakô w’awaṉ’aṉôm̃e wi Yuda y’agèndi gw’alônga, n’imbèli ya sô ta. Mbèli yi Yuda y’avanginyô ne Naason, y’ômwaṉ’ôṉôm̃e w’Aminadab.

¹⁵ Mbèli yi mbuṽe y’awaṉ’aṉôm̃e w’Isakar, ne Natanaèl, y’ômwaṉ’ôṉôm̃e wi Suar.

¹⁶ Mbèli yi mbuṽe y’awaṉ’aṉôm̃e wi Zabulôn, ne Elyab, y’ômwaṉ’ôṉôm̃e w’Elon.

¹⁷ N’avurunyô nagô y’ikuku; n’awaṉ’aṉôm̃e wi Gèrson n’awaṉ’aṉôm̃e wi Merari w’agèndi ntwaṉage nagô y’ikuku.

¹⁸ Ntyanga y’ôlakô wi Rubèn y’agèndi, n’imbèli ya sô ta. Mbèli yi Rubèn y’avanginyô ne Elisur, y’ômwaṉ’ôṉôm̃e wi Sedèr.

¹⁹ Mbèli yi mbuṽe y’awaṉ’aṉôm̃e wi Simeôn, ne Selumyèl, y’ômwaṉ’ôṉôm̃e wi Surisaday.

²⁰ Mbèli yi mbuṽe y’awaṉ’aṉôm̃e wi Gad, ne Elyasaf, y’ômwaṉ’ôṉôm̃e wi Deuèl.

²¹ N’agèndi mongi Keat, ntwaṉag’eza z’ôrunda; n’am̃ori w’aṉôgagi nagô y’ikuku mongi Keat vyagaga ro.

²² Ntyanga y’ôlakô w’awaṉ’aṉôm̃e w’Efrayim y’agèndi ni mbèli ya sô ta. Mbèli y’Efrayim y’avanginyô ne Elisama, y’ômwaṉ’ôṉôm̃e w’Amyud.

²³ Mbèli yi mbuṽe y’awaṉ’aṉôm̃e wi Manase, ne Gamalyèl, y’ômwaṉ’ôṉôm̃e wi Pedasur.

²⁴ Mbèli yi mbuṽe y’awaṉ’aṉôm̃e wi Benyamin, ne Abidan, y’ômwaṉ’ôṉôm̃e wi Gideôn.

²⁵ Ntyanga y’ôlakô w’awaṉ’aṉôm̃e wi Dan y’agèndi, ni mbèli ya sô ta; y’avegagi gô nyum̃a yôdu y’ilakô. Mbèli yi Dan y’avanginyô ne Ayiezèr, y’ômwaṉ’ôṉôm̃e w’Amisaday.

²⁶ Mbèli yi mbuṽe y’awaṉ’aṉôm̃e w’Asèr, ne Pagyèl, y’ômwaṉ’ôṉôm̃e w’Ôkran.

²⁷ Mbèli yi mbuṽe y’awaṉ’aṉôm̃e wi Nèftali, ne Ayira, y’ômwaṉ’ôṉôm̃e w’Enan.

²⁸ Yeṉo avegag’ôzômbyô w’ôgèndo w’agèndyô ne Israèl, ga nt’avegag’imbèli saô; na yeṉo agèndi waô.

²⁹ N’awulinyi Môsès Ôbad, y’ômwaṉ’ôṉôm̃e wi Reuèl, ya mwô Madyan, y’ôgoy wi Môsès inè: Azwè be kènda gô mbôra y’awulyô ne Yeôva inè: mi be pa ṉwè yô. Ôvirô na zwè n’azwè be dendiṉo mbya, konde Yeôva are pangaṉa pa gô dende mbya gôr’Israèl.

³⁰ N’awiṉizyô yè ne Ôbab inè: My’agènde du; ndô mi be kènda gô ntye yam̃ na gôre mongi yam̃.

³¹ N’awulyi Môsès inè: Kokolo, ariga zwè; gô re nè, w’avôrô mbôra yi be sènga zwè ôlakô gw’itôve, gambèṉè ô be dwaṉ’ôrevisi wazô.

³² Na ja w’akènda na zwè, gambèṉè azwè be pango gô jeṉe mbya avila gô mbya yi be dendiṉô zwè ne Yeôva.

³³ N’alubwi waô avila gô nômba yi Yeôva, ko waô kènda ntyugu ntyarô; n’egara zi njeka zi Yeôva z’agèndi gô bôsô yaô, n’agèndi waô ôgèndo wi ntyugu ntyarô, gôre waô gô dènge mbôra yi jowa.

³⁴ Evindi zi Yeôva z’avegagi gôre waô ôm̃anda, gw’arweṉi waô gô dubwa avila g’ôlakô.

³⁵ Gw’agèndag’egara zi njeka, awulyagi Môsès inè: Gum̃aṉa, Yeôva! Ilôvalôvi yo yi ga vazangaṉô! waô wi numba wi ga wange avila g’ôzô wo!

³⁶ Na gw’ayowizagi waô yô, awulyag’inè: Winya, Yeôva, gôr’igôm̃i ny’intozèny s’intozèny s’Israèl.