Ipakilya 6 - Bibili 1927 (Omyene)

¹ N’arweṉi nè: Gw’avakily’aṉaga gô buṉa g’ôzô wi ntye, ko awaṉ’antô jaṉô gôre waô,

² ayeṉi awaṉ’aṉôm̃e w’Anyambyè awaṉ’antô w’aṉaga inè, wi re mèpe jeṉô; n’ayômbi waô antô w’avinjyô waô avila gôre waôdu.

³ Vovo awulyi Yeôva inè: Iṉiṉi nyam̃ ny’alwaṉ’egômbe zôdu gôr’ôma, konde ôma ne ôzôṉe, n’intyugu sè si be dwaṉe nkam̃a y’impum̃a mori n’agôm̃i m’impum̃’ambaṉi.

⁴ Aṉag’ala n’ampôlômè w’avegagi gô ntye gw’intyugu mè, awaṉ’aṉôm̃e w’Anyambyè bya pa gôr’awaṉ’antô w’aṉaga, na waô jaṉa p’awaṉa gôre waô; wiṉo ne aṉôm̃e wi ṽèmba w’avegagi n’elum̃i gw’egômb’elônga.

⁵ N’ayeṉi Yeôva inè: Ibe s’aṉaga s’abuṉi pôlô gô ntye, n’ipikilya sôdu s’irèm̃i yaô s’avegagi s’ibe sitevô ntyugw’edu.

⁶ N’aṉigi Yeôva nkôndi konde avang’aṉaga gô ntye n’ayeṉi ôrèm̃i wè nkaza.

⁷ N’awulyi Yeôva inè: Mi be jiliz’aṉaga w’avangyô myè avila g’ôzô wi ntye; aṉaga n’inyam̃a ni ya yi dandalanda, n’inyoṉi s’ôrôṽa, konde my’aṉigi nkôndi gw’avangi myè waô.

⁸ Ndô Nôa alèng’imèpiṉô gw’antyo mi Yeôva.

⁹ Siṉo n’imbamba si Nôa. Nôa avegag’ôma w’ôgôre n’ômbya gw’egômbe zè; n’agangaṉi Nôa n’Anyambyè.

¹⁰ N’ayaṉi Nôa awaṉ’aṉôm̃e ararô Sèm, Kam ni Yafèt.

¹¹ Ntye y’avegagi fweva pa g’ôzô w’Anyambyè, n’ayônyi ntye ralye ni mbaô.

¹² N’avôni Anyambyè gô ntye; ndô vôna, y’aliwô y’afwevi, konde izôṉe yôdu y’akombizagi mpoṉo y’ibe gô ntye.

¹³ N’awulinyi Anyambyè Nôa inè: Ntyay y’izôṉe yôdu y’abyeṉi g’ôzô wam̃, konde y’ajônyi ntye ni mbaô; vôna, mi be jiliza yô ni ntye ta.

¹⁴ Vangiṉ’ôwatanga wi rere yi gôfèr; vanga kè inontye g’ôwatanga, ko kila wô ôjô gô nkôṽa ya gare na gô nkôṽa y’igala.

¹⁵ Yiṉo ne mpangiṉi yi be pango wô, elaviṉi z’ôwatanga zi be dwaṉ’inkam̃a s’ikude ntyarô, n’evendiṉi za wô agôm̃i m’ikude ataṉè, n’agôm̃i m’ikude ararô gw’idôndwa sa wô.

¹⁶ Vang’asangala g’ôwatanga, ko panga yô kude mori gw’igôṉô, ko tôl’ômpômbala g’ôzira; ko pange ndèkè nônga, yi mbaṉi, na yi ntyarô.

¹⁷ Na myè, mi be bag’eṉingô evôlô z’aṉingô gô ntye, gô jiliz’izôṉe yôdu yi re n’ômwèy w’em̃èṉo avila g’ôdôlôngô w’ôrôṽa; ezom̃’edu zi re gô ntye zi be juwa.

¹⁸ Ndô mi be dwaṉize njeki yam̃ gôre wè, ko wè jingiṉa g’ôwatanga, awè, n’awaṉi wo aṉôm̃e, n’ômwantô wo, n’antô w’awaṉi wo aṉôm̃e na wè.

¹⁹ N’avila gw’eza zi re bo na gw’izôṉe yôdu, ko jinginya g’ôwatanga ṽaṉi g’ôṉongw’edu, gô penjavenja yô bo na wè kè; yi be dwaṉ’eṉôm̃e n’ezantô.

²⁰ Gw’inyoṉi s’ôrôṽa ôṉongo waô, ni vugina ôṉongo waô, n’ezom̃’edu zi dandalanda gô ntye ôṉongo wè, ṽaṉi g’ôṉongw’edu, yi ga ṽye gôre wè ko wè penjavenja yô bo.

²¹ Ko bonga gôre wè inya sôdu si nyô, ko kum̃inya sô g’ôzamba ko sô dwaṉ’inya gôre wè na gôr’inyam̃a sôdu.

²² Yeṉo alendi Nôa; alend’ezom̃’edu z’azômbyô yè ne Anyambyè.