Ipakilya 16 - Bibili 1927 (Omyene)

¹ Ndô Sarai, y’ômwantô w’Abram, e pa jaṉa du awaṉa gôre yè; ndô avegagi ni nyôngô nyantô y’Egipt, ini nyè ne Agar.

² N’awulinyi Sarai Abram inè: Vôna, Yeôva are panga pa myè nkele; kokolo, yôgô gôre nyôngô yam̃ nyantô, vendetwa mi be dèng’awaṉa vo yè. N’avôganyô Abram inyôy nyi Sarai.

³ Vovo Sarai, y’ômwantô w’Abram, awongi Agar y’Egipt, yi nyôngô yè nyantô n’avenyè yè gôr’Abram, y’ôṉôm̃u wè, gô jômba yè, Abram dwaṉa pa igôm̃i ny’impum̃a gô ntye yi Kanaan.

⁴ N’alèwi yè n’Agar, n’arweṉi yè inyem̃e, ndô gw’ayeṉi Agar inè, atweṉi n’inyem̃e, avèdyi ngi yè.

⁵ N’awulinyi Sarai Abram inè: Ifwem̃i sam̃ si re gôre wè; my’aveṉi nyôngô yam̃ nyantô gôre wè na gw’ajeṉè inè, atweṉi n’inyem̃e, gambèṉè are pèdya pa myè. Yeôva e ga yèkèlye ntyo myè ntyo wè.

⁶ N’awiṉizi Abram Sarai inè: Vôna, nyôngô yo nyantô yi re gô ngulu yo; lenda gôre yè ga nte be tondo. N’arugô yè ne Sarai pôlômè, n’averi Agar bô avila gôre yè.

⁷ Ndô yenjèl yi Yeôva y’alèngi yè pyèrè n’ôgèy w’aṉingô gw’itôve, pyèrè n’ôgèy wi re gô mpoṉo yi kènda gô Sur.

⁸ N’awulyi yenjèl inè: Agar, nyôngô yi Sarai, ô pila na gweṉi? Ô kènda gweṉi? N’awiṉizi yè inè: Mi pera avila gôre Sarai, yi ngi yam̃.

⁹ Yenjèl yi Yeôva y’awulinyi yè inè: Winya gôre ngi yo, ko sôny’ôkuṽi wo gw’ago mè.

¹⁰ Yenjèl yi Yeôva y’awulinyi yè inè: Mi be buṉiz’awaṉi wo, wi be buṉa pôlô ko w’ayolye tangô.

¹¹ Ndô yenjèl yi Yeôva y’awulinyi yè inè: Vôna, w’atweṉi n’inyem̃e, n’awè ô be jaṉ’ômwaṉ’ôṉôm̃e ko wè bèt’ini nyè inè, Yismaèl, konde Yeôva are jogo pe njuke yo.

¹² E be dwaṉa ga buru y’iga, ôgo wè wi be dwaṉa gôr’ôm’edu, n’ôgo w’ôm’edu wi be dwaṉa gôre yè, n’ayè e be dwaṉa gw’azô m’awôngi yè aṉôm̃e waôdu.

¹³ N’aṽèti yè ina nyi Yeôva y’agambi na yè inè: Ataèlroy. (Awè ne Anyambyè yi jeṉa myè); konde awulyi nè: Rigare, my’are jeṉa pa vèṉo ayè yi jeṉa myè?

¹⁴ Yeṉo aweyô everô inè: Lakayroy. Zi re ntyo Kadès ntyo Berèd.

¹⁵ N’ayaṉi Agar ômwaṉ’ôṉôm̃e gôr’Abram; ndô Abram aṽèti ina ny’ômwaṉa w’ayanyô ne Agar, inè: Yismaèl.

¹⁶ Ndô Abram avegag’agôm̃i m’impum̃’eṉanay n’impum̃’ôrôṽa g’ôṉèro, gw’ayaṉi Agar Yismaèl gôr’Abram.