Ipakilya 11 - Bibili 1927 (Omyene)

¹ Ni ntye yôdu y’avegagi nkambiṉi mô, n’igamb’imô.

² N’arweṉi gw’alubwi waô avila gô tongwa ni nkômbe, w’alèng’ôdèdè gô ntye yi Sinar, n’alwaṉi waô vovo.

³ Awulyaṉi waô na waô inè: Gèndôṉi, azwè ga vange ibiriki, avika sô g’ôgôṉi gô joliza sô; n’agalwi ibiriki gôre waô adô, n’ôjô nombe w’agalwi gôre waô laso.

⁴ N’arô bulyi waô inè: Gèndôṉi, azwè ga ṉôgiṉe ikuṽi yazô nkala mpôlô, ni nagô ndôndwi, ewônjô zi ga luke g’ôrôṽa; azwè ga vangiṉ’ikuṽi yazô ina, azwè vende pazangaṉa g’ôzô wi ntye yôdu.

⁵ N’azum̃iṉi Yeôva gô jeṉe nkala ni nagô ndôndwi y’aṉôgôgô ne awaṉaga.

⁶ N’awulyi Yeôva inè: Vôna, aṉaga w’avangyô ôkuṽa ômô, na waôdu wi kambe nkambiṉi mô; ndô ziṉo ne ezom̃a z’apakilyô waô gô denda, ndô vèṉo ezel’ezom̃a zi dega waô gô tiga, nt’are waô pikilya pa gô denda.

⁷ Gèndôṉi, azwè ga zum̃iṉe aweviza vovo nkambiṉi yaô; yeṉo ko w’ayogo nyèṉè ôm’edu nkambiṉi y’ôm̃ori.

⁸ Yeṉo avazangaṉi Yeôva waô avila vovo g’ôzô wi ntye yôdu; n’arigi waô gô nôge nkala.

⁹ Yeṉo aweyô ina nya yô inè: Babèl, konde Yeôva awevizi nkambiṉi yi ntye yôdu vovo; n’avila vovo Yeôva avazangaṉi waô g’ôzô wi ntye yôdu.

¹⁰ Siṉo ne imbamba si Sèm; Sèm avegagi nkam̃a y’impum̃a g’ôṉèro, n’ayaṉi yè Arpaksad eṉingô evôlô pila pa impum̃’imbaṉi.

¹¹ N’alwaṉi Sèm, ayè jaṉa p’Arpaksad, inkam̃a s’impum̃’ôtaṉè; n’ayaṉi yè awaṉ’aṉôm̃e n’awaṉ’antô.

¹² N’alwaṉi Arpaksad agômi m’impum̃’ararô n’impum̃’itaṉè g’ôṉèro, ayaṉi yè Sela.

¹³ Arpaksad alwaṉi, ayè jaṉa pe Sela, inkam̃a s’impum̃a nay n’impum̃’irarô, ayaṉi yè awaṉ’aṉôm̃e n’awaṉ’antô.

¹⁴ N’alwaṉi Sela agôm̃i m’impum̃’ararô g’ôṉèro, ayaṉi yè Ebèr.

¹⁵ N’alwaṉi Sela, ayè jaṉa pe Ebèr, inkam̃a s’impum̃a nay n’impum̃’irarô, ayaṉi yè awaṉ’aṉôm̃e n’awaṉ’antô.

¹⁶ Ndô Ebèr alwaṉi agôm̃i m’impum̃’ararô n’impum̃’inay, ayaṉi yè Pelèg.

¹⁷ N’alwaṉi Ebèr, ayè jaṉa pe Pelèg, inkam̃a s’impum̃a nay, n’agôm̃i m’impum̃’ararô, ayaṉi yè awaṉ’aṉôm̃e n’awaṉ’antô.

¹⁸ N’alwaṉi Pelèg agôm̃i m’impum̃’ararô g’ôṉèro, ayaṉi yè Reu.

¹⁹ N’alwaṉi Pelèg, ayè jaṉa pe Reu, inkam̃a s’impum̃a mbaṉi n’impum̃’eṉôgôm̃i, ayaṉi yè awaṉ’aṉôm̃e n’awaṉ’antô.

²⁰ N’alwaṉi Reu agôm̃i m’impum̃’ararô n’impum̃’imbaṉi, ayaṉi yè Serug.

²¹ N’alwaṉi Reu, ayè jaṉa pe Serug, inkam̃a s’impum̃a mbaṉi n’impum̃’ôrwageṉô, ayaṉi yè awaṉ’aṉôm̃e n’awaṉ’antô.

²² N’alwaṉi Serug agôm̃i m’impum̃’ararô g’ôṉèro, ayaṉi yè Nakor.

²³ N’alwaṉi Serug, ayè jaṉa pe Nakor, inkam̃a s’impum̃a mbaṉi, ayaṉi yè awaṉ’aṉôm̃e n’awaṉ’antô.

²⁴ N’alwaṉi Nakor agômi m’impum̃’ambaṉi n’impum̃’eṉôgôm̃i g’ôṉèro, ayaṉi yè Tare.

²⁵ N’alwaṉi Nakor, ayè jaṉa pe Tare, nkam̃a y’impum̃a n’igôm̃i ny’impum̃’im̃ori n’impum̃’eṉôgôm̃i, ayaṉi yè awaṉ’aṉôm̃e n’awaṉ’antô.

²⁶ N’alwaṉi Tare, agôm̃i m’impum̃’ôrwageṉô g’ôṉèro, ayaṉi yè Abram, ni Nakor, n’Aran.

²⁷ Siṉo ne imbamba si Tare. Tare ayaṉi Abram, ni Nakor, n’Aran; n’ayaṉi Aran Lot.

²⁸ Aran ayuwi reri yè Tira e p’are bo, gô ntye y’ayanyô yè, gô Ur yi Kalde.

²⁹ N’ayômbi Abram ni Nakor antô; ina ny’ômwantô w’Abram ne Sarai, n’ina ny’ômwantô wi Nakor ne Milka, y’ômwaṉ’ômwantô w’Aran, rerè yi Milka, ni rerè yi Yiska.

³⁰ Ndô Sarai avegagi nkele, e re pegege du n’ômwaṉa.

³¹ N’awongi Tare Abram, y’ômwaṉi wè, ni Lot, y’ômwaṉ’ôṉôm̃e w’ômwaṉi wè ôṉôm̃e w’Aran, y’ômwaṉi wè ôṉôm̃e w’ômwaṉi wè ôṉôm̃e; ni Sarai y’ômwantô w’Abram y’ômwaṉi wè ôṉôm̃e; n’agogwi waô na yè avila gô Ur yi Kalde gô kènda gô ntye yi Kanaan; n’aṽyeṉi waô kwanga gô Karan n’alwaṉi waô vovo.

³² Ndô intyugu si Tare s’avegag’inkam̃a s’impum̃a mbaṉi n’impum̃’itaṉè, n’ayuwi Tare gô Karan.