Inkôgô 1 - Bibili 1927 (Omyene)

¹ Inkôgô si Salômôn, y’ômwaṉa wi David, Y’ôga w’Israèl,

² Gô my’imya n’inènja, Gô kôtiz’agamba m’ikôtiza;

³ Gô bong’inènj’ibya, N’ôgôre, n’ijèkèlya, n’ôgôre;

⁴ Gô p’ikôtiza gôr’ikuge y’ôrèm̃a, N’imya n’ôkeli gôr’iwanjo.

⁵ Ôma w’imya e ga yogo, ko yè kund’inènga, N’ayè yi re n’ikôtiza e be dèng’avôṉô,

⁶ Gô kôtiza nte pivye nkôgô, N’agamba m’aṉaga w’imya, n’iteṉizi saô s’agamba.

⁷ Itya si Yeôva ne ipakilya s’imya; Dosu yi pèdy’imya n’inènja.

⁸ Ômwam̃, vôganyô inènja sa reri yo, Ko arig’inènja si ngi yo;

⁹ Konde sô ne kôrôṽa mbya gw’ewônjô zo, N’ôlônda w’ômpele g’ômpele wo.

¹⁰ Ômwam̃, jog’aṉag’aṽe w’abela gô soryo, Ayivira.

¹¹ Ja w’abulya inè: Ôvirô na zwè! Azwè ga wônd’ebônda, ko zwè pôvize ntyiṉa, Azwè ga vure môndô gôr’ôma wi bekelye mbèm̃ yè gô nyawènyawè,

¹² Azwè ga m̃èṉe waôdu bo, ga ilômbô, Waôdudu, egolaṉi ga waô wi sum̃iṉa gw’iṽemba;

¹³ Azwè be dèng’igumb’iṽya, Azwè be jôny’inagô sazô ni yom̃a yi kwèrô;

¹⁴ Ô be dènge mbèy yo na zwè, Azwèdu azwè be dwaṉa ni puka mori dadyè yi fwel’idolè!

¹⁵ Ômwam̃, agangaṉa gô mpoṉo na waô, Rômbe ntyôzô yo avila gô mpoṉo yaô;

¹⁶ Konde intyôzô saô si pale mangô gw’ibe, Ko waô negiza gô pôvize ntyiṉa.

¹⁷ Môndô yi purô g’ôzô wi nyony’edu yi re n’ampava Yi re gô nyawènyawè;

¹⁸ Na waô wi bônde bônda gô ntyiṉi yaômè, Wi pur’imôndô gw’aṉiṉi maômè.

¹⁹ Yeṉo twa gôr’ôm’edu wi re n’ôgasô w’aṉiva; Ôgasô w’aṉiva wi periza waô wi p’irèm̃i yaô gô wô.

²⁰ Imya si tônga gw’agala, Si tômbiṉ’inyôy gw’inkala;

²¹ Si tônga gw’ayingiṉô m’imbôra s’ambunga, Gw’impômbala, gô nkala, si koguny’ agambi mè:

²² Ôlingô sèṉi, aṉwè inkende, aṉwè be tond’ipikilya si nkende? Ôlingô sèṉi wi be tond’izèlisi isèlya, Ni dosu bik’imya?

²³ Gegwaṉi gô pôganyô intyèmbo sam̃! Vônaṉi, mi be jir’iṉiṉi nyam̃ gôre ṉwè, Mi be myeza ṉwè agambi mam̃ ...

²⁴ Gô re nè mi fweya, ko ṉwè ayivira, Gô re nè mi nyonyuṉ’ôgo wam̃, ko aṽandam̃iṉ’ôma,

²⁵ Gô re nè aṉwè fal’irevuṉô yam̃ yôdu, Ko ṉwè arond’intyèmbo sam̃,

²⁶ Gambèṉè myè kè mi be joṉa gô be dwaṉa ṉwè gô njuke, Mi be sèlya j’ererya z’akôta ṉwè,

²⁷ Gô be kôtô ṉwè n’ererya egolaṉi g’ôgula, Ko njuke kômbiṉa ṉwè g’efwizagèngè, Gô be by’ijela n’azingô gôre ṉwè.

²⁸ Vovo wi be fweya myè, ndô mi ze jivire, Wi be buta myè, ndô wi ze dènge myè.

²⁹ Gô re nè w’aṽik’imya, Ko w’avinj’itya si Yeôva,

³⁰ Gô re nè wi pa tond’irevuṉô yam̃, Ko w’avèdy’intyèmbo sam̃ sôdu,

³¹ Gambèṉè wi be ny’ilônda yi mpoṉo yaô, Ayôra n’irevuṉô yaômè,

³² Konde nweni y’inkende yi jôṉa waô, N’ômbyambye wi dosu wi jiliza waô;

³³ Ndô ayè yi pôganyô myè e be dwaṉa ni njuke fo, E be dwaṉa kendekende, ni penjavenjô pa avila gw’ererya zi mbe.