Galati 6 - Bibili 1927 (Omyene)

¹ Awarera, vangaṉ’ôm’akôtô n’ifwem̃y’edu, aṉwè, yi re ga nt’ar’Iṉiṉa, wiṉizaṉ’ôm’ôṉongo mè ni mpangiṉi y’ôkendekende. Ṽandam̃iṉ’ôkuṽi womè, awè kè awè vende soryô.

² Rwaṉaṉaṉ’arwaṉô maṉi, ko dendaṉ’ivanga nyi Krist yeṉo.

³ J’ôm’apikilya nè, ayè ezom̃a, vangaṉ’e zel’ezom̃a, gambèṉè e temiz’ôkuṽi wèmè.

⁴ Ôm’edu e ga gèlagèle ṽilô yèmè, gambèṉè asôgwa n’ôkuṽi wèmè dadyè, aranga n’ôm’ômwèṉè;

⁵ konde ôm’edu e be twaṉ’irwaṉô nyèmè.

⁶ Ndô ayè yi nènjô igamba, e ga gere n’ôma wi nènjè yom̃i yè yôdu.

⁷ Aremizôṉi: Anyambyè azèlyô. Ezom̃a zi nyènyô n’ôma, zô mèmô zi be teṉô yè kè.

⁸ Ayè yi nyènya g’ôzôṉe wè, e be teṉ’iboṉa avila g’ôzôṉe; ndô ayè yi nyènya gw’Iṉiṉa, e be teṉ’em̃èṉo z’egômbe zôdu avila gw’Iṉiṉa.

⁹ Azw’ayaseṉi gô dende mbya; konde gô be duk’egômbe azwè be teṉa, j’azw’ayasa.

¹⁰ Yeṉo, gô re zwè n’egômbe, azwè ga lende mbya gôr’aṉaga waôdu, ndô pôsô gôr’awarerè wi bekelyô.

¹¹ Vônaṉi n’irèndo nde impôlô yi re myè tèndiṉa pa ṉwè n’ôgo wam̃imè.

¹² Waô wi bele mèpe jeṉô ga nt’ar’ôzôṉe wi bangatya ṉwè gô kèrô, waô vende kombizô g’ômwanja wi krosi yi Krist.

¹³ Konde mongi wi re kèrô pa wi pa penjavenj’ivanga; ndô wi bela ṉwè gô kèrô, ko waô sôgwa n’izôṉe yaṉi.

¹⁴ Ndô alwaṉe gôre myè gô sôgwa, kaô du ni krosi ya Reri yazô Yesu‐Krist; vo yô ntye y’aṽanyô gô krosi g’ômwanji wam̃ ga nt’are myè kè banyô pa g’ôzamba wi ntye.

¹⁵ Konde gô kèrô arang’ôsam̃u, gô dwaṉa kè ôzombè arang’ôsam̃u; ndô kaô ipangô ijoṉa, sô ne ôsam̃usam̃uwe.

¹⁶ Am̃ènjè ni nkèngo gôre waôdu wi be dwaṉa ga nt’ar’ivanga nyiṉo, na gôr’Israèl y’Anyambyè.

¹⁷ Avila vèṉo ôm’edu azokolya myè konde mi twaṉe lingilyô yi Yesu g’ôkuṽi wam̃.

¹⁸ Awarera, imèpiṉô sa Reri yazô Yesu‐Krist si ga lwaṉe n’aṉiṉi maṉi! Amèn!