FILIPI 1 - Bibili 1927 (Omyene)

¹ Pol ni Timôte, inyôngô si Yesu‐Krist, gôr’iyombwi yôdu yi re gôre Yesu‐Krist, yi re gô Filipi, na gôr’imiṉisè ni mongi kera:

² imèpiṉô n’am̃ènjè mi ga vô ṉwè avila gôr’Anyambyè ya Reri yazô n’Ôvangiṉi Yesu‐Krist.

³ Mi p’Anyambyè yam̃ akeṽa egômby’edu zi jônginya myè ṉwè,

⁴ egômbe zôdu gw’inkolo sam̃ sôdu g’ômwanji waṉi mi kambiṉa ni mbya,

⁵ g’ômwanja w’idiṽa si diṽa ṉwè ni Ntyangô Mbya avila gô ntyugu nônga kwanga vèṉo.

⁶ My’are n’abeko inè, ayè yi re pakilya p’eṽilô eṽya ziṉo gôre ṉwè, e be sukiza zô kwanga gô ntyugu yi Yesu‐Krist.

⁷ Are kwèkwè kè gôre myè gô pikilya yeṉo g’ômwanji waṉi aṉwèdu, konde my’are n’aṉwè g’ôrèm̃i wam̃, konde gw’intyôgô sam̃ na gô kaṉa myè Ntyangô Mbya na gô dwaṉiza yô, aṉwèdu aṉw’ar’iwongisi na myè gw’imèpiṉô mèmô.

⁸ Konde Anyambyè e jeṉa myè ga nte tonda myè ṉwèdu ni nkèngo mbya yi Yesu‐Krist.

⁹ Ôsam̃u wi bambyô myè gw’ikambiṉi sam̃ wô nè, itondi saṉi si ga wuṉe vyagaṉô pôlô gw’imya na gw’ikôtiza sôdu,

¹⁰ ko ṉwè jolye kèlagèl’isam̃u imbyamè, ko ṉwè dwaṉe ntyèmbo fo gô ntyugu yi Krist,

¹¹ ralye n’ilônda y’ôgôre, yi re vo Yesu‐Krist gw’ipendya na gw’isum̃inya s’Anyambyè.

¹² Awarera, mi bela ṉwè gô mya nè, isam̃u yi re bya pa gôre myè, yi re dwaṉa pa pôsô gô pôm̃ize Ntyangô Mbya.

¹³ Yeṉo igôrô yam̃ g’ômwanja wi Krist y’atweṉi gô myô gô nagô y’isozè na gô mbôry’edu,

¹⁴ na gôr’awarerè gôre Krist, awenge w’ajolizô vo igôrô yam̃, w’atweṉi ni nkagande gô kamb’Igamba itya fo.

¹⁵ Awèwo rèti wi kambiṉe Krist ni ñandi ni mbèlèkè; ndô awèwo n’irèm̃’imbya;

¹⁶ wiṉo n’itonda, myagaga nè, my’are dôṽyô pa gô kaṉe Ntyangô Mbya,

¹⁷ ndô mongi mori wi kambiṉe Krist n’imbèlèkè, aranga n’ôrèti, mpinkilyaga gô kunde njuke gw’intyôgô sam̃.

¹⁸ Sambô ande? Mpoṉo edu, ge n’ipondya ge n’ôrèti, Krist e kambiṉô: na gô ndaga mè mi jeṉe mbya, na mi be tô jeṉa yô mbya kè.

¹⁹ Konde my’avôrô nè, ôsam̃u wiṉo wi be kalwa gw’isungiṉô sam̃, v’ikambiṉi saṉi na v’iṉunguṉa s’Iṉiṉa nyi Yesu‐Krist,

²⁰ ga nte deṽiṉa myè alôv’igum̃u inè, my’ayeṉizô ntyoṉi g’ôsam̃u edu, ndô inè, na vèṉo ga nt’avegag’egômbe zôdu, n’abeko môdu Krist e be pendizô g’ôkuṽi wam̃, n’em̃èṉo mbya, n’ijuwa mbya;

²¹ konde Krist n’em̃èṉo zam̃, n’ijuwa n’ôba gôre myè.

²² Ndô j’adwaṉ’isolo gw’eṽilô zam̃ inè, mi ga lwaṉe bo g’ôzôṉe, gambèṉè my’ayolye mye nkôṽa yi be pinjô myè.

²³ My’are bangatyô pe nkôṽa mbaṉi: mi jônguṉa gô kènda alwaṉa ni Krist; yiṉo yi re mbya vyagaṉô pôlô;

²⁴ ndô g’ômwanji waṉi ar’isolo vyagaṉô inè, mi ga lwaṉe g’ôzôṉe.

²⁵ Na gôre myè n’abeko miṉo, my’avôrô nè mi be tigaṉa, alwaṉa na ṉwèdu, gô nuginya ṉwè ayeṉiza ṉw’igeṽa ny’ibekelya,

²⁶ ko isôgwi saṉi gôre Yesu‐Krist buṉa g’ômwanji wam̃, gô be fwinya myè gôre ṉwè.

²⁷ Dadyè lwaṉaṉi swaswo ni ntyangô Mbya yi Krist, inè, ja my’abya gô jeṉa ṉwè ge ja my’aṽya, mi ga yogo g’ômwanji waṉi nè, aṉwè kum̃aṉa jolajola n’iṉiṉ’imô, nwagaga n’ôrèm̃’ômô g’ômwanja w’ibekelya si Ntyangô Mbya,

²⁸ ko ṉw’aryezô g’ôsam̃u edu n’ilôvalôvi yaṉi; ndaga mè yi re gôre waô elingilyô z’ijilizô, ndô gôre zwè elingilyô z’isungiṉô, si pila gôr’Anyambyè,

²⁹ konde aṉw’are pô pa g’ôzamba wi Krist, aranga dadyè gô bekelyè, ndô gô jeṉ’azingô kè g’ômwanji wè,

³⁰ ndwaṉaga n’igoṽi mèmô ny’ayeṉi ṉwè na myè, nyi jogo ṉwè kè vèṉo inè, nyi re na myè.