Ezrasi 1 - Bibili 1927 (Omyene)

¹ G’ômpum̃’ôlônga wi Kirus, y’ôga wi Paras, gô dwaṉiz’igamba ny’agambyô ne Yeôva n’ôgwaṉa wi Yeremya, Yeôva ayèm̃’ôrèm̃a wi Kirus, y’ôga wi Paras; n’arôm̃i Kirus agende n’irèndo yiṉo gw’ipangiṉi sè sôdu inè:

² Yeṉo kambe Kirus, y’ôga wi Paras, inè: Yeôva, Anyambyè y’ôrôṽa, are pa pa myè ipangiṉa sôdu si ntye, azômbya myè gô nôgiṉè nagô gô Yerusalèm yi re gô Yuda.

³ Mande gôre ṉwè avila gôr’iṉongo nyè? Anyambyè yè e ga lwaṉe na yè, ko yè panda gô Yerusalèm yi re gô Yuda, aṉôge nagô yi Yeôva, Anyambyè y’Israèl! Ayè ne Anyambyè yi re gô Yerusalèm.

⁴ Gô mbôry’edu yi dwaṉô n’aṉaga wi Yeôva wi re tigaṉa pa, aṉaga wi mbôra mè wi be pa waô sika ya pupu, ni sika ya teṉateṉa, n’igumba, n’inyam̃a, ni ya yi mpagaga gô nagô y’Anyambyè yi re gô Yerusalèm.

⁵ Inkum̃u s’imbuṽe si Yuda na si Benyamin, imiṉisè ni Leviti, na waôdu w’ayèmô n’Anyambyè ôrèm̃a, gô kènda gô nôge nagô yi Yeôva gô Yerusalèm.

⁶ Na waôdu w’avegagi waô vingôvingô w’aveṉi waô vagô yi sika ya pupu na ya teṉateṉa, n’igumba, n’inyam̃a, ni yom̃a yi njôni, tômbare pa ya yi mpagaga.

⁷ N’awiṉiz’ôga Kirus vagô yi nagô yi Yeôva, y’aṽagyô ne Nebukadnezar avila gô Yerusalèm awela yô gô nagô y’Anyambyè yè.

⁸ Kirus, y’ôga wi Paras, agogunyi yô ni Mitredat, y’ôvenjavenji w’igumba ava yô gôre Sèsbatzar, y’ôvangiṉi wi Yuda.

⁹ Na yiṉo ne ntangô ya yô, agôm̃i m’intyèngè si sika ya teṉateṉa ararô, ntozèny mori y’intyèngè si sika ya pupu, agôm̃i m’iswaka ambaṉi ni swaka eṉôgôm̃i, agôm̃i m’amogi mi sika ya teṉateṉa ararô,

¹⁰ nkam̃a s’amogi nay n’igôm̃i ny’amogi im̃ori mi zele mbyambye du, ni vagô mori ntozèny.

¹¹ Vagô yôdu yi sika ya teṉateṉa na ya pupu y’avegagi ntozèny ôtaṉè ni nkam̃a nay. Yom̃a yiṉo yôdu y’arwanyô ne Sèsbatzar gw’awizi waô ikôte avila gô Babèl agènda gô Yerusalèm.