Efèsi 6 - Bibili 1927 (Omyene)

¹ Awaṉa, yogiṉôṉ’izombi yaṉi, ga nt’are Rerè, konde wiṉo n’ôsam̃u ômbya.

² Lube reri yo ni ngi yo (wô n’ôzômby’ôlônga wi re n’ômpangaṉô),

³ ko wè dwaṉa mbyambye, alwaṉ’ôling’ôla gô ntye.

⁴ N’aṉwè, irerè, aṽendizaṉ’awaṉi waṉi, ndô vôm̃yaṉi waô g’ôrevuṉô na gw’inènja ga nt’are Rerè.

⁵ Inyôngô, yogiṉôṉ’ireri saṉi ga nt’ar’ôzôṉe, n’itya n’itatam̃iṉa, n’ôrèm̃a w’ôkendekende, ga nte jogiṉô ṉwè Krist,

⁶ aranga konde wi pôna ṉwè, egolaṉi ga gô tondy’aṉaga, ndô egolaṉi g’inyôngô si Krist, ndendage ntondiṉi y’Anyambyè n’ôrèm̃’ômbya,

⁷ njanjaga ni mbya g’inyôngô sa Rerè, aranga s’aṉaga,

⁸ myagaga nè, ôm’edu adwaṉ’ôsaka mbya, adwaṉa mwô’ntye mbya, e be dèng’avila gôre Rerè mbya yi re yè denda pa.

⁹ N’aṉwè, irerè, lendaṉi mbela mô gôre waô, ko tigaṉ’iterya, myagaga nè, Reri yaô n’iyaṉi are g’ôrôṽa, n’ayè e zele n’ôma wa sim̃ôsim̃ô.

¹⁰ Gô num̃uṉa, yolaṉi gôre Rerè, na gô njoliṉi yi ngulu yè yôdu.

¹¹ Woraṉ’imyanga yôdu y’igoṽi y’Anyambyè, ko ṉwè jolye kum̃aṉa gô sir’avôṉô ambe mi Satan.

¹² Konde azwè pa nw’igoṽi n’ôzôṉe ni ntyiṉa, ndô n’ampenda, n’anyanga, n’ivangiṉi yi ntye yiṉo yi mpiri, n’aṉiṉ’ambe gw’imbôra s’ôrôṽa.

¹³ Yeṉo, wongaṉ’imyanga yôdu y’igoṽi y’Anyambyè, ko ṉwè jolye sindiṉa gô ntyugu mbe, agum̃aṉa gôre, aṉwè keṽa p’isam̃u yôdu.

¹⁴ Sambô gum̃aṉaṉi ngèngèngè, ini yaṉi diryô pa n’ôgiligili, n’intôṉô saṉi pugô pa n’ômwanga w’ôgôre,

¹⁵ n’intyôzô saṉi kè boryô pa ni mpyô yi Ntyangô Mbya y’am̃ènjè;

¹⁶ gw’igôṉô nyi yom̃a yiṉo yôdu, wongaṉi kè nguṽa y’ibekelya, na yô aṉwè be jolye nim̃’agonga m’ôgôṉi môdu m’ôm’ombe;

¹⁷ wongaṉi k’ipaki ny’ômwanga ny’isungiṉa, n’ôkwara w’Iṉiṉa, wô n’igamba ny’Anyambyè.

¹⁸ Gambiṉaṉ’egômbe zôdu n’ikwen’inkolo sôdu, n’ibambya sôdu. Ṽandam̃iṉaṉi gô sô n’isoliṉa, ko kambiṉaṉi g’ômwanja w’iyombwi yôdu.

¹⁹ Gambiṉaṉi g’ômwanji wam̃, ko mi pô gô myeza zange ni nkagande iyumbuṉô nyi Ntyangô Mbya;

²⁰ gô yô, myè miṉisè, kôrô pa n’azungakaṉô, inè, mi ga gamb’igamba ni nkagande, ga nt’are kwèkwè.

²¹ Ndô gô panga ṉwè mya g’ômwanji wam̃, nte denda myè, Tukikos, ’mwarerè wi tondô ni miṉisè y’ibekelyô gôre Rerè, e be myeza ṉwè isam̃u yôdu.

²² Mi tôm̃è gôre ṉwè gô ntiṉa yiṉo, ko ṉwè mya ndwaṉi yazô, ko yè sindya kè irèm̃i yaṉi.

²³ Am̃ènjè, n’itonda, n’ibekelya si ga vô gôr’awarerè avila gôr’Anyambyè ya Rerè n’Ôvangiṉi wazô Yesu‐Krist.

²⁴ Imèpiṉô si ga lwaṉe na waôdu wi tonde Reri yazô Yesu‐Krist n’itonda si re s’amaṉe.