Efèsi 5 - Bibili 1927 (Omyene)

¹ Sambô veraṉ’Anyambyè, g’awaṉa wi tondô;

² ko dwaṉaṉi gw’itonda, ga nt’arondi Krist kè aronda zwè, ava ôkuṽi wèmè gôr’Anyambyè g’ômwanji wazô ga ntyagô yi mpagaga ni ntyagô yi nkangô mbya.

³ Ndô ibelaṉa, n’intyale s’isèkè sôdu, n’ôgasô w’aṉiva w’aretô gôre ṉwè, ga nt’are kwèkwè gôr’iyombwi.

⁴ Ge agamba mi ntyoṉi, g’elombè z’edosu, ge ijoṉ’intyèmbi, si re si zele kwèkwè; ndô rô peṉ’akeṽa.

⁵ Konde aṉw’avôrô igamba nyiṉo inè, e zel’ebelaṉi, ge ôma w’isèkè, ge ôma w’ôgasô w’aṉiva, e pivya nè, ôzaviṉi w’ikaṉa, are n’iṉiva gw’iṉongo nyi Krist na ny’Anyambyè.

⁶ Aremizôṉi n’ôm’edu n’agamba m’enyale; konde g’ômwanja w’isam̃u yiṉo e by’eguṉu z’Anyambyè gôr’awaṉa w’ipava.

⁷ Sambô alwaṉaṉ’iwongisi na waô.

⁸ Aṉw’avegagi mpiri gw’alônga, ndô vèṉo aṉw’atweṉ’ôzange gôre Rerè. Lwaṉaṉi g’awaṉa w’ôzange.

⁹ Konde ilônda y’ôzange ne nkèngo yôdu, n’ôgôre wôdu, n’ôrèti wôdu.

¹⁰ Gèlagèlaṉ’ôsamu wi tondye Rerè;

¹¹ ko ayindaṉi n’ijanja si mpiri si re si pa jaṉ’ilônda du, ndô rô sèmbeṉi sô.

¹² Are ntyoṉi gô tet’isam̃u yi dendô waô gô ntyorya;

¹³ ndô isam̃u yôdu yi sèmbô, yi miezô n’ôzange, konde ôsam̃u edu wi myezô, wô ôzange.

¹⁴ Yeṉo e bulyô nè: Ṉongwa, awè yi dèwa, ko tôngwa avila gw’ijuwa, gambèṉè Krist e be jenjizo.

¹⁵ Sambô ṽandam̃iṉaṉi nte kangaṉa ṉwè, aranga ga dosu, ndô g’aṉaga w’imya;

¹⁶ landuṉaṉ’egômbe, konde intyugu si r’imbe.

¹⁷ Yeṉo alwaṉaṉ’item̃u, ndô gôtizaṉi nt’are ntondiṉi ya Rerè.

¹⁸ Awongôṉi n’ivè, nyi piṉ’aṉaga gw’ibe. Ndô lwaṉaṉi ralye n’Iṉiṉa;

¹⁹ ko kambaṉaṉi n’ijembô, ni vanda, n’amenga m’Iṉiṉa, njembiṉage Rerè isum̃inya, ni mpendyegè gw’irèm̃i yaṉi yôdu;

²⁰ ṽaṉi Anyambyè ya Rerè akeṽa egômbe zôdu gw’isam̃u yôdu gw’ina ny’Ôvangiṉi wazô Yesu‐Krist;

²¹ ko tugizaṉ’ikuṽi yaṉi gw’itya si Krist.

²² Antô, yogiṉôṉi aṉôm̃e saṉi, ga nte jogiṉô ṉwè Rerè;

²³ konde ôṉôm̃e n’ewônjô z’ômwantô, ga nt’are Krist ewônjô zi mandô, ayèmè kè n’Ôzungè w’ôkuṽa.

²⁴ Ndô ga nte jogiṉô mandô ayogiṉô Krist, yeṉo kè antô wi ga yogiṉô anôm̃e saô gw’isam̃u yôdu.

²⁵ Aṉôm̃e, rondaṉ’antô waṉi, ga nt’arondi Krist mandô, av’ôkuṽi wèmè g’ômwanja wa yô,

²⁶ ko yè mèpiza yô n’Igamba, yô jombunyô pa n’ibatiza s’aṉingô,

²⁷ ko yè tum̃inya yô g’ôzô wè, mandô njombwi, yi r’ibôke fo, ni njèsu fo, g’ezom̃’edu zi r’ôṉongo ga wiṉo, ndô yi ga lwaṉ’ôrunda ni ntyèmbo fo.

²⁸ Yeṉo aṉôm̃e wi ga rond’antô waô g’ikuṽi yaômè. Ayè yi tond’ômwantô wè e tond’ôkuṽi wèmè.

²⁹ Konde e zel’ôma are bika p’ôzôṉe wè ni mori; ndô e penjavenja wô avôm̃ya wô, ga nte penjavenje Krist mandô;

³⁰ konde azwè ṉam̃a y’ôkuṽi wè.

³¹ Yeṉo ôṉôm̃e e ga rige reri yè ni ngi yè, alwaṉa ta n’ômwantô wè, ko waô aṽaṉi dwaṉ’ôzôṉ’ôm̃ô.

³² Wiṉo ôsam̃u ômpôlô w’iyumbuṉô; ndô mi kamba g’ômwanja wi Krist ni mandô.

³³ Ndô ôm’edu gôre ṉwè e ga rond’ômwantô wè ga ôkuṽi wèmè, n’ômwantô e ga ṽimby’ôṉôm̃e wè.