Efèsi 4 - Bibili 1927 (Omyene)

¹ Sambô, my’ôkôte gôre Rerè, mi kwena ṉwè nkolo inè, lwaṉaṉi swaswo gô mbela y’aweyô ṉwè,

² gw’isônya sôdu s’ôkuṽa, n’ôkendekende, n’isindiṉa, zindyaṉaṉi n’itonda;

³ gèṉizaṉi gô dwaṉa ta n’Iṉiṉa v’ôgôrô w’am̃ènjè.

⁴ Ar’ôkuṽ’ôm̃ori dadyè, n’Iṉiṉ’im̃ori dadyè, ga nt’are ṉwè kè fweyô pa gô dwaṉ’igum̃u im̃ori vo mbeli yaṉi;

⁵ ar’Ôvangiṉi ôm̃ori dadyè, ibekely’im̃ori, n’ibatiz’im̃ori,

⁶ ar’Anyambyè mori ni Rerè ya waôdu, are gw’igôṉô ny’aṉaga waôdu, vo waôdu na gôre waôdu.

⁷ Ndô ôm’edu gôre zwè are pô p’imèpiṉô ga nt’ar’egèṉizô zi mpeṉi yi Krist.

⁸ Yeṉo e bulyô inè: Gw’avandi yè gw’igôṉô, agèndi n’ikôte, ave mpagaga gôr’aṉaga.

⁹ Ndô igamba nyiṉo inè, avandi, nyi re sè kaô du inè, azum̃iṉi kè gw’imbôra si ntye?

¹⁰ Ayè y’azum̃iṉi, ayè mèmô kè avandi gw’igôṉô vyagaṉô n’irôṽa yôdu, ko yè jônye yom̃a yôdu.

¹¹ N’alôṽyi yè awèwo rôm̃i, am̃ori ivogisi, am̃ori igambiṉi yi Ntyangô Mbya, am̃ori ivenjavenji n’iṉènji,

¹² gô mèpiz’iyombwi, gô nunguṉ’eṽilô zi miṉisè, na gô nuginy’ôkuṽa wi Krist,

¹³ kaô azwèdu azw’adwaṉa ta gw’ibekelya na gw’imya s’Ômwaṉa w’Anyambyè, aziṽa gw’igôṉa ny’ôma, gw’egèṉizô z’igôṉa nyi Krist,

¹⁴ ko zw’arô dwaṉa nyèṉè awaṉa, mbôlangaṉaga arwaṉôgô vèṉo na voṉo n’ômpungy’edu w’inènja v’itemiza s’aṉaga na v’avôṉô maô m’itemiza,

¹⁵ ndô mèmag’ôrèti gw’itonda, azwè ga vôm̃e gw’isam̃u yôdu gôre yè, are gw’ewônjô, inè Krist,

¹⁶ gôre yè ôkuṽa wôdu, datizô pa ayôngô ta mbyambye v’iṉunguṉa s’inyôngw’edu, eṉam̃y’edu njanjaga ga nt’are zô kenjô pa, ko ôkuṽa penda ga nt’are ngulu yi re kwèkwè gw’eṉam̃y’edu za wô, ko wô nuginya gw’itonda.

¹⁷ Sambô mi buly’igamba nyiṉo, arakilya gôre Rerè, inè, alwaṉaṉi nyèṉè ga nte dwaṉ’aṉongo wi kangaṉa gw’enyale z’irèm̃i yaô.

¹⁸ Wi re ni wônjô yaô mpiri, waô kè agènda gw’em̃èṉo z’Anyambyè, g’ômwanja w’ôntem̃u wi re gôre waô na g’ômwanja wi njoliṉi y’irèm̃i yaô.

¹⁹ Mongi siṉo, gô re nè wi zele n’irèm̃a nyèṉè, wi piṉ’ikuṽi yaô gw’itongiṉa, gô dend’aṉongo m’isèkè sôdu n’ôgasô.

²⁰ Ndô aṉw’azele nènga pe Krist yeṉo,

²¹ ja rèti aṉw’are jogo pa gôre yè, na j’aṉw’anènjô gôre yè, ga nt’ar’ôgiligili gôre Yesu,

²² g’ômwanja wi ndwaṉi yaṉi nônga, gô tômb’ôm’ôlungu wi re fweva pa n’itongiṉa s’itemiza,

²³ ko ṉwè kalw’awoṉa gô mpangiṉi y’irèm̃i yaṉi,

²⁴ awor’ôm’ômwoṉa wi re pangô pa g’Anyambyè g’ôgôre na gô nkèrè ya giligili.

²⁵ Yeṉo, rigaṉ’inôka, ko kambaṉ’ôrèti ôm’edu n’ôrangaṉô wè; konde azwè n’azwè azwè ṉam̃a.

²⁶ J’aṉw’abenda, ayanjaṉ’ibe; eguṉu zo z’aziṽa kwanga gô be pôswe nkômbe,

²⁷ avaṉi kè Satan iyingiṉô.

²⁸ Ayè yi jufa, e ga rig’arô jufa nyèṉè; ndô e ga rô janje, ndendage mbya n’ago mèmè, ko yè dwaṉa n’ezom̃a zi re yè ko p’ôma re jela pa.

²⁹ Igamb’iṽ’edu ny’agogwa avila gw’agwaṉi maṉi, ndô igamb’iṽya nyi r’isolo gô nuginya, ko nyô mèpya waô wi jogo nyô.

³⁰ Ayeṉizaṉ’Iṉiṉ’Iṽya ny’Anyambyè ekèṽa, nyi re dingilya pa ṉwè gô ntyugu y’ôlanduṉô.

³¹ Isam̃u yi nôṉe yôdu, n’eguṉu, n’ibenda, n’anyôm̃aṉô, n’imog’ibe, si ga rômbô avila gôre ṉwè, ni ngambi yôdu.

³² Lwaṉaṉ’aṽya gôre ṉwè na ṉwè, n’ipôgiṉa, nyezaṉaṉi ga nt’ar’Anyambyè nyeza pa ṉwè kè gôre Krist.