Efèsi 3 - Bibili 1927 (Omyene)

¹ Gô ntiṉa yiṉo, myè Pol, my’ôkôte wi Yesu‐Krist, g’ômwanji waṉi aṉw’aṉongo, ...

² j’adwaṉ’inè, aṉw’are jogo p’igamba ny’imèpiṉô s’Anyambyè nyi re pô pa myè g’ômwanji waṉi.

³ V’itum̃inya s’Anyambyè s’amyezyô myè ôsam̃u w’iyumbuṉô, ga nt’arèndiṉi myè ṉwè n’agamb’amèwo.

⁴ Gô tanguṉa ṉwè mô, aṉwè ko my’ikôtizi sam̃ gw’isam̃u y’iyumbuṉô yi Krist.

⁵ Yi pa tum̃inyô gôr’awaṉa w’aṉaga gw’ampôm̃’alônga, ga nt’are yô tum̃inyô pa n’Iṉiṉa vèṉo gôre rôm̃i yi Krist na gôr’ivogisi yè.

⁶ Iyumbuṉô nyiṉo nè, aṉongo wi r’iṉivisi, pangô p’ôkuṽ’ôm̃ori, n’iwongisi g’ômpangaṉô mèwoṉo gôre Yesu‐Krist vo Ntyangô Mbya,

⁷ y’avangi myè miṉisè ga nt’are mpendiṉi y’imèpiṉô s’Anyambyè s’avenyô myè vo njanjiṉi yi ngulu yè.

⁸ Gôre myè, yi r’ômwangômè gôr’iyombwi yôdu, imèpiṉô siṉo s’avenyô gô myez’aṉongo ibuṉa s’ambya mi Krist mi re m’ayolye kôtizô,

⁹ amyez’ aṉaga nt’ar’igamba ny’iyumbuṉô ny’ayumbunyô avila gw’egômbe zôdu gôr’Anyambyè y’avangi yom̃a yôdu,

¹⁰ ko ipangiṉa n’anyanga g’ôrôṽa mya, egômbe ziṉo, vo mandô, mbuṉiṉi iy’imya s’Anyambyè,

¹¹ ga nt’are nkenjṉi yè ya koṉako y’agenjyô yè vo Yesu‐Krist y’Ôvangiṉi wazô;

¹² gôre yè azw’are yangayanga gô susa pyèrè n’Anyambyè n’abeko, v’ibekelya gôre yè.

¹³ Yeṉo kè mi bamby’igamba nyiṉo gôre ṉwè inè, alèlaṉi g’ômwanja w’injuke si jeṉô myè g’ômwanji waṉi: sô n’ivendi nyaṉi.

¹⁴ Gô ntiṉa yiṉo mi dôṽ’akotolo gôre Rerè,

¹⁵ are waôdu wi re g’ôrôṽa na gô ntye wi re bètô p’ana avila gôre yè,

¹⁶ ko yè pa ṉwè, ga nt’ar’ibuṉa s’ivendi nyè, gô dwaṉa ni ngulu gô gare yaṉi v’Iṉiṉi nyè,

¹⁷ ko Krist dwaṉa gw’irèm̃i yaṉi v’ibekelya; inè, aṉwè jola pa ni dôṽyô pa gw’itonda,

¹⁸ aṉwè ga lwaṉe ni ngulu gô kôtiza n’iyombwi yôdu nt’ar’evendiṉi, n’elaviṉi, n’ôronga, n’elôndwinyi,

¹⁹ na gô my’itonda si Krist si pyagaṉ’imya sôdu, ko ṉwè dwaṉa ralye n’ibuṉa sôdu s’Anyambyè.

²⁰ Gôre yè yi re ko jolye denda vo ngulu yi janja gôre zwè, vyagaṉô n’isam̃u yôdu yi bambyô zwè, ge yi pikilyô zwè,

²¹ gôre yè ga lwaṉ’ivenda gô mandô na gôre Yesu‐Krist kwanga gw’ampôm̃a môdu gô koṉako! Amèn!