Efèsi 2 - Bibili 1927 (Omyene)

¹ Aṉw’avegagi juwa pa g’ômwanja w’ifwem̃i saṉi na g’ômwanja w’ibe saṉi,

² s’alwaṉôgô ṉwè gw’alônga ga nt’are ntyale yi ntye yiṉo, ga nt’ar’ôvangiṉi wi ngulu y’ômpunga, iṉiṉa nyi janja vèṉo gôr’awaṉa w’ipava.

³ Azwèdu azw’avegagi gôre waô egômb’elônga alwaṉa gw’itongiṉa s’ikuṽi yazô, ndendage ntondiṉi y’ôzôṉe na y’ôrèm̃a, azw’avegagi kè awaṉa w’eguṉu gô njaṉô egolaṉi g’am̃ori.

⁴ Ndô Anyambyè, are nkèngo mpôlô, g’ômwanja w’itondi sè ipôlô s’arondyè zwè,

⁵ azw’avegagi juwa pa v’ipavi sazô, alwaṉizi zwè bo ta ni Krist (aṉw’asungiṉô n’imèpiṉô);

⁶ arôngunyi zwè ta na yè, alwaṉiza zwè baru na yè gw’imbôra s’ôrôṽa gôre Yesu‐Krist,

⁷ ko yè tum̃inya zwè gô gômbe yi bya ibuṉa s’imèpiṉô sè vo nkèngo yè gôre zwè gôre Yesu‐Krist.

⁸ Konde aṉw’asungiṉô n’imèpiṉô, v’ibekelya. Igamba nyiṉo nyi pa pila gôre ṉwè, nyô n’ezom̃a zi pô n’Anyambyè mpagaga.

⁹ Nyi pa pila kè gw’ijanja, ôm’edu e vende sôgwa.

¹⁰ Konde azwè n’ijanji sè, s’ayanjyô yè vo Yesu‐Krist gô ṽilô ṽya, y’agenjyô n’Anyambyè gw’alônga, ko zwè denda yô.

¹¹ Yeṉo, yônginyaṉi, aṉwè y’avegagi gw’alônga aṉongo gô njaṉô, aweyô inè, izombè ne mongi wi re kèrô pa n’ago m’ôzôṉe, yônginyaṉi nè,

¹² aṉw’avegagi egômbe mèzoṉo Krist fo, n’awoga gw’iṉongo ny’Israèl, n’agènda gw’injeka s’ômpangaṉô, ndwaṉag’igum̃u fo n’Anyambyè fo gô ntye.

¹³ Ndô vèṉo gôre Yesu‐Krist, aṉwè y’avegagi bô, aṉw’asusi pyèrè vo ntyiṉa yi Krist.

¹⁴ Konde ayè n’am̃ènjè mazô ayè avangi yô ṽaṉi gô dwaṉ’ôm̃ori, azaz’ôgômba w’avegagi gô garegare,

¹⁵ ayè jiliza pe ndôṽa n’ôzôṉe wè, n’ivanga n’izômbyô ya nyô, ko yè panga waô aṽaṉi gôre yè ôm’ômwoṉa ôm̃ori,

¹⁶ mpangag’am̃ènjè, amèpyaṉa waô aṽaṉi n’Anyambyè g’ôkuṽ’ôm̃ori vo krosi, njilizage ndôṽa na yô.

¹⁷ Aṽyeṉi yè gô myez’am̃ènjè gôre ṉwè y’avegagi bô, n’am̃ènjè gôre waô w’avegagi pyèrè;

¹⁸ konde vo yè azwè aṉongw’ambaṉi azw’are n’iyingiṉô gôre Rerè gw’Iṉiṉ’im̃ori.

¹⁹ Sambô vèṉo aṉw’azele nyèṉè agènda ge awoga; ndô aṉw’atweṉ’alwaṉi w’iyombwi, aṉwè n’inyômba ny’Anyambyè.

²⁰ Aṉw’are nôgô pa gw’izanga nyi rôm̃i n’ivogisi, Yesu‐Krist ayèmè ne idw’ivôlô nyi ntulungu.

²¹ Gôre yè, nôgiṉi yôdu jôngô pa ta mbyambye, yi kum̃anyô gôre gô dwaṉe nagô y’ôrunda gôre Rerè.

²² Gôre yè kè aṉw’are nôgô pa gô dwaṉ’elumba z’Anyambyè gw’Iṉiṉa.