Ebèr 9 - Bibili 1927 (Omyene)

¹ Njeka nônga kè y’avegagi n’intyale s’isaviṉa, ni nagô y’ôrunda yi ntye yiṉo.

² Nagô y’ikuku y’aṉôgyô. Gô mbôra nônga y’avegagi n’ômwanga wi dôṽyô ilambi, ni tavulu, ni mpèmba yi dôṽyô g’ôzô wi Yeôva, y’aweyôgô inè, mbôra y’ôrunda.

³ N’ôṉamba wi mbaṉi w’avegagi diṽiṉô pa, vovo avegagi mbôra y’aweyôgô inè, Ôrund’ômpôlô mè,

⁴ y’avegagi mbôra yi sika ya teṉateṉa yi jirô yom̃a yi nkangô, n’egara z’ampanga mi njeka, zôdu kuzô pa ni sika ya teṉateṉa. Avegagi gw’egara z’ampanga evagô zi sika ya teṉateṉa z’avegagi ni manu, ni nkogu y’Aarône y’awelag’iṽya, n’adô mi mbèṽè mi njeka.

⁵ Na gw’igôṉô ny’egara z’ampanga avegag’ikerubin s’ônjèlènjèlè, ndiṽiṉag’epônga z’egara z’ampanga. Ndô vèṉo e zel’egômbe gô kamb’isam̃u yiṉo yôdu ôm̃ori ôm̃ori.

⁶ Isam̃u yiṉo kekizô pa yeṉo, imiṉisè s’ayanjag’eṽilô egômbe zôdu gô nontye nônga yi nagô y’ikuku;

⁷ ndô gô nontye yi mbaṉi miṉisè mpôlô dadyè ayingiṉagi nyongo mori g’ômpum̃a, ni ntyiṉa y’ayiryô yè g’ômwanja w’ôkuṽi wèmè, na g’ômwanja w’ibe s’aṉaga.

⁸ Iṉiṉ’Iṽya ny’arevagi yeṉo nè, mpoṉo yi jingiṉa gô mbôra y’ôrund’ômpôlô mè, yi pa diwô y’aṉunguṉô zange, gw’avegagi nagô y’ikuku yi p’are.

⁹ Igamba mènyoṉo gw’egômbe ziṉo elingilyô, nyi r’intyagô si mpagaga n’intyagô s’ayiryô si pa jolye mèpiz’ôrèm̃a w’ôma w’azaviṉagi yeṉo,

¹⁰ si re kaô intyale s’ôzôṉe, n’aṉongo m’inya, n’ijonga, n’ijôvuṉa, si simbyô dadyè kwanga gw’egômbe zi be kum̃anyô isam̃u yôdu.

¹¹ Ndô Krist are bya pa, ga miṉisè mpôlô y’isam̃u imbya yi re gô bya; avyagaṉi nagô y’ikuku mpôlômè ni mèpa pa vyagaṉô, yi re yi pa nôgô n’ago m’aṉaga, nyi pivya nè, aranga yi ntye yiṉo;

¹² n’ayingiṉi yè gô mbôra y’ôrund’ômpôlômè nyongo mori v’egômbe zôdu, aranga ni ntyiṉa yi mbôṉi na y’inyare, ndô ni ntyiṉi yèmè, alèng’ôlanduṉô wa koṉako.

¹³ Konde gambô ntyiṉa y’inyar’iṉôm̃e na y’imbôṉi, n’ômbu wi nyare nyantô, nyènyô pa gôre waô wi re fweva pa, yi mèpiz’ayombunya waô gô jombuny’ôzôṉe,

¹⁴ ko pôrô ntyiṉa yi Krist, are v’Iṉiṉa nya koṉako, ayir’ôkuṽi wèmè ibôke fo gôr’Anyambyè, yi be jombuny’irèm̃i yaṉi avila gw’ijanja si re juwa pa, ko ṉwè janjiṉ’Anyambyè ya bo.

¹⁵ Na gô ntiṉa yiṉo ar’ôgaṉisi wi njeka nyoṉa inè, ijuwa bya pa g’ômwanja wi danduṉ’ivavisi yi njeka nônga, waô wi re fweyô pa gô pô iṉiva sa koṉako si re pangaṉô pa gôre waô.

¹⁶ Konde gô mbôra yi dwaṉ’ezangô z’ijiga, vovo ijuwa s’ôma w’arèndi zô sô ko myô mbyambye.

¹⁷ Konde ezangô z’ijiga zi re n’isolo ôma juwa pa, ndô zi zele n’isolo du ôlingô wi p’ar’ôma bo.

¹⁸ Gô ntiṉa yiṉo njeka nônga yi re jekaṉô pa ni ntyiṉa.

¹⁹ Môsès, myeza p’isômbya sôdu s’ivanga gôr’aṉaga, awongi ntyiṉa y’inyare na y’imbôṉi, n’aṉingô, n’imya y’adombè ya teṉateṉa, ni yisop, anyènya yô gw’ezangô mè na gôr’aṉaga waôdu,

²⁰ awulya nè: Yiṉo ne ntyiṉa yi njeka y’azômbyô n’Anyambyè gôre ṉwè.

²¹ Egolaṉi mèmô kè anyènyi nagô y’ikuku ni vagô yôdu yi nagô ni ntyiṉa.

²² Na, ga nt’ar’ivanga, pyèrè ni yom̃a yôdu yi jombunyô ni ntyiṉa, n’ipôviza si ntyiṉa fo e zel’inyezô s’ibe.

²³ Sambô avegag’isolo nè, gô re nè, golaṉi y’isam̃u yi re g’ôrôṽa yi ga yombunyô, gambèṉè isam̃u y’ôrôṽa yômè yi ga yombunyô n’intyagô imbya vyagaṉô na mèsoṉo.

²⁴ Konde Krist e pa jingiṉa gô mbôra y’ôrunda y’avangyô n’ago m’aṉaga, yi r’egolaṉi zi mbôra y’ôrunda ya rèti, ndô ayingiṉi g’ôrôṽa wômè, gô bôm̃unya vèṉo g’ôzô w’Anyambyè g’ômwanji wazô.

²⁵ Aranga nè, ayingiṉi gô jir’ôkuṽi wèmè inyongo sinyenge, ga nte jingiṉe miṉisè mpôlô ômpum̃y’edu gô mbôra y’ôrunda ni ntyiṉa yi ngaṉi;

²⁶ arwe yeṉo, gavoṉo arô jeṉ’azingô inyongo sinyenge ntye yiṉo ga pangô, ndô vèṉo gw’isuka si gômbe, awôm̃unyi nyongo mori dadyè gô tômb’ibe v’ijir’ôkuṽi wèmè ntyagô.

²⁷ Na ga nt’are kenjô pa gôr’aṉaga gô juwa nyongo mori dadyè, n’avila vovo ijèkèlya,

²⁸ yeṉo kè Krist are jirô pe nyongo mori dadyè gô twaṉ’ibe s’awenge, e be tô bôm̃unye nyongo yi mbaṉi ibe fo gôre waô wi bôndè gô sungiṉa waô.