Ebèr 8 - Bibili 1927 (Omyene)

¹ Ntiṉa y’isam̃u y’akambô vèṉo ye yiṉo inè, azw’are ni miṉisè mpôlô ôṉongo wiṉo, yi re dwaṉa pa baru g’ôg’ôṉôm̃yè w’eka z’ôma w’igôṉô mè g’ôrôṽa,

² gô dwaṉe miṉisè yi nagô y’ôrunda na yi nagô y’ikuku ya rèti, y’alôṽyô ne Rerè n’arang’aṉaga.

³ Miṉisè mpôlô edu e dôṽyô gô jir’intyagô si mpagaga n’intyagô; yeṉo ar’isolo gôre wiṉo kè gô dwaṉa n’ezom̃a zi jirô.

⁴ Arwe nè, are gô ntye, gavoṉo alwaṉe kè miṉisè, konde ar’imiṉisè si jir’intyagô ga nt’ar’ivanga

⁵ (wi saviṉ’egolaṉi n’iviri ny’isam̃u y’ôrôṽa, ga nt’amyezyô Môsès n’Anyambyè gw’agèndi yè gô nôge nagô y’ikuku. Awulinyô yè inè: Ṽandam̃iṉa gô dende yom̃a yôdu ga nt’ar’egolaṉi z’arevyô wè gô nômba).

⁶ Ndô vèṉo are dènga p’eṽilô eṽya vyagaṉô ga nt’are yè ôgaṉisi wi njeka mbya vyagaṉô, yi re jekaṉô pa gw’impangaṉô imbya vyagaṉô.

⁷ Konde arwe nè njeka nônga y’avegagi ntyèmbo fo, gavoṉo awutô mbôra gô njeka yi mbaṉi.

⁸ Rerè awuliny’Israèl, mbelaga gô sèmba waô, inè: Vônaṉi, intyugu si bya, bulye Rerè, si be jeka myè njeka nyoṉa ni nagô y’Israèl, ni nagô yi Yuda,

⁹ aranga ga njeka y’ayeki myè n’ireri saô, gô ntyugu y’agôti myè waô g’ôgo gô kogunya waô avila gô ntye y’Egipt, konde wi pa kongwa gô njeki yam̃, na myè kè my’avôzi waô, bulyè Rerè.

¹⁰ Ndô yiṉo ne njeka yi be jeka myè ni nagô y’Israèl, intyugu mèsoṉo vyagaṉô, bulye Rerè inè: mi be fwel’ampangi mam̃ gw’igu yaô, mi be tènda mô gw’irèm̃i yaô, ko mi dwaṉ’Anyambyè yaô, na waô wi be dwaṉ’iṉongo nyam̃.

¹¹ Ôm’edu e ze tô nènje nyèṉè ômi wè, ge ôm’edu mongi yè, inè: Myare Yeôva! konde waôdu wi be mya myè, avila gôr’awangô kwanga gôr’aṉèro gôre waô;

¹² mi be nyez’ifwem̃i saô, mi ze tô jônginye nyèṉè ibe saô.

¹³ Gô bulyè inè: Njeka nyoṉa, are panga pe nônga nungu, ndô ezom̃a zi tw’elungu, alômbiṉa, zi re pyèrè gô maṉa.