Ebèr 7 - Bibili 1927 (Omyene)

¹ Konde Mèlkisedèk yiṉo, y’ôga wi Salèm, miṉisè y’Anyambyè y’Igôṉô mè, — agèndi gô dataṉa n’Abraam gw’awinyagi yè avila gw’ijiliza s’aga,

² azavinyè yè, n’avenyô yè n’Abraam, em̃ori avila gw’igôm̃i gô yom̃a yôdu, — ini nyè nyi dônge pivya nè, ôga w’ôgôre, ga nte pivya ini nyè, avila vovo kè inè, ôga wi Salèm, nyi pivya nè, ôga w’am̃ènjè, —

³ ayè re rerè fo, ngwè kè fo, njanô fo, ayè azele kè n’ipakilya s’intyugu ge ntyay y’em̃èṉo, — ndô are pangô p’egolaṉi ga Ômwaṉa w’Anyambyè, — Mèlkisedèk yiṉo e dwaṉe miṉisè egômbe zôdu.

⁴ Ndô vikilyareṉi nt’avegag’ôm’ômpôlô mèwoṉo avenyô ne rerè nônga Abraam em̃ori avila gw’igôm̃i avila gô yom̃a y’agwèryô yè.

⁵ Waô gôr’awaṉa wi Levi wi re n’inyanga nyi miṉisè, wi re n’ôzômbyô gô bong’avila gôr’aṉaga em̃ori avila gw’igôm̃i avila gô yom̃a yôdu, ga nt’ar’ivanga, nyi pivya nè, avila gôr’awareri yaô, wi re vangaṉe w’apila g’ôna w’Abraam;

⁶ n’ayè, yi re njanô yè yi pa pila gôre waô, awongi avila gôr’Abraam em̃ori avila gw’igôm̃i, azaviṉ’ayè y’avegagi n’impangaṉô.

⁷ Ndô mpaga du fo ômwangô e saviṉô n’ômpôlô.

⁸ Na vèṉo waô wi bong’em̃ori avila gw’igôm̃i ne aṉaga wi juwe njuwaga; ndô vovo r’ôma wi takilyô inè, e dwaṉa bo.

⁹ Vyagaṉô vovo, Levi yi bong’em̃ori avila gw’igôm̃i, are pa p’em̃ori gw’igôm̃i vo Abraam;

¹⁰ konde e p’are g’ôna wa reri yè, gw’alataṉi Mèlkisedèk n’Abraam.

¹¹ Arwe nè, aṉaga ko jolye mèpa vo imiṉisè si re mpangiṉi yi Levi, — konde gw’egômbe zaô avenyô ivanga gôr’aṉaga, — e p’ar’isolo nde gô bôm̃we miṉisè nyèṉè gô mpangiṉi yi Mèlkisedèk, n’aranga gô mpangiṉi y’Aarône?

¹² Konde mpangiṉi yi miṉisè kaluṉô pa, gambèṉè kè ar’isolo gô dwaṉ’ikalwa s’ivanga.

¹³ Konde ayè y’agambiṉô isam̃u yiṉo e dwaṉa gô mbuṽe nyèṉè, yi re yi ze n’ôma wi janj’eṽilô gô mbôra yi jirô intyagô;

¹⁴ konde are zange nè, Reri yazô avili gô mbuṽe yi Yuda, mbuṽe mè yi re Môsès e pa teta yô g’ômwanja w’eṽilô zi miṉisè.

¹⁵ N’igamba nyi bulyô zwè nyi re zange vyagaṉô, j’abôm̃unye miṉisè nyèṉè gô mpangiṉi yi Mèlkisedèk,

¹⁶ dôṽyô pa, aranga nt’ar’ivanga ny’ôzômbyô w’ôzôṉe, ndô ga nt’are ngulu y’em̃èṉo z’egômbe zôdu;

¹⁷ konde e takilyô g’ômwanji wè inè: Awè miṉisè y’egômbe zôdu, gô mpangiṉi yi Mèlkisedèk.

¹⁸ Konde ivanga ny’alônge dwaṉi nyi re tômbô pa, konde ny’avegagi dèla n’isolo fo, —

¹⁹ konde ivanga nyi pa mèpiz’ezom̃a, — ko bya gw’inyanga nya nyô igum̃u iṽya vyagaṉô, vo nyô azwè susa pyèrè n’Anyambyè.

²⁰ Na gô re nè, igamba mè nyi pa dwaṉ’ôrangô fo, —

²¹ konde rèti Leviti wi re twa p’imiṉisè ôrangô fo, ndô Yesu are twa pe miṉisè n’ôrangô vo yè y’awulinyi yè inè: Yeôva are tanga p’ôrangô, e ze nige kè nkôndi inè: awè miṉisè y’egômbe zôdu, gô mpangiṉi yi Mèlkisedèk, —

²² yeṉo Yesu are dwaṉa pe puṉu yi njeka mbya vyagaṉô.

²³ Vyagaṉô vovo, imiṉisè si re twa p’inyenge, konde wi pa jolye kongwe ntiṉa y’ijuwi saô.

²⁴ Ndô ayè, gô re nè, e dwaṉ’egômbe zôdu, are n’inyanga nyi miṉisè nyi re ny’ayolye kalwe.

²⁵ Yeṉo kè are ni ngulu yi sungiṉa kwanga waô wi sèvya pyèrè gôr’Anyambyè vo yè, konde e dwaṉ’egômbe zôdu bo gô kaṉa waô.

²⁶ Konde are kwèkwè gôre zwè gô dwaṉa ni miṉisè mpôlô ôṉongo mèwoṉo egolaṉi ga yè, yi re nkèrè, ibe fo, ibôke fo, bangwaṉa pa n’aṉag’aṽe, ni pendyô pa gw’igôṉô vyagaṉô n’ôrôṽa,

²⁷ are e zele n’isolo, egolaṉi g’imiṉisè im̃ori impôlô, gô jir’intyagô ntyugw’edu, gw’alônga g’ômwanja w’ibe sèmè, avila vovo g’ômwanja w’ibe s’aṉaga, — konde alendi yeṉo nyongo mori v’egômbe zôdu gw’ayiri yè ôkuṽi wèmè.

²⁸ Konde ivanga nyi dôṽy’aṉaga, wi re n’indèliṉi saô, imiṉisè impôlô; ndô igamba ny’ôrangô, nyi sông’ivanga, ny’alôṽyô Ômwaṉa are mèpa pa egômbe zôdu.