Ebèr 6 - Bibili 1927 (Omyene)

¹ Yeṉo, azwè ga rig’ipakilya s’igamba nyi Krist, ko zwè kombiz’imèpa, aranga ndôṽyaga nyongo nyèṉè izanga nyi tig’ijanja si re juwa pa, na ny’ibekelya gôr’Anyambyè,

² na ny’inènja s’ibatiza, na ny’italya s’ago, na ny’itôngunyô sa mongi wi re juwa pa, na ny’ijèkèlya sa koṉako.

³ Na yiṉo azwè be denda yô j’Anyambyè abela.

⁴ Konde waô wi re jenjizô pa ni mori, alembe mpagaga y’ôrôṽa, alwaṉ’iwongisi y’Iṉiṉ’Iṽya,

⁵ alemb’igamb’iṽya ny’Anyambyè ni ngulu yi ntye yi bya,

⁶ ko waô pôswa, w’ayolye to pangô awoṉa ko waô nige nkôndi, gô re nè, wi tô bany’Ômwaṉa w’Anyambyè gô krosi gw’ikuṽi yaômè, ayeṉizè ntyoṉi gô bwe.

⁷ Ja ntye y’ajong’iṉingô si nogaṉoga gô yô, ko yô jaṉ’ôwong’ômbya gôre waô wi janja yô, gambèṉè yi dèng’ôzaviṉô avila gôr’Anyambyè;

⁸ ndô ja ntye y’ajaṉ’arèndè n’ifalifa, gambèṉè yi re pyèrè n’ôzavô, ni ntyay ya yô ne gô pezô n’ôgôṉi.

⁹ Vangaṉe azw’akamba yeṉo, mongi tondô, azwè bônd’isam̃u imbyamè g’ômwanji waṉi, isam̃u yi re ta n’isungiṉô.

¹⁰ Konde Anyambyè arang’ôm’ombe gô deṽaṉ’ijanji saṉi n’itonda si re ṉwè tum̃inya pa gw’ini nyè, gw’aṉunguṉi ṉwè iyombwi na gô pe nunguṉa ṉwè waô kè.

¹¹ Azwè jônguṉa nè, ôm’edu gôre ṉwè kè e ga rum̃inye mpyô mèmô gô penjavenj’igum̃u kwanga gô ntyay,

¹² ko ṉw’alwaṉa du agera, ndô lwaṉaṉ’ivèrisi ya mongi wi re niva p’impangaṉô v’ibekelya n’isoliṉa.

¹³ Konde gw’avangaṉ’Anyambyè ômpangaṉô n’Abraam, gô re nè, ayolye tang’ôrangô n’ôm’ômwèṉè ômpôlô vyagaṉô na yèmè, arang’ôkuṽi wèmè ôrangô, awulya nè:

¹⁴ Rèti giligili, mi be saviṉo, ko mi buṉiz’awaṉi wo.

¹⁵ Na yeṉo, Abraam sindiṉa pa, alèng’ômpangaṉô.

¹⁶ Sambô aṉaga wi tang’ôrangô gôr’ôma r’ômpôlô vyagaṉô na waô, na gw’impagi saô sôdu ôrangô wi dwaṉiz’igamba.

¹⁷ Yeṉo Anyambyè, mbelaga gô tum̃iny’iṉivisi y’ômpangaṉô vyagaṉô ga nt’are nkenjiṉi yè yi re y’ayolye kalwe, alwaṉiz’igamba gôre n’ôrangô,

¹⁸ gô ntiṉa nè, v’isam̃u imbaṉi yi re y’ayolye kalwe, gô yô kè Anyambyè ayolye nôke, azwè yi re fanga pa gw’izombuṉô, azwè ga lwaṉe n’ôzindyô ôyoli gô kôt’igum̃u nyi re gô bôsô yazô ngèngèngè.

¹⁹ Igum̃u mènyoṉo azw’are na nyô ga nyilô y’iṉiṉa, nyi re rèti, nyi re kè jola; nyi jingiṉa boli gô mbôra ya gare g’ôṉamba wi re diṽiṉô pa;

²⁰ mbôra yi re Yesu igende nyazô jingiṉa pa g’ômwanji wazô, ayè pangô pe miṉisè mpôlô y’egômbe zôdu, gô mpangiṉi yi Mèlkisedèk.