Ebèr 5 - Bibili 1927 (Omyene)

¹ Konde miṉisè mpôlô edu pinjô pa avila gôr’aṉaga yi dôṽyô g’ômwanja w’aṉaga gô janj’eṽilô z’Anyambyè, ko yè jir’intyagô si mpagaga n’intyagô g’ômwanja w’ibe.

² Are ni ngulu yi pôgiṉa waô wi r’imya fo na waô wi fwem̃awem̃a, konde ayèmè kè are kômbiṉô pa ne ndèliṉi.

³ Na g’ômwanja wi ndèliṉi yiṉo are n’isolo nyi jir’intyagô g’ômwanja w’ibe sèmè, na g’ômwanja w’aṉaga.

⁴ E zel’ôma wi bong’inyanga nyiṉo, kaô afweyô n’Anyambyè, ga nt’avegag’Aaron.

⁵ Yeṉo Krist e pa pendy’ôkuṽi wè ayèmè gô twe miṉisè mpôlô, ndô ayè y’awulinyi yè inè: Awè n’Ômwaṉi wam̃, nèṉo wiṉo ajaṉa myè wè!

⁶ ga nte bulyè gô mbôra nyèṉè inè: Awè miṉisè y’egômbe zôdu, gô mpangiṉi yi Mèlkisedèk.

⁷ Ayè kè gw’intyugu s’avegagi yè g’ôzôṉe, arôngi pôlô n’antyoṉi agambiṉa n’ikwen’inkolo gôre yè y’avegagi ni ngulu gô sungiṉè avila gw’ijuwa, n’avôganyô yè konde ayanjiṉi yè Anyambyè;

⁸ ndô vangaṉ’ayè Ômwaṉa, anèngi gô jogiṉô v’isam̃u y’ayenyô yè azingô,

⁹ n’ayè kekizô pa yeṉo, arweṉ’ôvangiṉi w’isungiṉa sa koṉako gôre waôdu wi jogiṉô yè,

¹⁰ n’aṽètyô yè n’Anyambyè inè, miṉisè mpôlô gô mpangiṉi yi Mèlkisedèk.

¹¹ Azw’are n’isam̃u imyenge gô bulya g’ômwanja w’igamba mènyoṉo, isam̃u iyoli gô bènguṉa, konde aṉw’atweṉi dira gô kôtiza.

¹² Konde egômbe siṽa pa zi re ṉwè n’inyanga gô dwaṉ’iṉènji, aṉw’are n’isolo nyi dèng’ôma gô tô nènja ṉwè agamb’alônga m’Anyambyè, aṉw’atweṉi n’isolo ny’ambèṉingô arang’iny’ijoli.

¹³ Konde ôm’edu e jong’ambèṉingô e pa mèna n’igamba ny’ôgôre; konde e p’ar’ekèykèy.

¹⁴ Ndô iny’ijoli si re gôr’aṉôm̃aṉôm̃iye, gôre waô wi re n’irèm̃i yaô mèna pa n’isindiṉa gô mye mbya ni mbe.