Ebèr 4 - Bibili 1927 (Omyene)

¹ Sambô azwè ga ryeṉi, gô p’ar’ômpangaṉô gôre zwè gô jingiṉa gw’ijowi sazô, inè, vende dwaṉ’ôma gôre ṉwè ajeṉô nè, apèṉa.

² Konde azwè kè azw’are n’ômpangaṉô ga waô; ndô igamba ny’agambinyô waô nyi pa nunguṉa waô mpongo, konde nyi pa dèng’ibekelya gôre waô w’ayogyô nyô.

³ Azwè yi re bekelya pa, azwè jingiṉa gw’ijowa, ga nt’are yè bulya pa inè: My’arang’ôrangô gw’eguṉu zam̃ inè: W’ayingiṉe gw’ijowi sam̃! E bulya yeṉo, vangaṉe ṽilô yè y’aliwô y’amazô avila gw’ipangô si ntye.

⁴ Konde are bulya pa kè gô mbôra g’ômwanja wi ntyugu y’ôrwageṉô inè: N’ayowi Anyambyè gô ntyugu y’ôrwageṉô avila gw’ijanji sè sôdu.

⁵ Na gô mbôra yiṉo kè e tô bulya nè: W’ayingiṉe gw’ijowi sam̃!

⁶ Sambô gô re nè, awèwo wi re pô pa gô jingiṉa gô sô, na waô w’alônge panganyô ômpangaṉô wi pa jingiṉa gô sô g’ômwanja w’itwayogiṉô,

⁷ Anyambyè e tô tete ntyugu inè, nèṉo wiṉo, nkambaga gôre David ôling’ôla pyagaṉa pa, ga nt’aliwô bulyô, inè: Nèṉo wiṉo, j’aṉw’ajogw’inyôy nyè, ayolizaṉ’irèm̃i yaṉi.

⁸ Konde arwe nè Yôsua aveṉi waô ijowa, gavoṉo e pa tô kamba g’ômwanja wi ntyugu nyèṉè vyagaṉô.

⁹ Sambô aṉaga w’Anyambyè wi re pigiṉô p’ijowa si ntyugu yi soṉo.

¹⁰ Konde ayè yi jingiṉa gw’ijowa s’Anyambyè e jowa avila gw’ijanji sè, ga nt’ayow’Anyambyè avila gw’isèmè.

¹¹ Sambô azwè ga gèṉize gô jingiṉa gw’ijowa mèsoṉo, vende pôsw’ôma gô mpangiṉi mèmô y’itwayogiṉô.

¹² Konde igamba ny’Anyambyè nyi re bo ni ngulu yi janja, nyi re kè itwa vyagaṉô n’ôkwara wi r’arwa inkôṽa sô mbaṉi; nyi jingiṉa boli kwanga gw’ikera s’ôrèm̃a n’iṉiṉa, kwanga gw’inyôngô n’intyombè; nyô kè nyi re ni ngulu yi my’ipikilya n’ikenja s’ôrèm̃a.

¹³ E zel’ezom̃a kè jumbuṉô pa g’ôzô wa nyô, ndô yom̃a yôdu yi re tele ni nunguṉô pa zange gw’antyo m’ôma mè e be bambya zwè ntangô.

¹⁴ Yeṉo, gô re nè, azw’are ni miṉisè mpôlô, yi re jingiṉa pa boli g’ôrôṽa, inè, Yesu, y’Ômwaṉa w’Anyambyè, azwè ga lwaṉeṉi ngèngèngè gw’ibekelya si mèmô zwè.

¹⁵ Konde azw’azele ni miṉisè mpôlô, yi re y’ayolye pôgiṉ’indèliṉi sazô, ndô azôryô gw’isam̃u yôdu ga nte soryô zwè, ndô e pa janj’ibe.

¹⁶ Sambô azwè ga zevyeṉi pyèrè ni nkagandè gw’eka z’imèpiṉô, ko zwè dènge nkèngo n’imèpiṉô, gô dwaṉa n’iṉunguṉô gô gômbe yi re zwè n’isolo.