Ebèr 3 - Bibili 1927 (Omyene)

¹ Yeṉo, awarer’ayombwi, wi re bonga pe mbela y’ôrôṽa, vikilyaṉ’erôm̃i ni miṉisè mpôlô y’ibekelya si mèmô zwè, inè, Yesu,

² avegag’ôma re ko bekelyô gôre yè y’alôṽi yè, ga nt’avegagi Môsès gô nagô yè yôdu.

³ Konde ayenyô n’inyanga ny’ivenda vyagaṉô ni Môsès ga nt’are yè y’aṉôgi nagô n’ôlubô vyagaṉô ni nagô yômè.

⁴ Nagw’edu yi nôgô n’ôma, ndô ayè y’avangi yom̃a yôdu n’Anyambyè.

⁵ Môsès alwaṉ’ôma re ko bekelyô gô nagô yôdu y’Anyambyè, ga nyôngô, gô takilya g’ômwanja w’isam̃u y’avegagi gô kambô;

⁶ ndô Krist, alôṽyô gô nagô yè, ga Ômwaṉa, ni nagô yè ne zwè, j’azw’akôta ngèngèngè ibekelyi sazô n’igum̃u ny’isôgwi sazô kwanga gô ntyay.

⁷ Yeṉo, ga nte buly’Iṉiṉ’Iṽya inè: Nèṉo wiṉo, j’aṉw’ajogw’inyôy nyè, ayolizaṉ’irèm̃i yaṉi,

⁸ ga gw’egômbe z’ipava, gô ntyugu y’idemba gw’itôve,

⁹ gw’alembyô myè n’ireri saṉi gô kèṉiza myè, vangaṉe w’ayeṉ’ijanji sam̃ agôm̃i m’impum̃’anay.

¹⁰ Yeṉo aṽendi myè n’iṽôm̃a mènyoṉo, awulya nè: Wi r’egômbe zôdu n’irèm̃a n’ifwem̃awem̃a; wi pa mya kè intyale sam̃.

¹¹ Yeṉo arangi my’ôrangô gw’eguṉu zam̃ inè: W’ayingiṉe gw’ijowi sam̃.

¹² Ṽandam̃iṉaṉi, awarera, vende dwaṉ’ôma gôre ṉwè n’ôrèm̃’ômbe n’itwayivira, ko yè dubwa avila gôr’Anyambyè ya bo.

¹³ Ndô revuaṉaṉi ntyugw’edu, gô p’ar’ôm̃anda, gô p’are ṉwè n’inyanga nyi bulya nè: Nèṉo wiṉo! e vende dwaṉ’ôma gôre ṉwè wi jolizô ôrèm̃a n’itemiza s’ibe.

¹⁴ Konde j’azw’akôta ngèngèngè kwanga gô ntyay ibekelya s’avegagi na zwè gw’ipakilya, gambèṉè azw’adwaṉ’iwongisi yi Krist,

¹⁵ gô p’are bulyô pa inè: Nèṉo wiṉo, j’aṉw’ajogw’inyôy nyè, ayolizaṉ’irèm̃i yaṉi, ga gw’egômbe z’ipava.

¹⁶ Konde wa mande w’avavi, waô jogo pa nyô, aranga waôdu w’agogwi avila gw’Egipt w’agèndyô ne Môsès?

¹⁷ Na wa mande w’aṽendinyô n’Anyambyè agôm̃i m’impum̃’anay, aranga waô w’ayanj’ibe, ko bende yaô pôswa gw’itôve?

¹⁸ Wa mande kè w’aranginyô yè ôrangô inè, w’ayingiṉe gw’ijowi sè, aranga waô w’avegagi n’itwayogiṉô?

¹⁹ Yeṉo kè, azwè jeṉa nè, wi pa jolya gô jingiṉa gô sô g’ômwanja w’itwayivira.