Ebèr 2 - Bibili 1927 (Omyene)

¹ Gô ntiṉa yiṉo azwè ga vikilye isam̃u y’ayogyô zwè mbyambye vyagaṉô, azwè vende perya yô.

² Konde j’igamba ny’agambyô ne iyenjèl ny’arweṉi jolajola, na j’ipavy’edu n’itwayogiṉô sôdu s’alèng’ôgôm̃a w’avegagi kwèkwè,

³ gambèṉè azwè be pera sèṉi j’azw’apôz’isungiṉ’ipôlô siṉo, s’alônge kambyô ne Rerè, ko sô jolizô gôre zwè ne waô w’ayogyô sô,

⁴ Anyambyè aṉunguṉ’agambi maô vo lemba n’isam̃u yi mamô, n’aṉongo mi lemba am̃enge, na vo ipô s’Iṉiṉ’Iṽya, kerô pa ga nt’are ntondiṉi yè?

⁵ Konde Anyambyè pa fwele ntye yi re gô bya yi kambô zwè gô ngulu y’iyenjèl.

⁶ Ndô ar’ôma takilya pa gô mbôra inè: Ôma ezom̃a nde zi re wè ko jônginyè, ge Ômwaṉa w’ôma ko wè balè?

⁷ W’azônyi yè vo mw’egômbe vyagaṉô n’iyenjèl, w’aworizi yè kôrôṽa y’ivenda n’ôlubô,

⁸ ô re fwela pe yom̃a yôdu g’ôdôlôngô w’intyôzô sè. Konde gw’aweli yè yom̃a yôdu gô ngulu yè, Anyambyè e pa dèkiz’ezom̃’edu zi re yè e pa fwela gô ngulu yè. Ndô vèṉo azwè pa jeṉe yom̃a yôdu fwelô pa gô ngulu yè.

⁹ Ndô Yesu, y’azônyô vo mw’egômbe vyagaṉô n’iyenjèl, azwè jeṉè boryô pe kôrôṽa y’ivenda n’ôlubô, g’ômwanja w’ijuwa s’ayenyô yè azingô, inè, v’imèpiṉô s’Anyambyè, ayeṉ’azingô m’ijuwa g’ômwanja w’aṉaga waôdu.

¹⁰ Konde avegagi kwèkwè gôre yè, ayè y’avangiṉô yom̃a yôdu, n’ayè y’avangi yom̃a yôdu, gw’aṽeli yè gô bag’awaṉ’awenge gw’ivenda, gô kekiz’ôveṉisi w’isungiṉi saô v’isindiṉ’azingô.

¹¹ Konde ayè yi mèpiza na waô wi mèpizô waôdu wi pila gôr’ôm̃ori. Yeṉo e pa jeṉe ntyoṉi gô fweya waô inè, awarerè, gô bulyè inè:

¹² Mi be myez’ini nyo gôr’awareri yam̃, mi be sum̃inyo gô gare yi mandô.

¹³ Na inè: Mi be bekelyo. Na inè: Vôna myè n’awaṉa wi r’Anyambyè pa pa myè.

¹⁴ Sambô gô re nè, awaṉa wi bonge ntyiṉa n’ôzôṉe, ayèmè kè awongi mpangiṉi mèmô, inè, v’ijuwi sè, e ga yiliz’ôma mè wi re ni ngulu y’ijuwa, ayè ne Satan,

¹⁵ ko yè panga waôdu yangayanga, waô w’avegagi em̃èṉo zaô zôdu tugizô pa n’itya s’ijuwa.

¹⁶ Konde rèti e pa nunguṉe du iyenjèl, ndô awaṉa w’Abraam.

¹⁷ Yeṉo, avegagi n’isolo gôre yè gô pangô egolaṉi g’awareri yè gw’isam̃u yôdu, ko yè dwaṉe miṉisè mpôlô yi nkèngo na y’ibekelyô gw’eṽilô z’Anyambyè, gô taṽe mpungu y’ibe s’aṉaga;

¹⁸ konde ayèmè soryô pa g’ôsam̃u w’ayenyô yè azingô, ayè ko jolya kè gô nunguṉa waô wi soryô.