Ebèr 13 - Bibili 1927 (Omyene)

¹ Gongwaṉi gw’itonda s’awarerè.

² Aleṽaṉaṉi gô dwaṉa n’ôyôgô gôr’aṉaga; konde vo wô awèwo w’ayinginy’iyenjèl, ko w’amya.

³ Yônginyaṉi mongi wi re gw’intyôgô, mpaṉi ga ṉwè kè, are na waô gô ntyôgô; na waô wi dendiṉô mbe, konde aṉwèmè kè aṉwè p’are g’ôkuṽa.

⁴ Ijômbaṉa si ga lwaṉe n’ôlubaṉô gôr’aṉaga waôdu, ko ôdô w’awevizô, konde Anyambyè e be jèkèlye belaṉi na mongi wi dèwa na wi ngaṉi.

⁵ Lwaṉaṉ’ôgasô wi sika fo, ko dwaṉaṉi dwèrè ni yom̃a yi re na ṉwè, konde Anyambyè ayèmè are bulya pa inè: My’arige wè du ge falo.

⁶ Sambô azwè ko bulya ni nkagandè inè: Rerè n’ôṉunguṉi wam̃, my’ary’ezom̃a du; mwôṉaga ko jolye denda myè ande?

⁷ Yônginyaṉ’iṉènji yaṉi y’agambiṉi ṉwè igamba ny’Anyambyè; vikilyareṉi ntyay yi m̃èṉo yaô, ko pèraṉ’ibekelyi saô.

⁸ Yesu‐Krist ar’egolaṉi emô jaô, na ṉèṉo, na kwanga gw’egômbe zôdu.

⁹ Arwaṉôṉi n’aṉongo m’inènj’ijoṉa, konde re mbya inè, ôrèm̃a wi ga yolizô n’imèpiṉô, n’aranga n’inya si re si pa nunguṉe mpongo gôre waô w’aṽandam̃iṉagi sô.

¹⁰ Azw’are ni mbôra yi jirô intyagô yi re waô wi janj’eṽilô gô nagô y’ikuku wi zele n’inyanga gô nya vovo.

¹¹ Inyam̃a mèsoṉo si re bagô pe ntyiṉi yaô gô mbôra y’ôrunda ne miṉisè mpôlô g’ômwanja w’ibe, bende ya sô yi pezô gw’igala ny’ôlakô.

¹² Yeṉo Yesu kè, gô ntiṉa nè, e ga m̃èpiz’aṉaga vo ntyiṉi yèmè, ayeṉ’azingô gw’igala nyi nkala.

¹³ Sambô azwè ga gogweṉi gô kènda gôre yè gw’igala ny’ôlakô, ntwaṉage ntyoṉi y’ajeṉô yè.

¹⁴ Konde azw’azele vèṉo ni nkala yi dinga, ndô azwè buta mèyoṉo yi re gô bya.

¹⁵ Vo yè azwè ga yiriṉ’Anyambyè ntyagô y’isum̃inya egômbe zôdu, nyi pivya nè, ilônda y’iṉumbu ya mongi wi mèm’ini nyè.

¹⁶ Ndô aleṽaṉaṉi gô dende mbya na gô dwaṉa n’ôyôgô, konde Anyambyè e tond’intyagô ôṉongo mèwoṉo.

¹⁷ Yogiṉôṉ’iṉènji yaṉi, ko tugizaṉ’ikuṽi yaṉi gôre waô, konde wi bandam̃iṉ’aṉiṉi maṉi g’aṉaga wi be bambyô ntangô; e ga lwaṉe yeṉo, gambèṉè gô be bambyô waô ntangô mè, wi ga lwaṉe n’igeṽa, n’aranga n’ekèṽa, konde ekèṽi zaô zi zele n’ôba gôre ṉwè.

¹⁸ Gambiṉaṉi g’ômwanji wazô; konde azwè bekelya nè, azw’are n’irèm̃’imbya, mbelaga gô dwaṉa mbyambye gw’isam̃u yôdu.

¹⁹ Mi kwena ṉwè inkolo vyagaṉô pôlô gô denda yeṉo, gô ntiṉa nè, mi ga zunge fwiṉizô gôre ṉwè vyagaṉô.

²⁰ Anyambyè y’am̃ènjè, y’arônguny’Ôvangiṉi wazô Yesu y’Ôvenjavenj’ômpôlô w’adombè avila gw’ijuwa vo ntyiṉa yi njeka ya koṉako,

²¹ e ga m̃èpize ṉwè gw’eṽilô edu eṽya gô dende ntondiṉi yè, njanjaga gôre zwè ezom̃a zi tondô gw’antyo mè, vo Yesu‐Krist; gôre yè ga lwaṉ’ivenda gô koṉako! Amèn!

²² Mi kwena ṉwè inkolo, awarera, inè, zindiṉaṉ’agamba miṉo m’ôrevuṉô, konde my’are tèndiṉa pa ṉwè n’agamb’amèwo.

²³ Aṉw’avôrô nè, ’mwareri yazô Timôte are dèkizô pa dyè; j’asunge bya, gambèṉè mi be jeṉa ṉwè na yè.

²⁴ Zanguṉaṉ’iṉènji yaṉi yôdu n’iyombwi yôdu. Mongi Italya wi sanguṉa ṉwè.

²⁵ Imèpiṉô si ga lwaṉe na ṉwèdu! Amèn!