Ebèr 12 - Bibili 1927 (Omyene)

¹ Sambô gôre zwè kè kômbiṉô pa ne nkumba mpôlô yiṉo y’iyeṉi, azwè ga rig’irwanw’edu n’ibe si tagaraga zwè, ko zwè pale mangô n’isoliṉa g’ôlembyaṉô wi re dôṽinyô pa zwè,

² mpônage Yesu, ewônjô n’ôma wi sukiz’ibekelyi sazô, ayeṉ’azingô mi krosi, mpèdyage ntyoṉi, v’igeṽa ny’aviginyô yè, are dwaṉa pa kè baru g’ôg’ôṉôm̃yè w’eka z’Anyambyè.

³ Vikilyareṉi yè y’azindiṉi g’ôkuṽi wè isira ôṉongo wiṉo s’aziryô yè n’aṉag’aṽe, aṉwè vende jasa, agènde ntyèla gw’irèm̃i yaṉi.

⁴ Aṉwè pa sir’ibe kwanga gô pôvizô ntyiṉa, nwagaga n’ibe.

⁵ Aṉw’are deṽaṉa pa kè ôrevuṉô wi kamba na ṉwè g’awaṉa inè: ’Mwam̃, aṽèdy’ôgôm̃a wa Rerè, ge kènde ntyèla gô sèmbè wè;

⁶ konde ayè yi tondô ne Rerè ayè sônyô yè ôgôm̃a, aziṽ’ômwaṉa edu wi bongô yè.

⁷ Zindiṉaṉ’ôgôm̃a: Anyambyè e dendiṉa ṉwè g’awaṉa; konde ômwaṉa weṉi wi re azôny’ôgôm̃a ne reri yè?

⁸ Ndô j’aṉw’adwaṉ’ôgôm̃a fo wi dèngô n’aṉaga waôdu, gambèṉè aṉwè awaṉa w’aronda, n’arang’awaṉawaṉiye.

⁹ Vyagaṉô n’igamba mè, gô re nè, azw’avegagi n’ireri sazô ga nt’ar’ôzôṉe s’azônyagi zwè igôm̃a, ko zwè bimbya waô, ko pôrô azw’arugiz’ikuṽi yazô vyagaṉô gôre Rerè y’aṉiṉa, gô dènge mèṉo?

¹⁰ Ireri sazô s’azônyagi zwè igôm̃a v’intyugu sa kwè, ga nt’ayeṉi waô kwèkwè; ndô Anyambyè e sônya zw’igôm̃a gô mbyi yazô, ko zwè dwaṉ’iwongisi yi nkèrè yè.

¹¹ E zel’ôgôm̃a wi jeṉ’ômbya gw’ipakilya, ndô kaô ômbe, ndô avila vovo wi jaṉ’ilônda y’am̃ènjè m’ôgôre gôre waô wi re sindiṉa pa wô.

¹² Sambô yolyaṉ’ago maṉi mi re pogwa pa n’ampuṽi maṉi alèli;

¹³ ko sôngaṉi n’agôlô maṉi impoṉo sa gôre, ko bôke y’ayèrwa, ndô yi ga rô jingô.

¹⁴ Wutaṉ’am̃ènjè n’aṉaga waôdu, n’imèpizô si re ja si zele e zel’ôma be jeṉe Rerè.

¹⁵ Ṽandam̃iṉaṉi vende dwaṉ’ôma wi pèṉ’imèpiṉô s’Anyambyè; vende dwaṉ’ôramba wi nôṉe, wi fwelya, azokolya, ko awenge fwevizô ne wô;

¹⁶ vende dwaṉ’ebelaṉi ge ôṽèdisi w’Anyambyè egolaṉi g’Esau, agôl’inyangi nyè ny’ôṉèro vo inyi mô.

¹⁷ Aṉw’avôrô inè, avila vovo gw’aṽeli yè gô dèng’ôzaviṉô, awalyô, konde e pa dènga du mbôra yi nige nkôndi, vangaṉe awuti wô n’antyoṉi.

¹⁸ Konde aṉw’azele bya pa gô nômba yi re ko jolye bwatô y’aṽam̃iṉagi n’ôgôṉi, ge n’evindi, ge ni mpiri, ge n’ôgul’ômpôlô,

¹⁹ ge gw’itôngô s’ôrombo, ge ôtogo w’agamba, wi re waô w’ayogyô wô w’agwen’inkolo nè, arô kambô igamba gôre waô nyèṉè,

²⁰ konde wi pa jolye sindiṉ’ôsam̃u mèwoṉo w’amyezô nè: Ja vangaṉe nyam̃a y’abwate nômbagambèṉè yi ga vungô adô.

²¹ N’ôsam̃u mèwoṉo w’avegag’erery’evôlô gô jeṉô kwanga gôre Môsès gô bulya nè: Mi tya ntyeṉi mbe aratam̃iṉa!

²² Ndô aṉw’are bya pa gô nômba yi Siyôn, na gô nkala y’Anyambyè ya bo, Yerusalèm y’ôrôṽa, na gw’imbèli s’iyenjèl si re ntangô fo,

²³ na g’ôlataṉ’ômpôlô w’injalyè si r’ani maô tèndô pa g’ôrôṽa, na gôr’Anyambyè y’ôyèkèli waôdu, n’aṉiṉa m’aṉaga w’agôre mèpa pa,

²⁴ na gôre Yesu, y’ôgaṉisi wi njeka nyoṉa, na gô ntyiṉa yi nyènyô yi kamb’isam̃u imbya vyagaṉô ni ntyiṉa y’Abèl.

²⁵ Ṽandam̃iṉaṉi ko aṽikaṉi gô jogo yè yi kamba; konde gambô mongi mèsoṉo w’aṽiki gô jogo yè y’agambagi na waô agamba gô ntye wi pa dènge ngulu yi pera, ko pôrô zwè azwè be pera sèṉi, j’azw’akegwa avila gôre yè yi kamba avila g’ôrôṽa,

²⁶ ayè yi r’inyôy nyè ny’azugi ntye egômbe mèzoṉo, ndô vèṉo are pangaṉa p’ômpangaṉô wiṉo inè: Nyongo nyèṉè mi be suga arange ntye yiṉo dadyè, ndô ôrôṽa kè.

²⁷ Agamba miṉo inè: Nyongo nyèṉè, mi pivya nè, ikaluṉa s’isam̃u mèyoṉo yi re sugyazugyô pa, ga yom̃a yi re pangô pa gw’egômbe, ko yom̃a mèyoṉo yi re yi pa sugô tigaṉa.

²⁸ Yeṉo konde azwè dèng’iṉongo nyi re ny’ayolye sugyazugyô, azwè ga rev’akeṽi mazô mpagag’Anyambyè isaviṉa si tondô yè, n’ijanjiṉa s’Anyambyè, n’itya,

²⁹ konde Anyambyè yazô kè n’ôgôṉi wi jilize njilizaga.