Ebèr 11 - Bibili 1927 (Omyene)

¹ Ibekelya n’igum̃u iyoli g’ômwanja w’isam̃u yi deṽiṉô zwè, n’agamba m’isam̃u yi re yi pa jeṉô.

² V’ibekelyi saô aṉag’alônga w’alèng’elum̃i eṽya.

³ V’ibekelya e mya zwè inè, ntye y’avangyô n’igamba ny’Anyambyè, yeṉo yom̃a yi jeṉô yi pa pangô ni yom̃a yi re ko jeṉô.

⁴ V’ibekelya Abèl ayiriṉ’Anyambyè ntyagô mbya vyagaṉô na y’ayiryô Kayin; vo sô amyezô yè inè, ar’ôgôre, Anyambyè ntankilyaga g’ômwanja w’intyagô sè si mpagaga; na v’ibekelya mè vangaṉe ayè pe kamba, ge ayè juwa pa.

⁵ V’ibekelya Enok awongyô ko yè ayeṉ’ijuwa, yeṉo e pa dèngô du konde Anyambyè awongi yè; konde ayè wongôgô ro, aliwô adèng’agamba miṉo inè, arondy’Anyambyè.

⁶ N’ibekelya fo ôm’ayolye tondye yè, konde ayè yi bya gôr’Anyambyè e ga ṽekelye nè, Anyambyè are, na inè, e be pa waô wi butè ipa.

⁷ V’ibekelya Nôa, myezô pa n’Anyambyè g’ômwanja w’isam̃u yi re yi pa twa gô jeṉô, agôtyô n’itya, agekiz’ôwatanga gô sungiṉe nagô yè; vo sô aveṉi ntye ôgara, arw’ôṉivisi w’ôgôre w’alèngyô yè v’ibekelya mè.

⁸ V’ibekelya Abraam, gw’aweyô yè, ayiviri gô tôra agènda gô mbôra y’avegagi yè gô bonga g’ijiga, n’agèndi yè ko yè amye mbôra yi kèndô yè.

⁹ V’ibekelya alwaṉi yè gô ntye y’ômpangaṉô, egolaṉi ga gô ntye yi ngaṉi, ndwaṉaga gw’inagô s’akuku, ayè n’Izaak, ni Yakob, irigô na yè g’ômpangaṉô mèmô.

¹⁰ Konde avôndagi nkala yi re dôṽyô pa ngèngèngè; yi r’ôṉôgisi n’ôvangi wa yô n’Anyambyè.

¹¹ V’ibekelya Sara, vangaṉ’aliwô adômbiṉi, alèngi ngulu yi pundig’inyem̃e, konde aṽekelyi yè y’avangaṉ’ômpangaṉô, ayè yi re n’inyanga nyi bekelyô.

¹² Yeṉo avila gôr’ôm̃ori dadyè, n’ayè mpaṉi ga juwa pa, ayanyô awaṉ’awenge egolaṉi g’igègèṉi y’ôrôṽa, egolaṉi g’ôzègè wi mbeṉe wi re w’ayolye tangô.

¹³ Aṉaga wiṉo waôdu w’ayuwi gw’ibekelya, ko w’alèng’isam̃u y’avanganyô; ndô w’ayeṉi yô azanguṉa yô bô, mèmaga nè, waô awôga n’agènda gô ntye yiṉo.

¹⁴ Waô wi kamb’isam̃u ôṉongo wiṉo wi teva nè, wi bute ntye yi be dwaṉô waô.

¹⁵ Arwe nè, w’aṉaki ntye mèyoṉo y’arôryô waô, gavoṉo w’arô dèngi mpoṉo yi fwinya gô yô.

¹⁶ Ndô vèṉo wi jônguṉe ntye mbya mè vyagaṉô, yô ne ôrôṽa. Yeṉo Anyambyè e pa jeṉe ntyoṉi gô fweyô inè, Anyambyè yaô, konde are kekiza pa waô nkala.

¹⁷ V’ibekelya Abraam, gw’agèṉizyô yè n’Anyambyè, ayir’Izaak ntyagô; yeṉo ayè y’aliwô adèng’impangaṉô, ayir’ômwaṉi wè ikiki nyè iṉôm̃e ntyagô,

¹⁸ vangaṉ’awulyô yè inè: Awaṉi wo wi be dwaṉa avila gôr’Izaak.

¹⁹ Avikilyi nè, Anyambyè are ni ngulu, vangaṉe gô tôngunya avila gw’ijuwa; n’arô dèngyè yè mpaṉi ga tôngunyô pa avila gw’ijuwa.

²⁰ V’ibekelya Izaak azaviṉi Yakob n’Esau, g’ômwanja w’isam̃u yi re gô bya.

²¹ V’ibekelya Yakob, gw’aluki yè gô juwa, azaviṉ’ôm’edu gôr’awaṉa wi Yôsèf, azaviṉ’Anyambyè, minyag’ôkuṽi wè gô nkogu yè.

²² V’ibekelya Yôsèf, gw’arweṉi yè pyèrè gô juwa, agambi g’ômwanja w’idubwa s’awaṉa w’Israèl avila gw’Egipt, n’aveṉi yè izômbyô g’ômwanja wi pi yè.

²³ V’ibekelya Môsès, ayè jaṉô pa, ayumbunyô n’izombi yè agwèli ararô, konde w’ayeṉi nè, ômwaṉa avegag’ômbya, ko w’ary’ôzômbyô w’ôga.

²⁴ V’ibekelya Môsès, ayè twa p’ôma, aṽiki gô fweyô inè, ômwaṉa w’ômwaṉ’ômwantô wi Faraô,

²⁵ ntondaga gô jeṉizô azingô ta na mongi Anyambyè, vyagaṉô na gô dèng’ambya m’ibe vo mw’ôlingô,

²⁶ konde ayeṉ’ipèdyô g’ômwanja wi Krist g’agumb’ambya vyagaṉô n’agumba m’Egipt, konde avikilyagi nt’ar’ipa si be pô yè n’Anyambyè.

²⁷ V’ibekelya alubwi avila gw’Egipt, ko yè arya du eguṉu z’ôga, konde alwaṉi ngèngèngè, egolaṉi ga e jeṉ’ayè yi re y’ayolye jeṉô.

²⁸ V’ibekelya alendi Paki, anyènye ntyiṉa, ko ôyilisi agôza du injalyè sa mongi Israèl.

²⁹ V’ibekelya alali mbeṉe mbondi, egolaṉi ga mbôra ya kakaka; ndô gw’agèṉizi mongi Egipt gô denda yeṉo, w’alom̃iṉi.

³⁰ V’ibekelya avôsw’ikômba s’adô si Yerikô, sô pingwavingwô pa ntyugu ôrwageṉô.

³¹ V’ibekelya Raab y’evôvevôve e pa jilizô ta n’ivavisi, konde ayinginy’iloliṉi n’am̃ènjè.

³² N’ande em̃ori zi be tô bulyô myè? Konde egômbe zi be pera myè ja my’akamba g’ômwanja wi Gidyôn, na g’ômwanja wi Barak, na g’ômwanja wi Samson, na g’ômwanja wi Yefta, na g’ômwanja wi David, na g’ômwanja wi Samuèl, na g’ômwanja w’ivogisi,

³³ wi re v’ibekelyi saô w’ageṽ’ipangiṉa, w’ayanj’ôgôre, w’alèng’impangaṉô, w’aṉunj’agwaṉa m’iliyoni,

³⁴ w’aṉim̃i ngulu y’ôgôṉi, w’averi avila g’ôkwara, w’ayingyô avila gw’inkaṉi saô, w’avegagi ngulu gw’igoṽi, w’awangiz’imbèli s’aṉongw’am̃ori.

³⁵ Antô w’arô dèngi bende yaô bo v’itôngunyô; am̃ori w’ayeṉizô azingô, ndô wi pa jivira du gô danduṉô inè, wi ga lèng’itôngunyô sibya mè vyagaṉô;

³⁶ n’am̃ori w’alembyô n’isèlyô n’iziṽô, n’azungakaṉô n’intyôgô;

³⁷ w’avungyô adô, w’ayarunyô mbwa ni gwasa, w’alembyô, w’ayônyô n’ikwara, w’awôlangaṉagi bora pe banda y’adombè ni banda y’imbôṉi, w’avegagi jela pa nkôṽy’edu, w’agombizyô, alendiṉô mbe;

³⁸ ntye yiṉo yi re pegege n’inyanga gôr’aṉaga mèwoṉo; w’awôlangaṉagi gw’itôve na gw’inômba, na gw’impulungu na gw’impôgôṉi yi ntye.

³⁹ Mongi mèsoṉo waôdu, w’azum̃inyô g’ômwanja w’ibekelyi saô, ndô wi pa dènga du ôsam̃u w’avanganyô gôre waô,

⁴⁰ konde Anyambyè agenjiṉi zwè ôsam̃u ômbya mè vyagaṉô, ko mongi mèsoṉo w’azukiz’imèpa kaô du na zwè.