Ebèr 10 - Bibili 1927 (Omyene)

¹ Konde ivanga, nyi r’iviri ny’isam̃u imbya yi re gô bya, arange ntindi y’isam̃u mè rèti, ny’ayolye du gô mèpiza waô wi bya gô saviṉa, v’intyagô mèsoṉo si jirô pèkèpèkè ômpum̃y’edu.

² J’aranga yeṉo, gavoṉo s’arigô gô jirô konde nè, waô wi saviṉa yeṉo, waô jombunyô pa, w’arô suryô n’ibe gw’irèm̃i yaô?

³ Ndô ijônginya s’ibe si tô kôta gw’intyagô siṉo ômpum̃y’edu;

⁴ konde ayolye dwaṉe nè, ntyiṉa y’inyare iṉôm̃e na y’imbôṉi ko tômb’ibe.

⁵ Yeṉo gw’aṽyeṉi Krist gô ntye yiṉo, awulyi nè: Ô pa bel’intyagô ge intyagô si mpagaga, ndô ô re pangiṉa pa myè ôkuṽa;

⁶ ô pa jeṉe mbya n’intyagô si pezô ge intyagô si jirô g’ômwanja w’ibe.

⁷ Vovo awulyi myè inè: Vôna, mi bya (g’ômpuragô w’ezangô zi re tèndô pa g’ômwanji wam̃), Anyambyè, gô dende ntondiṉi yo.

⁸ Ayè bulya pa yeṉo inè: Intyagô, ge intyagô si mpagaga, ge intyagô si pezô, ge intyagô si jirô g’ômwanja w’ibe, ô pa jeṉa sô mbya (mèsoṉo si jirô ga nt’ar’ivanga),

⁹ vovo awulyi yè inè: Vôna, mi bya gô dende ntondiṉi yo. Yeṉo e tômb’ezom̃’elônga, ko yè dwaṉiza zi ṽaṉi.

¹⁰ Vo ntondiṉi mèyoṉo azw’are jombunyô pa v’ijira s’ôkuṽa wi Krist, nyongo mori v’egômbe zôdu.

¹¹ Na ga nt’are miṉisè edu e dende ntyugw’edu eṽilô zè ayir’inyongo sinyenge intyagô mèmô si re s’ayolye du gô tômb’ibe,

¹² Krist, ayè jira pe ntyagô mori dadyè g’ômwanja w’ibe, alwaṉi baru g’ôg’ôṉôm̃yè w’Anyambyè egômbe zôdu,

¹³ mbôndaga kaô ilôvalôvi yè y’apangô iyariṉô ny’agôlô mè.

¹⁴ Konde vo ntyagô mori dadyè are mèpiza pa waô wi re jombunya p’egômbe zôdu.

¹⁵ N’Iṉiṉ’Iṽya kè nyi takilya zwè ndaga mè, konde ayè bulya pa inè:

¹⁶ Yiṉo ne njeka yi be jeka myè na waô, intyugu mèsoṉo pyagaṉa pa, bulye Rerè: mi be fwel’ampangi mam̃ gw’irèm̃i yaô, ko mi tènda mô gw’igu yaô,

¹⁷ vovo e kunda nè: Ibe saô n’ifwem̃i saô my’ayônginye sô nyèṉè.

¹⁸ Sambô, mbôra yi r’inyezô s’ibe, vovo e zele nyèṉè ntyagô yi jirô g’ômwanja w’ibe.

¹⁹ Sambô, awarera, gô re nè, azw’are yangayanga gô jingiṉa gô mbôra y’ôrunda vo ntyiṉa yi Yesu,

²⁰ vo mpoṉo nyoṉa na ya bo w’avangiṉi yè zwè gô tôliza pwese g’ôṉamba wi re diṽiṉô pa, nyi pivya nè, ôzôṉe wè,

²¹ na gô re nè, azw’are ni miṉisè mpôlô yi re dôṽyô pa gô nagô y’Anyambyè,

²² azwè ga zuseṉi pyèrè n’irèm̃a ya rèti, n’ibekely’ijoli, irèm̃i yazô jombunyô pa avila gw’ipikily’ibe,

²³ n’ikuṽi yazô jôvuṉô pa n’aṉingô mi nkèrè. Azwè ga gôteṉ’ imèma s’igum̃u nyazô ngèngèngè, konde ayè y’avangaṉ’ômpangaṉô are n’inyanga nyi bekelyô.

²⁴ Azwè ga vikilyeṉi gô nugyaṉa gw’itonda na gô ṽilô ṽya.

²⁵ Azw’ariga gô dataṉa ta, ga nte dend’awèwo; ndô azwè ya revuaṉeṉi pôlô, na pôsô konde aṉwè jeṉa nè, ntyugu yi susa pyèrè.

²⁶ Konde j’azw’afwem̃a ni nkanda, azwè dènga p’imya s’ôrèti, e zele nyèṉè ntyagô yi jirô g’ômwanja w’ibe,

²⁷ ndô kaô ipônda s’ererya s’ijèkèlya ni mpyô y’ôgôṉi wi be ny’ivavisi.

²⁸ Ayè yi re pava p’ivanga nyi Môsès e juwa ipôgiṉa fo, j’adwaṉ’iyeṉ’imbaṉi ntyo irarô;

²⁹ ndô vikilyareṉi ntôra y’ôgôm̃’ômpôlô nde wi be sônyô yè yi re jara p’Ômwaṉa w’Anyambyè n’agôlô, arange ntyiṉa yi njeka, y’ayombunyô yè, ezom̃a z’enyale, ko yè toṽ’Iṉiṉa ny’imèpiṉô?

³⁰ Konde azw’avôrô yè yi re bulya pa inè: Ekôlè izam̃, myèmè mi be fwiza zô! na inè: Rerè è be jèkèly’aṉagi wè.

³¹ Ar’ôsam̃u w’ererya gô pôswa gw’ago m’Anyambyè ya bo.

³² Yônginyareṉ’intyugu inônga, gw’azindiṉi ṉwè, aṉwè jenjizô pa, aṉw’azindiṉ’igoṽ’ivôlô ny’azingô,

³³ gw’avangyô ṉwè gô jeṉô gw’ipèdyô, n’azingô, n’avila vovo, gw’arweṉi ṉwè iwongisi na waô w’alendiṉô yeṉo.

³⁴ Konde aṉw’avôgiṉi waô w’avegagi gô ntyôgô, azindiṉa kè ikwèrô s’igumbi nyaṉi ni mbya, myagaga nè, aṉw’are n’igumb’iṽya mè vyagaṉô na nyi dinga kè.

³⁵ Sambô arigaṉ’abeko maṉi konde mi re n’ôlub’ômpôlô.

³⁶ Konde aṉw’are n’isolo ny’isoliṉa, inè, aṉwè denda pe ntondiṉi y’Anyambyè, aṉwè ga lèng’ômpangaṉô.

³⁷ Atigaṉ’ôlingô wa kwè, gambèṉè ayè yi bya e be bya, e ze tô dinge kè.

³⁸ Ômi wam̃ w’ôgôre e be dwaṉa bo v’ibekelya; ndô j’afwinya ni nyum̃a, gambèṉè ôrèm̃i wam̃ ayeṉe yè mbya nyèṉè.

³⁹ Azwè, azw’azele gô ntangô ya mongi wi fwinya ni nyum̃a gw’ijilizô, ndô ya waô wi re n’ibekelya gw’isungiṉa s’aṉiṉi maô.