Danyèl 12 - Bibili 1927 (Omyene)

¹ Gw’egômbe mèzoṉo, Mikaèl e be kum̃aṉa, ôvangiṉ’ômpôlô, ôgaṉisi w’awaṉa w’iṉongo nyo; egômbe mèzoṉo zi be dwaṉ’egômbe zi njuke, ôṉongo wi njuke yi re yi pa dwaṉa ni mori aṉongo ga dwaṉe kwanga gw’egômbe mèzoṉo. Gw’egômbe mèzoṉo mongi w’iṉongo nyo wi be dèngô tèndô pa gw’ezangô wi be sungiṉô.

² Awèwo gôre waô wi dèwa gô ntyèngè yi ntye wi be nongwa, awèwo gw’em̃èṉo za koṉako, n’awèwo gw’asayi, na gô ntyoṉi ya koṉako.

³ Waô w’alwaṉi n’ikôtiza wi be bamba g’ibamba s’ôrôṽa, na waô w’aṉènj’ôgôre gôr’awenge wi be bamba ga igègèṉi pèkèpèkè na gô koṉako.

⁴ Ndô awè, Danyèl, yumbuṉ’agamba miṉo, ko dingily’ezangô kwanga gw’egômbe zi ntyay. Egômbe mè awenge wi be tanguṉa, zô n’imya si be kundô.

⁵ Na myè, Danyèl, my’avôni, na vôna, aṉôm̃e awèṉè aṽaṉi w’agum̃aṉi gôre, ôm̃ori g’ôzamba wiṉo w’ôloṽi, n’ôm̃ori g’ôzamb’ôm̃ori w’ôlôṽi.

⁶ Ôm̃ori gôre waô awuliny’ôma w’avegagi bora p’ivèla, avegagi kum̃aṉa pa g’ôlômba w’aṉingô m’ôloṽi inè: Ôlingô sè wi be dwaṉe ntyay y’isam̃u yiṉo yi mamô?

⁷ N’ayogyô myè ôma w’avegagi bora p’ivèla, avegagi kum̃aṉa pa g’ôlômba w’aṉingô m’ôloṽi; arômbiṉ’ôgo wè ônôm̃yè n’ônyantwè g’ôrôṽa, n’arangi yè ôrangô vo yè yi dwaṉa gô koṉako inè, ntyay yi be dwaṉa gw’egômbe, gômbe, na gw’ereṉe z’egômbe, na inè, isam̃u yiṉo yôdu yi be maṉa gô be nyigyanyigyô ngulu y’iṉongo ny’ôrunda.

⁸ My’ayogyô, ndô mi pa kôtiza; n’awulyi myè inè: Reri yam̃, ntyay y’isam̃u yiṉo yi be dwaṉa sè?

⁹ N’awiṉizi yè inè: Gènda, Danyèl, konde agamba miṉo mi be jumbuṉô alingilyô kwanga gw’egômbe zi ntyay.

¹⁰ Awèwo wi be jombunyô, avangô pupu, am̃èpizyô; aṉag’aṽe wi be dende mbe, e zel’ôma gôr’aṉag’aṽe e be kôtiza, ndô mongi wi be dwaṉa n’imya wi be kôtiza.

¹¹ Egômbe zi be mazô ni ntyagô yi ntyugw’edu, ko ôsam̃u ômbe w’ôyilisi dôṽyô, yi be dwaṉe ntozèny y’intyugu n’inkam̃a s’intyugu mbaṉi n’agôm̃i m’intyugu eṉôgôm̃i.

¹² Ôzaviṉô gôre yè yi be pengiṉa, ko yè siṽa kwanga gô ntozèny y’intyugu n’inkam̃a s’intyugu ntyarô n’intyugu ôtaṉè!

¹³ N’awè, gombize ntyay yo; konde ô be jowiz’ôkuṽi wo, ko wè kum̃aṉa gô pô ijigi so gô ntyay y’intyugu.