Abakuk 1 - Bibili 1927 (Omyene)

¹ Igamba ny’amyezyô gôr’Abakuk, y’ôvogisi.

² Yeôva, ôlingô sè? ... My’arôngi, ko wè ayogo! my’arôngi gôre wè g’ômwanja wi mbaô, ko wè aṉunguṉa!

³ Ntiṉa nde yi tum̃inyo myè ibe, ko wè pôn’isapila? ntiṉa nde yi r’ôṽangatyô ni mbaô g’ôzô wam̃? wi jiv’anyôm̃aṉô ni mbèlèkè.

⁴ Yeṉo ivanga nyi zele jola, ijèkèlya si zele ni ngulu; konde ôm’ombe e kev’ôgôre, n’agamba mi teṉizô ôgôre fo. —

⁵ Vônaṉi gôr’aṉongo, ko silyaṉi, ko mamaṉi n’itya! konde mi ke denda gw’intyugu saṉi eṽilô, zi re aṉw’aṽekelye vangaṉe z’abulinyô ṉwè.

⁶ Vôna, mi ke nongunye mongi Kalde, aṉag’aṽendi n’inega, wi pyagaṉa gw’intye sinda, gô bong’alwaṉô mi re arang’imaô.

⁷ Ar’ererya erevô; ôgôre wè n’inyangi nyè nyi pila gôre yè dadyè.

⁸ Ikavali sè si r’inega vyagaṉô n’injègo, ijavura vyagaṉô ni vengambwa yi nkôlô, na mongi yè wi panda gw’ikavala wi kènda n’ekale; mongi yè wi panda gw’ikavala wi pila bô, wi dôgwa ga ngwanyoṉi yi nega gw’inyi sè.

⁹ Iṉongo nyiṉo nyôdu nyi bya gô kwèra; azô maô mi pôna gô bôsô, wi datiz’ikôte ga ntyèngè.

¹⁰ Wi sèly’aga, wi sèlya kè ivangiṉi; wi sèlya inagô injoli sôdu, wi kenj’iroy, awonga sô.

¹¹ Vovo mpyô yaô yi tô kundô, wi kombiz’ôgèndo waô, ko waô dwaṉ’ôgara. Ngulu yi re gôre waô, yiṉo n’Anyambyè yaô! —

¹² Ô pa pila avila gô koṉako, Yeôva, Anyambyè yam̃, Ômi wam̃ wi nkèrè? azwè ze juwe! Yeôva, ô re dôṽya p’iṉongo nyiṉo gô dend’ijèkèlyi so; n’awè idô nyam̃, ô re nongunya pa nyô gô sôny’igôm̃i yo.

¹³ Antyo mo mi re pupu gô pôn’ibe, w’ayolye pôn’ifwem̃a. Ntiṉa nde yi re wè ko pôna waô wi temiza, ko wè dwaṉa dodo, gô jiliz’ôrègo ôma wi r’ôgôre vyagaṉô na yè?

¹⁴ Awè ko dendiṉ’aṉaga ga intyuwè si mbeṉe, ga vugiṉa yi re yi zele n’ôvangiṉi?

¹⁵ E dura sôdu n’alowo, e kôta sô gô mbuzi yè, e kum̃inya sô gô lôṽi yè; yeṉo e jeṉe mbya n’igeṽa.

¹⁶ Yeṉo e jire ntyagô gô mbuzi yè, e jire yom̃a yi nkangô gô lôṽi yè, konde mbèy yè yi r’ipom̃a vo yô, n’inyi sè ijenge.

¹⁷ Sambô e be sage mbuzi yè, Ayôṉ’egômbe zôdu aṉongo ipôgiṉa fo?