Sinulo 1 - Mukanda Wajila Wanzambi

¹ Chimwekeshu chaYesu Kristu chamumwekesheluwu kudi Nzambi, kulonda aleji ambuŋindi yuma yikukeŋa kumwekana mumafuku akadi kuvula. Watemesheli kaŋelu kindi nakuyishimuna kudi kambuŋindi Yowanu.

² Diyi washimwini wunsahu waIzu daNzambi niwaYesu Kristu, yoyuma yamweniyi yejima.

³ Yowu wukutaŋila akwawu nakooleki, ninawa akutiya mazu awuprofwetu iwu anakooleki, ákuhemba yuma yanasonekuwu mwenimu; muloŋa mpinji keŋa yishiki.

⁴ Ami Yowanu nasonekeli yipompelu yekala muAsiya yitanu nayiyedi. Luwi lwikali nanenu nikuwunda kwakufuma kudi owu wekala kwoku, wadiŋi kwoku, wamba kenza; kwakufuma nikudi Spiritu wekala mutanu namuyedi wekala kumesu etanda dindi dawanta;

⁵ kwakufuma nikudi Yesu Kristu, yowu chinsahu washinshika, yowu wedi wamudi afu, yowu nyuuli yawanyanta aheseki. Yena watukeŋa watukuulili kunshidi jetu namashi indi.

⁶ Watwilishili twikali anyanta niatupristu twaNzambi yindi, yowu Tata. Lubanji lwakulema niwanta wikali windi hayanyaka nanyaka. Amena.

⁷ Talenu, hakwinza namavu, antu ejima akamumona namesu, niwena amupwikili; ninyunza yejima yaheseki yakamudila makumbu. Mwamweni. Amena.

⁸ Mwanta nindi Ami yami Alefwa, yami Omega, wekala kwoku, wadiŋi kwoku, wamba kenza, Nzambi Chinyaweji.

Lubanji lwakulema kwaYesu Kristu

⁹ Ami manakwenu Yowanu, mukwakumwena nenu hamu niyihuŋu niwanta nikutatakena kwamudi Yesu, nadiŋi hachitutu, ijina dachu Patamosa, kukoola izu daNzambi, nikushimuna nsaŋu yaYesu.

¹⁰ Nadiŋi mudi Spiritu hefuku daMwanta; hinukutiya kunyima izu davuma neyi mpùŋa,

¹¹ nindi, Ami yami Alefwa, yami Omega, yami Tachi, yami Nkumininaku. Yiwukumona yisoneki mumukanda, wutemeshi kuyipompelu yitanu nayiyedi yekala kuEfwesesa, nikuSimirina, nikuPerigamu, nikuTiyatira, nikuSaradisa, nikuFiladelifiya, nikuLayodikeya.

¹² Hinukubalumuka nami nitali izu dinahoshi nanami. Chinabalumuki nimona mawimenu amanoŋu awuru atanu nayedi.

¹³ Mukachi kamawimenu amanoŋu mudi wúdi neyi Mwana kaMuntu, navwali ihina dakuluka nikunyendu, kwibwambu kudi muya wawuru.

¹⁴ Mutu windi ninsuki jindi jitooka to-o neyi wanda wutooka, chikwanvula yamalola; nimesu indi adi neyi muzuzu wakesi,

¹⁵ ninyendu yindi yidi neyi wuneŋu wudi nakuyemoka muluteŋu; niizu dindi didi neyi kuvuma kwamuluumbi.

¹⁶ Muchikasa chindi chachidiilu mudi tutumbwa tutanu natuyedi; mukanwa kindi mwedika mpoku yakabali yatwa, yikweti wumwemu kuyedi; kumesu indi kudi neyi chatoŋekaŋa itaŋwa naŋovu.

¹⁷ Chinamumweni hinukudimbukila kunyendu yindi neyi nimufu hohu. Hakunnaŋika chikasa chindi chachidiilu nindi, Bayi wutiya womaku, yami Tachi, yami Nkumininaku,

¹⁸ yami Mumi; kufwa nafwili, hakwinzichi nahanda hayanyaka nanyaka. Nsapi jakufwa nijakaluŋa jidi nanami.

¹⁹ Dichi sonekaku yuma yiwunamoni, niniyi yiduku, niyuma yamba kenza kukukuminina.

²⁰ Nsaŋu yakujinda yatutumbwa tutanu natuyedi túwunamoni muchikasa chami chachidiilu, niyamawimenu amanoŋu awuru atanu nayedi; tutumbwa tutanu natuyedi hiyaŋelu ayipompelu yitanu nayiyedi; nimawimenu amanoŋu atanu nayedi hiyipompelu yitanu nayiyedi.