Numere 1 - Mukanda Wajila Wanzambi

¹ Hamwaka wamuchiyedi hafuminuwu aIsarela mwituŋa daEjipitu, hefuku damuchimu dakakweji kamuchiyedi muchinkalampata chakuSinayi, mwitenti dakubulakena, Yehova wahosheli naMosi,

² nindi, Mwakachinda mwashikila chipompelu chawanyana kaIsarela chejima, mwahita yisaka yawu, mwahita mavumu awankakulula jawu, mwachindilawu majina awamayala ejima, kumutu kumutu;

³ kutachikila hadi anyaka makumi ayedi (20) nakubadikamu, amuIsarela ejima ayaŋa kunjita, akayichinda kudeyi naAroni mwahita majitawu.

⁴ Mwakekala namayala akwila hamuchidi iyala wumu, hamuchidi iyala wumu, mwahita nyichidi yejima, anyanta anyitaŋa yawankakulula jawu ejima.

⁵ Majina awamayala imwakemana nawu diwenawa; wakuRubeni; Elizuri mwana kaShedeyuri.

⁶ WakuSimeyona; Shelumiyeli mwana kaZurishadayi.

⁷ WakuYuda; Nahashoni mwana kaAminadabi.

⁸ WakuIsakari; Netaneli mwana kaZuwari.

⁹ WakuZebuluni; Eliyabi mwana kaHeloni.

¹⁰ Wakudi anyana kaYosefu; wakuEfweremi; Elishama mwana kaAmihudi; wakuManase; Ŋamaleli mwana kaPedazuri.

¹¹ WakuBenjamini; Abidani mwana kaGideyoni.

¹² WakuDani; Ahiyezeri mwana kaAmishadayi.

¹³ WakuAsheri; Pagiyeli mwana kaOkirani.

¹⁴ WakuGadi; Eliyasafwi mwana kaDeyuweli.

¹⁵ WakuNafwatali; Ahira mwana kaEnani.

¹⁶ Wenawa diwu akunjikiluwu muchipompelu, owu atulamba ahanyichidi yawankakulula jawu; diwu anyanta amakombakaji awaIsarela.

¹⁷ Mosi naAroni atambikili amayalawa atenenuwu hamajina.

¹⁸ Apompesheli chipompelu chejima hamu hefuku damuchimu dakakweji kamuchiyedi, ashimwini mwasemukilawu, mwasemukilawu mwahita yisaka yawu, mwahita mavumu awankakulula jawu, mwachindililuwu majinawu, kutachikila hadi anyaka makumi ayedi (20) nakubadikamu, kumutu kumutu.

¹⁹ Mwamulejeluwu Mosi kudi Yehova, dimu mwayichindililiyi muchinkalampata chakuSinayi.

²⁰ Anyana kaRubeni, wedi waIsarela mumakiŋu awu mwahita yisaka yawu, mwahita mavumu awankakulula jawu, mwachindililuwu majina awamayala ejima, kumutu kumutu, kutachikila hadi anyaka makumi ayedi (20) nakubadikamu, ayilaŋa kunjita ejima;

²¹ achindiluwu kumuchidi waRubeni, ashikili mumakombakaji makumi awana natanu nadimu, nankulakaji jitanu (46,500).

²² Akudi anyana kaSimeyona, mumakiŋu awu mwahita yisaka yawu; mwekalila mavumu awankakulula jawu, achindiluwu mwachindililuwu majina awamayala ejima, kumutu kumutu, kutachikila hadi anyaka makumi ayedi (20) nakubadikamu, ayilaŋa kunjita ejima;

²³ achindiluwu kumuchidi waSimeyona, ashikili mumakombakaji makumi atanu natanu nawana, nankulakaji jisatu (59,300).

²⁴ Akudi anyana kaGadi mumakiŋu awu, mwahita yisaka yawu, mwahita mavumu awankakulula jawu, mwachindililuwu majinawu, kutachikila hadi anyaka makumi ayedi (20) nakubadikamu, ayilaŋa kunjita ejima;

²⁵ achindiluwu kumuchidi waGadi ashikili mumakombakaji makumi awana natanu, nankulakaji jitanu nayimu namakumi atanu (45,650).

²⁶ Akudi anyana kaYuda, mumakiŋu awu, mwahita yisaka yawu, mwahita mavumu awankakulula jawu, mwachindililuwu majinawu, kutachikila hadi anyaka makumi ayedi (20) nakubadikamu, ayilaŋa kunjita ejima;

²⁷ achindiluwu kumuchidi waYuda ashikili mumakombakaji makumi atanu nayedi nawana, nankulakaji jitanu nayimu (74,600).

²⁸ Akudi anyana kaIsakari, mumakiŋu awu, mwahita yisaka yawu, mwahita mavumu awankakulula jawu, mwachindililuwu majinawu, kutachikila hadi anyaka makumi ayedi (20) nakubadikamu, ayilaŋa kunjita ejima;

²⁹ achindiluwu kumuchidi waIsakari, ashikili mumakombakaji makumi atanu namakombakaji awana, nankulakaji jiwana (54,400).

³⁰ Akudi anyana kaZebuluni, mumakiŋu awu, mwahita yisaka yawu, mwahita mavumu awankakulula jawu, mwachindililuwu majinawu, kutachikila hadi anyaka makumi ayedi (20) nakubadikamu, ayilaŋa kunjita ejima;

³¹ achindiluwu kumuchidi waZebuluni, ashikili mumakombakaji makumi atanu natanu nayedi, nankulakaji jiwana (57,400).

³² Akudi anyana kaYosefu akudi anyana kaEfweremi, mumakiŋu awu, mwahita yisaka yawu, mwahita mavumu awankakulula jawu, kutachikila hadi anyaka makumi ayedi (20) nakubadikamu, ayilaŋa kunjita ejima;

³³ achindiluwu kumuchidi waEfweremi, ashikili mumakombakaji makumi awana nankulakaji jitanu (40,500).

³⁴ Akudi anyana kaManase, mumakiŋu awu, mwahita yisaka yawu, mwahita mavumu awankakulula jawu, mwachindililuwu majinawu, kutachikila hadi anyaka makumi ayedi (20) nakubadikamu, ayilaŋa kunjita ejima;

³⁵ achindiluwu kumuchidi waManase, ashikili mumakombakaji makumi asatu namakombakaji ayedi, nankulakaji jiyedi (32,200).

³⁶ Akudi anyana kaBenjamini, mumakiŋu awu, mwahita yisaka yawu, mwahita mavumu awankakulula jawu, mwachindililuwu majinawu, kutachikila hadi anyaka makumi ayedi (20) nakubadikamu, ayilaŋa kunjita ejima;

³⁷ achindiluwu kumuchidi waBenjamini, ashikili mumakombakaji makumi asatu namakombakaji atanu, nankulakaji jiwana (35,400).

³⁸ Akudi anyana kaDani, mumakiŋu awu, mwahita yisaka yawu, mwahita mavumu awankakulula jawu, mwachindililuwu majinawu, kutachikila hadi anyaka makumi ayedi nakubadikamu, ayilaŋa kunjita ejima;

³⁹ achindiluwu kumuchidi waDani ashikili mumakombakaji makumi atanu nadimu, namakombakaji ayedi, nankulakaji jitanu najiyedi (62,700).

⁴⁰ Akudi anyana kaAsheri mumakiŋu awu, mwahita yisaka yawu, mwahita mavumu awankakulula jawu, mwachindililuwu majinawu, kutachikila hadi anyaka makumi ayedi (20) nakubadikamu, ayilaŋa kunjita ejima;

⁴¹ achindiluwu kumuchidi waAsheri ashikili mumakombakaji makumi awana nekombakaji dimu, nankulakaji jitanu (41,500).

⁴² Akudi anyana kaNafwatali, mumakiŋu awu, mwahita yisaka yawu, mwahita mavumu awankakulula jawu, mwachindililuwu majinawu, kutachikila hadi anyaka makumi ayedi (20) nakubadikamu, ayilaŋa kunjita ejima;

⁴³ achindiluwu kumuchidi waNafwatali, ashikili mumakombakaji makumi atanu namakombakaji asatu, nankulakaji jiwana (53,400).

⁴⁴ Wenawa diwu achindiluwu, wowachindiluwu kudi aMosi naAroni, natulamba twawaIsarela, amayala ikumi nayedi (12), hevumu dankakulula yamuntu iyala wumu, hevumu dankakulula yamuntu iyala wumu.

⁴⁵ Dichi akudi anyana kaIsarela ejima achindiluwu mwahita mavumu awankakulula jawu, kutachikila hadi anyaka makumi ayedi (20) nakubadikamu, amuIsarela ayilaŋa kunjita ejima;

⁴⁶ eŋa, achindiluwu ejima ashikili mumakombakaji nkulakaji jitanu nayimu namakombakaji asatu, nankulakaji jitanu namakumi atanu (603,550).

⁴⁷ Hakwila aLevi mwahita muchidi wawatata jawu hiyayichindili nawuku.

⁴⁸ Muloŋa Yehova wahosheli naMosi nindi,

⁴⁹ Hakwila muchidi waLevi bayi wakawuchindaku, kuyichindila hamu nawanyana kaIsarela nehi;

⁵⁰ aLevi wakayikunjika kumudimu waTabanaka yaWunsahu, niwayuma yekalamu yejima niwayuma yayu yikwawu yejima. Akasendaŋa Tabanaka niyuma yayu yejima; akayihembaŋa, akateekaŋa kuTabanaka kwi-ndo.

⁵¹ Chikwila Tabanaka hiyikuya, aLevi akayilemonaŋa; chikwila Tabanaka hiyikuteeka aLevi akayilemaŋa; mwenyi wakadataku akamujaha.

⁵² Anyana kaIsarela akateekaŋa wejima wawu awa hohachiimba chawu, awa hohachiimba chawu, kumpandelu yawu, kumpandelu yawu, mwahita majitawu.

⁵³ Hakwila aLevi akateekaŋa kuTabanaka yaWunsahu kwi-ndo kulonda chipompelu chawanyana kaIsarela akabuli kuchizuwila; aLevi akatalaŋa mudimu waTabanaka yaWunsahu.

⁵⁴ Dimu mweliluwu anyana kaIsarela; mwamulejeluwu Mosi kudi Yehova.