Malilo 1 - Mukanda Wajila Wanzambi

¹ Mukala wadiŋi wenzala antu to-o, O chiwashala dehi kankawawu! O chiwela dehi neyi mfwila wamumbanda. Wadiŋi muneni mukachi kanyunza, Wadiŋi mwanta wamumbanda mukachi kamaluŋa, Lelu wabalumuka dehi chilolu!

² Wakonkamaŋa kwanakudila hohu, Hamakidi indi kwampweji jamadilu hohu; Hadi ejima adikeŋelaŋayi nawu Hihashala wakumukundeja niwumuku; Amabwambu jindi ejima anamukwatili dehi makasu, Abalumuka dehi ayilumbu jindi.

³ Yuda amutwala dehi muwunkoli nakulumbalumba; Nawani nyidimu yakala, Naketukili dehi mukachi kanyunza, Hamonaŋa nikunookaku. Akwakumuhaŋa amulamakesha dehi hanyiŋana.

⁴ Njila jakuZiyona jabunda dehi, Himwenzaŋa nawa antu akwinza kuyawija yakukanaku; Kuyisu yampwembu jindi kwabalumuka dehi kwayihembi, Atupristu twindi hiyakudishishimona, Ajiki indi amona yihuŋu, Yomwenindi namoni kalula.

⁵ Akwankunyi nindi abalumuka dehi anyanta jindi, Ayilumbu jindi hiyakuluŋa; Muloŋa Yehova wamumwesha dehi yihuŋu Nanochu chasweja nyiloŋa yindi kuvula. Anyanindi anyanya ayitwala dehi muwunkoli, Ayitwamijaku dehi kudi akwankunyi nawu.

⁶ Lubanji lwamwana kaZiyona wamumbanda Lwamufuma dehi lwejima. Atulamba twindi abalumuka dehi Neyi ankayi anabuli yakudya, Nawu atemuki akwakuyihaŋa niŋovu nehi.

⁷ Hanu hamafuku ayihuŋu yindi yakulumbwaŋila Yerusalema washala kwakwanakana yuma yindi yamutiyishilaŋa kuwaha Hamafuku ahashankulu, Henahana antu indi aholokeleli mumakasa awakwankunyi nawu, Hamweni niwakumukwashaku. Akwankunyi nindi chamumwenuwu Hiyakumusehaseha chanachochokiyi dehi.

⁸ Yerusalema naputoli dehi nshidi yasweja; Dichi wabalumuka dehi neyi chuma chamajilu. Antu ejima amulemeshelaŋa hiyakumudiwula Nanochu chanamonuwu dehi wusonyi windi. Mwalala hakudishishimona, hakufutalelaku.

⁹ Kumahinindi kwazondeli. Haanukilaŋa kwamba kakuminayuku; Dichi chanakunkumukiliyi chakuhayama hohu; Hakweti niwakumukundejaku. Eyi Yehova, tala yihuŋu yami; Muloŋa chilumbu naditoheshi dehi.

¹⁰ Mukwankunyi nindi nololi dehi chikasa Kulonda akwati hayuma yindi yejima yamutiyishaŋa kuwaha. Muloŋa yena namoni dehi akwanyunza hiyakwiŋila mumalalindi. Wowu walejeli neyi bayi akeŋila muchipompelu cheyuku.

¹¹ Antu indi ejima hiyakudishishimona Hiyakukeŋakeŋa yakudya; Yuma yawu yayitiyishilaŋa kuwaha hiyakulandulula nayakudya yakudihandisha nachu. Eyi Yehova talaku wutali, Muloŋa ami neli dehi wakadi kulema.

¹² Enu ejima mudi nakuhita munjila, Munachimoni nenu hichuma chamukunkulwayi, tahindi? Talenu mutali neyi kwekala yihuŋu Yidi neyi yihuŋu yananmweshuwu ami, Yananmweshiyi Yehova Mwifuku dakuzuwa kwindi kwasweja.

¹³ Yena natemeshi mumafwahami kesi kakufuma mwiwulu, Kanayifuŋununi. Nantanjikili wanda wakufwa nyendu yami, Namfuntishi dehi munyima. Nankonki, nanzeyeshi mwaana wejima.

¹⁴ Mpanda yanyiloŋa yami anayikasi nachikasa chindi, Yinannyeŋumuki, yinashiki nikunshiŋu yami, Yena nazeyeshi dehi ŋovu jami. Mwanta naŋushi dehi mumakasa anawa nakaŋanya kudikaŋa nawu.

¹⁵ Mwanta napepeleshi dehi antu ami akwaŋovu adi mukachi kami. Nantambikili dehi chawija chakukana Kulonda achiki anyikwenzi jami. Mwanta nadatoli dehi mwana kaYuda wamujiki, Neyi chadatolaŋawu muwukamwinu wavinyu.

¹⁶ Yuma yinukudila yoyeniyi. O mumesu ami! O mumesu ami! Chimukuwulumuka mpweji jamadilu! Muloŋa mukwakukundeja wuteji kunhizumwisha Wudi kwakulehi nanami. Anyanami anayikonki dehi, Muloŋa chilumbu nasweji dehi ŋovu.

¹⁷ Ziyona hakwolola makasa kudi akwawu, Hanamoni wakumukundejaku. Yehova nashimuni dehi chakutena Yakoba, Nindi antu amunyeŋumuka akekali akwankunyi nindi. Yerusalema nekali dehi neyi chuma chamajilu mukachi kawu.

¹⁸ Yehova waloŋa, Muloŋa ami nadikaŋili dehi nezu dindi. Enu nyunza yawantu yejima, tiyenu mwani, Mutali yihuŋu yinukumonami. Yaŋadima yami ninyikwenzi yami Anayi dehi muwunkoli.

¹⁹ Natambikili ankeŋelaŋa, Komana andimbilaŋa. Atupristu twami niakulumpi jami Afwilili mumukala, Iku adi nakukeŋakeŋa yakudya Yakudihandisha nachu.

²⁰ Eyi Yehova, talaku, muloŋa ami namoni kukala, Natiyi muchima mwivumu bwi; Natiyi kumuchima futu; Muloŋa ami nadikaŋi nankashi. Hanzi mpoku yakabali hiyikukonka antu, Mwitala mudi neyi kufwa.

²¹ Anantiyi dehi nawu hinukudishishimona, Hikudi wakunkundejaku. Yatama yinukumonami anayitiyi dehi kudi ayilumbu jami, Chiwunachikoŋi anatiyi kuwaha. Ifuku wateneni hiwabidikili wakadileta, Niwena akekala neyi chinidami.

²² Kutama kwawu kwejima kwinzi kumesu eyi, Kulonda wakayikoŋi neyi chiwunankoŋami Nanyiloŋa yami yejima; Kudishishimona kwami kunasweji, Nimuchima wami wunazeyi dehi.