Zakh. 1 - BUKO SIPUNENAN

Tuhan masisogai tai Israel ratoili minca katubuNia

¹ Ka loggo si kabalu ka bagat rura si karua puparentaat Rimata Darius ka Persia, si Tuhan masisegeake patonekat nene katubukku, Nabi Zakharia togat Berekhya, togat Ido.

² Si Tuhan masiparentaake aku bule kupanibo katubut paamianNia kise, “Ka siburu, Aku, Tuhan Sipulugege, bulat magolu ka tubutda taikebbukatmui.

³ Tapoi kineneiget kukuania ka tubumui: Toiliake kam ka tubuKu, iageti Aku leu toili ka tubumui.

⁴ Bui'an kele taikebbukatmui. Siburu peile tai nabi masisege'ake patonekatKu ka tubutdra bui' ragalai minca katai samba jo. Tapoi taarapuletcei samba taraoba mureddet katubukKu.

⁵ Kaipangan sia kineneiget taikebbukatmui samba tai nabi sipuboiki? Ta'ananai sia.

⁶ Katubutda tai nabi sapaguguletKu sipuboiki, Akusegeakean sangamberi parenta samba paasekatKu ka tubutdra taikebbukatmui. Tapoi ta rapuletcei bailiunangan bui ta rabairat ukum siripot taimaletceira. Iapei oleinangan bagatdra samba seseakerangannia, Aku, Tuhan Sipulugege amasiukumake sia simateu ka puseleatdra samba kele siripot siteuakenenKu.”

Itcotmatat Nabi siboiki pagalaiat piga ngamuneng pa kuro'

⁷ Ka gogoi rua pulu epat laggo Syeba, iate laggo pulusara, ka rura si karua puparentaat Rimata Darius, si Tuhan masisegeake patonekatNia ka tubuku. Ka sara itcotmata ka teteret sinoibo,

⁸ itcokungan Malaikat Tuhan sipukukuro kuro simabonan. Puarinangan ka gilak leleu ka oggak loinat murad. Ka teteinia ai piga pa kuro bagei, simabonan, simalebbe samba simabulau.

⁹ Nounoukungan Malaika sipukukuro simabonan nenda, “Tuan, aponia katukolobatnia sangamberi kuro nene?” Aleginangannia, “Ai leu kupakoinong katukolobatnia katubum.

¹⁰ Sia te sikoiniakenen Tuhan raei masigejengi samba masilelekngake sangaliot polak.”

¹¹ Sangamberi kuro nenda masisegeake katubut malaika, “Akugejengingan samba akulelekngakean kai sangaliot polak, matoila polak nene maaban le.”

¹² Iageti kuanangan malaika nenda, “Tuhan Sipulugege, pitu pulungarura burunia anupugolu ka tubut Jerusalem samba sangamberi laggai ka Jehuda. Kipangan le burunia nupugoluki samba tanuappeake sia?”

¹³ Aleginangan si Tuhan malaika nenda pasamba tiboiet pusuibiat baga,

¹⁴ samba malaika nenda masikoiniake aku masisegeake aponia sikuat Tuhan Sipulugege, “Bulat amanuntungan samba ta'an aiom bagaKu masiitco Jerusalem, laggaiKu sipunenen.

¹⁵ Tapoi bulat magolu Aku katubut sangamberi bangsa sikautubuna maaman samba maaban, kalulut kateteret Ai Ku oomake goluku ka tubut paamianKu, sabangsa nenda masituppai pangoringan paamianKu.

¹⁶ Kineneiget totoilingan le Aku ka Jerusalem addeat masikau katuappekat ka laggai nenda. UmangKu tugalai geti sibau samba laggai Jerusalem tupaeru minca.”

¹⁷ Malaika nenda masikoiniake aku masisegeake patonekat nene leu et, “Tuhan Sipulubeunan masimunengake palelengannia, bule ibailiu laggaiNia simaeru puririmanua minca samba bulat iropmake le Jerusalem ipatoila pubabakkatnia geti laggai nenda.”

Itcotmatat nabi sika ruania: pagalaiat ban samba siagai masipaddai laba'

¹⁸ Ka itcotmataku minca sika rua, aku itco epat ban jaui.

¹⁹ Nounoukungan malaika sipaninibo katubukku, “Aponia katukolabat sangamberi ban nenda?” Aleginangannia, “Sangamberi ban nenda iate tularat sangamberi purimataat simaron sipasaragai sipulaggai ka Jehuda, Israel samba Jerusalem.”

²⁰ Lepa patoilanangan si Tuhan katubukku epat sia siagai masipaddai laba sipasiambit panoko.

²¹ Panounoukungan, “Aponia pinaatutdra araoi” Aleginangannia, “Masibaraake katuge'gekat samba kabelekatdra bangsa-bangsa sipakatai Jehuda samba masipasabu sipulaggai sedda.”