Pas. 5 - BUKO SIPUNENAN

Urai Debora samba Barak

¹ Ka gogoi nenda puurainangan si Debora samba si Barak togat Abinoam. Kise ngangania:

² Umun kam si Tuhan, kalulut sangamberi saladdu simagege ka Israel muron patuat pasaggak, samba paamian raoba mei pasaggak.

³ Arep kam ale tai rimata samba tatogat rimata, muurai aku ka Taikamanua Israel, iate Tuhan.

⁴ Oi Tuhan, kateteret anutuitui baram ka Seir, samba nukaddiuake kupkumen laggai Edom, puuilaknangan polak, pukpuknangan leu manua, samba tanai rusa masipiliake oinannia.

⁵ Gutcanangan sangamberi leleu, ka matadra simagege ka Sinai, ka matat Tuhan, Taikamanua Israel.

⁶ Kateteret si Samgar, togat Anat, samba kateteret Jael leu, ta anai kafilah ka tobbou laggai, ta anai sipueenung ka enungan sabeu.

⁷ Sangamberi laggaira tai Israel ta anai sikudduijinia, tangeu lepa pat oi ekeu, Debora; anuoi kele ina simakope nuntut baga.

⁸ Kateteret arataddaake tai Israel masipanindogi sabulungan, bara pasaggangan ka laggaira katalagat si epat pulu ribu saladdutda tai bangsa simagege, ta anai beri sia sara sipasiangkatnake pamatei.

⁹ Katubudra sautet saladdut Israel sibuluake tubu, kusegeake pusurakat bagaku sibulatnia. Umun kam si Tuhan!

¹⁰ Ale kam sipukakalidei kalidei simabulau tubu, kam sikukuddu ka uddut permadani, samba kam sangamberi sipueenung, paarep kam tiboinia kamanangan nene!

¹¹ Ka legret sangamberi uggungan maarep gaugau rapukateuba sirimanua, rapaole masitiboi kamanangan Tuhan, kamanangan tai Israel, paamian Tuhan. Iageti kununungngakerangan tubudra masiailiake ka matatbaliu gugurukat laggai.

¹² Rioake ekeu Debora, samba puurai. Suruake ekeu Barak, girit sia sitangsiakenen!

¹³ Sipulelegei tai saladdu simagege moi ka tubut siuteake sia, moi sia, samba matarek pasaggak ka rubeiatNia.

¹⁴ Puenungrangan baradra ka Efraim ka su'su, masitut saladdut Benjamin sipukukununung ka matadra. Barania ka Makhir oi sia tai utet saladdu, samba baradra ka Zebulon suru sia sautet saladdu.

¹⁵ Sia sikebbukat ka suku Isakhar oi sia masipaalei si Debora, bulatnia, moi si Isakhar samba si Barak leu et oinia, tutdrangannia masiailiake su'su. Tapoi suku Ruben ta amoi ratiboi galaiakenendra kalulut ta'amusara tiboiet ka talagadra.

¹⁶ Angoian le arakuddu ka talagat biribiri? Ta' leu pa bule masiarepmake rapasisogai tarimeu sipasijajago tarimeunia? Kirenangan suku Ruben ta amoi aratiboi galaiakenendra aipoi katalagadra ta amusara tiboiet.

¹⁷ Tai Gilead mukuddu ka silat bagat oinan Jordan; samba suku Dan, angoian le' rakukuddu ka bebet kapa'? suku Asyer mukuddu sia ka bebet koat, pulaggairangan ka gunggungnia.

¹⁸ Tapoi suku Zebulon iate bangsa simagege masibuluake enganda, kisedda leu et suku Naftali, ka kudduat simabuak ka simalio.

¹⁹ Ka Taanakh, legret bagat oinan ka Megido, pasaggkdrangan tai rimata, tai rimata Kanaan pasaggak, tapoi ta anai araabbit perak sirauraura.

²⁰ Pasamba sangamberi panyanyat leu pasaggak masisaggangi si Sisera, ka kudduat puenungandra ka manua.

²¹ Buranangan bagat oinan Kison masiaggruake tai saggak. Kenan, kenan ka bagat gege, ale ketsatku!

²² Maarepnangan kokkak taddat kuro simanangka ai titiktik sipukukuro.

²³ Kuanangan Malaikat Tuhan, “Pateleiji le Meros, samba sikudduijinia, kalulut ta amoi sia masiake paroman sibailiu saladdu sipasasaggak addeat Tuhan.”

²⁴ Mauktuknangan te si Jael, sinanalep Heber tai Keni; ka talagatda sangamberi sikudduiji sapou, nia le simakope tupanukani.

²⁵ Tiddounangan oinan si Sisera, tapoi susu le aikau ka tubunia, tattanakenangan susu ka bagat mangkok simateu addeatda tai rimata.

²⁶ Ai arigit sapou samba panondoi ka kabeinia bobonangan si Jael si Sisera pat ragat utenia.

²⁷ Ka reret Jael belenia aimatei rapponia ka polak aiaili kamateiatnia.

²⁸ Oto inan Sisera ainia palologgou ka jandela, samba kuanangan, “Angoian le ta ibabara keretania, angoian le ta imaarep bakkou kuronia?”

²⁹ Simasiku patuat ka talagadra sapagugulet tainanalep masikau alegiat sibara kapatuatnia:

³⁰ “Aipei le sia masiparurubei bibilet siraurau, ka senen saladdu, sara ele rua taiokko. Addeat kai Sisera, galajet leppei simakeppu saki, addeat ratu, salendang sibara sulam simagurik.”

³¹ Oi Tuhan, bule sangamberi saggaknu matei kele si Sisera, tapoi sangamberi sipununtukiNia baga kele ibela sulu ka manua ramakayo! Kele ailepa nenda, maamannangan tobbou laggai nenda epat pulu ngarura burunia.