Mat. 4 - BUKO SIPUNENAN

Katusiboat Jesus

¹ Lepa ambitnangan Jesus Ketsat ka simatangeu bule isibo nia Sanitu.

² Kele aipupuaso epat pulu ngatago epat pulu ngasoibo malajenangan.

³ Ia geti oi aioi sipasisibo kuanangan ka matania, “Ke Togat Taikamanua ekeu, kua le ibailiu roti pabukkubukku nene.”

⁴ Aleginangan nia Jesus, “Atusuratnakean: Ta sarat kan iririmanuaake sirimanua, senen tiboiet sibebela ka ngungun Taikamanua le.”

⁵ Lepa ambitnangan nia Sanitu ka Laggai Sipunenan, rioakenangan nia ka teitei Uman Taikamanua.

⁶ Kuanangan ka matania Sanitu, “Ke Togat Taikamanua ekeu, ribbaiake tubum ka polak, atusuratnakean poi, ‘Ikokoiniake te malaikania Taikamanua kalulut ekeu, ratoddai ekeu ka kabeira, bui itusoksok rerem ka bukku.’ ”

⁷ Kuanangan ka matania Jesus, “Atusuratnakean leu, ‘Bui nusibo Tuhan, Taikamanuam.’ ”

⁸ Lepa ambitnangan nia minca Sanitu ka leleu simakope buak. Sausaunangan ka matania sangamberi purimataat polak samba pulatsanannia.

⁹ Kuanangan ka matania, “Sangamberinia nene kuaake kekeu, ke murappo ekeu nupanindogi aku.”

¹⁰ Kuanangan ka matania Jesus, “Kenan katuitui Sanitu! Atusuratnakean poi: Tuhan Taikamanuam le panindogietnu, sarania le reddenennu!”

¹¹ Lepa kaddiuakenangan nia Sanitu, oirangan leu samalaika masipuuku nia.

Itaddaake Jesus galajetnia ka Galilea

¹² Kele aiarep Jesus atupenjaraakean si Johannes, ei nia ka Galilea.

¹³ Kaddiuakenangan Natsaret ei nia mukuddu ka Kapernaum ka bebet koat ka polakda tai Sebulon samba Naptali,

¹⁴ bule ipuaili tiboiet siniboi nabi Jesaya sipasikukua,

¹⁵ “Polak Sebulon samba Naptali, enungan sieei ka koat, ka silat Jordan, Galileat sipuarat sabulungan!

¹⁶ Bangsa sipukukuddu ka gepgep araitcoan pato simatoro! Ka sia sipukukuddu ka laggai iggobiet kamateiat amutorongan pato!”

¹⁷ Barania ka teteret nenda taddaakenangan Jesus mungantoman kuanangan, “Bauake kam paatuatmui amalegerengan poi Purimataat Sorga!”

Isogai sipasiuluinia siboiki Jesus

¹⁸ Aimugegejek Jesus ka bebet koat Galilea, itconangan rua sipusasaraina, ia te si Simon sipuoni leu si Petrus samba baginia si Andreas, ai sia mujajarik ka koat, sipasiiba poi sia.

¹⁹ Kuanangan ka matada Jesus, “Konan kam tut kam aku, kubailiuake kam sipasijajalo sirimanua.”

²⁰ Kaddiuakerangan leu jarikda, tutrangan Jesus.

²¹ Tui nia barania sedda, itconangan minca rua sipusasaraina si Jakobus samba si Johannes tatogat Sebedeus, ai sia ka abak samba ukkuira si Sebedeus airasusubbai jarikda. Sogainangan sia Jesus.

²² Kaddiuakerangan abak samba ukkuira, tutrangan Jesus.

Jesus mungantoman samba masialeake sirimanua

²³ Ia geti gejenginangan sangalio Galilea Jesus, gelaiakenangan sia ka uma parurukatda, paarepnangan Katuareman Simaeru pagalaiat Purimataat Taikamanua samba ialeake sene ngamata besi samba malara.

²⁴ Maarepnangan katuaremannia ka sangalio Siria; taroakerangan leu ka matania sangamberi sirimanua simaluluk, sipasioorik sene ngamata besi samba gejat baga: pinasaileu sanitu, siroro samba simasakit; aleakenangan sia sangamberida.

²⁵ Tutrangan nia sirimanua simigi sibara ka Galilea, ka Dekapolis, ka Jerusalem, ka Judea samba ka silat Jordan.